«قازاقستاندىق عالىم ايەلدەر قوعامى» – ەلىمىزدەگى 400 مىڭعا جۋىق عالىم ايەلدەردىڭ مۇددەسىن قورعاپ, ەلدەگى ءتۇرلى ماسەلەلەر بويىنشا ازاماتتىق ۇستانىمدارىن كورسەتۋ ءۇشىن قۇرىلعان بىرلەستىك. بىلتىر قۇرىلعان قوعامدىق بىرلەستىكتىڭ ماڭىنا ەلىمىزدەگى ءتۇرلى سالا بويىنشا تانىمال قايراتكەر ءھام عالىم ايەلدەر توپتاستىرىلعان.
ۇلتتىق اكادەميالىق كىتاپحانادا وتكىزىلگەن عالىم ايەلدەردىڭ فورۋمى دوڭگەلەك ۇستەل فورماتىندا ۇيىمداستىرىلىپ, وندا ەلىمىزدىڭ لاتىن الىپبيىنە كوشۋدىڭ ادىستەمەلىك جاعى تالقىلاندى. شارانى جۇرگىزگەن «قازاقستاندىق عالىم ايەلدەر قوعامى» بىرلەستىگىنىڭ پرەزيدەنتى تاڭات اياپوۆا ەڭ الدىمەن فورۋمنىڭ ءمان-ماڭىزىنا توقتالىپ, لاتىن ءالىپبيى تۋرالى وي-پىكىرلەرىن ورتاعا سالدى. ء«بىز قازاقستاننىڭ عالىم ايەلدەرى ەلباسىنىڭ لاتىن الىپبيىنە كوشۋ تۋرالى شىعارعان جارلىعىن ءبىراۋىزدان قولدايمىز. لاتىن الىپبيىنە كوشۋ تۋرالى يدەيا ءدال ۋاقىتىندا ايتىلدى. بۇل تاريحي ماڭىزدى شەشىم. بولاشاقتا دامىعان وتىز ەلدىڭ قاتارىنا كىرۋدى ماقسات ەتىپ وتىرعاندىقتان, ول ەلدەردىڭ كوبىنىڭ جازۋى لاتىن الىپبيىمەن جازىلاتىنىن دا ەسكەرگەن ءجون. ءبىز بۇگىن لاتىن الىپبيىنە كوشۋدى ەمەس, لاتىن الىپبيىنە تەزىرەك كوشۋ ءۇشىن قانداي ادىستەمە ۇسىنامىز, لاتىن ءالىپبيىن كوپشىلىك كوكەيىنە قوندىرۋ ءۇشىن قالاي ناسيحاتتايمىز دەگەن ماقساتتا جيىلىپ وتىرمىز», دەدى ول.
فورۋم بارىسىندا بەلگىلى پەداگوگ, قازاقستاننىڭ ەڭبەك ەرى اياگۇل ميرازوۆا قۇتتىقتاۋ ءسوز سويلەدى. ول ءوز سوزىندە ەلىمىز ەكونوميكالىق تۇراقتىلىعى مەن قۋاتتىلىعىنىڭ ارقاسىندا ءۇشىنشى جاڭعىرۋعا قادام باسقانىن اتاپ ءوتىپ, قوعام دامۋىنىڭ ءار كەزەڭىندە ءتۇرلى سالالاردىڭ العا شىعىپ وتىرۋىن تابيعي زاڭدىلىق رەتىندە كورسەتتى. «ەلباسىنىڭ ستراتەگيالىق جولداۋلارى مەن ماقالاسىندا قازاق جازۋىن لاتىن گرافيكاسىنا كوشىرۋ ساتىلاپ جۇزەگە اسىرىلاتىنى ايتىلعان. ءتىلىمىزدى دامىتۋ جانە الەمدىك اقپاراتتىق كەڭىستىككە شىعارۋ ءۇشىن لاتىن گرافيكاسى بىزگە اۋاداي قاجەت ەكەنىن قوعامعا, جالپى حالىققا ءتۇسىندىرۋ ءۇشىن زيالى قاۋىم وكىلدەرى مەن قوعام قايراتكەرلەرى اتسالىسۋدا. مەن ءتىل ماماندارىنا ريزامىن, ولار وتە جاقسى بەلسەندىلىك تانىتتى», دەدى ا.ميرازوۆا.
شاراعا قاتىسقان عالىمداردىڭ كوپشىلىگى لاتىن ءالىپبيىن تەز ۇيرەتۋدىڭ جولدارىن ايتىپ, ادىستەمە جاساۋ جايىنا توقتالدى. جيىن سوڭىندا ولار قازاق ءتىلى مەن اعىلشىن ءتىلىن ساپالى ۇيرەنۋ جايى ايتىلعان ۇندەۋ قابىلدادى. ۇندەۋدە لاتىن الىپبيىنە كوشۋ رەفورماسى ارقىلى ەلىمىزدىڭ الەمدىك قوعامداستىقتا ءوز ورنىن بەكىتە الاتىنى, بۇل ەلىمىزگە ۇلكەن جەتىستىكتەر سىيلايتىنى, ءححى عاسىردا دامۋدىڭ جاڭا ساتىسىنا اياق باسقانىمىزدى كورسەتەتىنى اتاپ ايتىلعان.
ايگۇل سەيىل,
«ەگەمەن قازاقستان»
