1917 جىلعى الاش قوزعالىسىنىڭ 100 جىل تولۋىنا جانە قازاقستان رەسپۋبليكاسى تاۋەلسىزدىگى مەرەكەسىنە وراي ۇيىمداستىرىلىپ وتىرعان القالى جيىنعا مەملەكەت جانە قوعام قايراتكەرلەرى, ەلىمىزدەگى جوعارى وقۋ ورىندارىنىڭ قىزمەتكەرلەرى, تانىمال تاريحشىلار مەن بەلگىلى عالىم-زەرتتەۋشىلەر قاتىسپاق.
كونفەرەنتسيانىڭ العا قويىپ وتىرعان نەگىزگى ماقساتى – جاھاندانۋ جاعدايىنداعى قوعامنىڭ رۋحاني جاڭعىرۋ ماسەلەسى مەن الاش مۇراسى ساباقتاستىعىن ايقىنداۋ جانە ۇلت-ازاتتىق قوزعالىسىن عىلىمي تۇرعىدان ناقتىلاۋ.
كەڭەس جۇمىسى «الاش وردا جانە قازاق مەملەكەتتىلىگى ماسەلەلەرى», «الاش قايراتكەرلەرىنىڭ شىعارماشىلىق مۇراسىنىڭ ۇرپاق تاربيەسىندەگى ءرولى» جانە «رۋحاني جاڭعىرۋ جاعدايىندا گۋمانيتارلىق ءبىلىم بەرۋ ءىسىن جەتىلدىرۋ» اتتى باعىتتار بويىنشا جۇرگىزىلەدى.
جيىن بارىسىندا الاش قوزعالىسى تاريحىنان سىر شەرتەتىن كىتاپ كورمەسى ۇيىمداستىرىلىپ, كەلىپ تۇسكەن ماتەريالدار نەگىزىندە ارنايى جيناق شىعارىلماق.
– الاش قوزعالىسى – ەل مۇراتىن ساياسات پەن رۋحانيات تۇرعىسىنان ايقىنداپ, قازاقتىڭ مەملەكەت قۇرۋ تاجىريبەسى مەن مەملەكەتشىلدىك مۇددەسىنىڭ ۇزىلمەگەن التىن ارقاۋى. الاش قوزعالىسى سياقتى ءتول تاريحىمىزداعى اسا ءىرى وقيعاعا قاتىستى ماسەلەلەردىڭ بارلىعىنا شىنايى, تولىمدى ءارى ناقتى باعا بەرىلۋى قاجەت. الاش وردانىڭ عيبراتى, قايراتكەرلەرىمىزدىڭ ءجۇرىپ وتكەن جولى –تاۋەلسىز ەل بولعان قازاق حالقىنا تاعىلىم بولۋى ءتيىس. ۇلت زيالىلارىنىڭ ەگەمەندىك جولىنداعى كۇرەسىنىڭ سالماعى مەن باعاسىن ۇعىنعان سايىن ءبىز بۇگىنگى كۇننىڭ ءمان-ماعىناسىن تەرەڭ سەزىنە تۇسەمىز. بۇل ەڭ الدىمەن وسكەلەڭ ۇرپاق ءۇشىن, قازاق ەلىنىڭ ومىرشەڭدىگى ءۇشىن اسا قاجەتتى ءھام مىندەتتى قاسيەتتى قادام بولماق, – دەيدى شارا ۇيىمداستىرۋشىلارى.
