ەلىمىزدىڭ ينۆەستورى ءارى ەكونوميكالىق ارىپتەسى قاتارىنداعى اقش-پەن قاتىناستاردى دامىتۋعا استانا ەرەكشە نازار اۋداراتىندىعىن اتاپ وتكەن ق.توقاەۆ كوپسالالى ءوزارا ءىس-قيمىلدى نىعايتۋدا پرەزيدەنتتەردىڭ سىندارلى ۇنقاتىسۋى زور ماڭىزعا يە ەكەنىن العا تارتتى. سەنات توراعاسىنىڭ ايتۋىنشا, پرەزيدەنت ن.نازارباەۆتىڭ اقش-قا الداعى ساپارىنىڭ ەرەكشە ءمانى بار.
سونداي-اق پارلامەنت جوعارعى پالاتاسىنىڭ باسشىسى اقش كونگرەسى مەن ءوزارا ءىس-قيمىلدى تەرەڭدەتۋ جانە پارلامەنتارالىق ىنتىماقتاستىق تەتىكتەرىن نىعايتۋ جايىن دا ءسوز ەتتى.
ساۋدا-ەكونوميكالىق بايلانىستاردى ۇلعايتۋ كەلەشەگى تۋرالى ماسەلەنى تالقىلاۋ بارىسىندا دجەكسون-ۆەنيكتىڭ قازاقستانعا قاتىستى تۇزەتۋلەرىنىڭ كۇشىن اقش كونگرەسى جويۋى قاجەتتىگى تۋرالى ورتاق پىكىرگە كەلدى.
ق.توقاەۆ بارلىق ەتنوستىق جانە ءدىني توپتاردىڭ قۇقىقتارى مەن زاڭدى مۇددەلەرىن قورعاۋعا باعىتتالعان ەلىمىزدە جۇزەگە اسىرىلعان ساياسات تۋرالى امەريكالىق دەلەگاتسيانى حاباردار ەتىپ, الەمدىك جانە ءداستۇرلى دىندەر كوشباسشىلارىنىڭ بارلىق بەس سەزىنە يۋدايزم وكىلدەرىنىڭ بەلسەندى قاتىسقانىن اتاپ ءوتتى.
د.رۋبين بەيبىتشىل سىرتقى ساياسات جۇرگىزۋدەگى جانە بۇۇ قاۋىپسىزدىك كەڭەسىندەگى ناتيجەلى جۇمىسى ءۇشىن قازاقستانعا العىس ايتا وتىرىپ, ەلىمىزدىڭ ەتنوستىق, ءدىني جانە مادەني بوستاندىقتار ماسەلەلەرىندە بۇكىل الەم ءۇشىن ۇلگى بولىپ وتىرعانىن جەتكىزدى.
اڭگىمە بارىسىندا يادرولىق قارۋسىزدانۋ, جاھاندىق جانە ايماقتىق قاۋىپسىزدىك ماسەلەلەرىندەگى قازاقستاننىڭ باستامالارى دا تالقىلاندى.
