مەكتەپ وقۋشىلارى كۇزگى دەمالىس كەزىندە ۋاقىتتارىن ءتيىمدى وتكىزىپ, اسكەري قىزمەتكەر بولۋدىڭ قۇپياسىنا قانىقتى. اسكەري تەحنيكالارمەن تانىستى, سارباز بوتقاسىنىڭ ءدامىن تاتىپ, جەكە قۇرامنىڭ جاتتىعۋىنا دا قاتىستى. كلۋب مۇشەلەرى «باتىس» وڭىرلىك قولباسشىلىعى اسكەرلەرىنىڭ قولباسشىسى, گەنەرال-مايور داۋلەت وسپانوۆپەن قىزىقتى اڭگىمە ءوربىتتى.
-ارينە, ءبىر كۇندە ەلىمىزدىڭ قارۋلى كۇشتەرىنىڭ قاتارىنداعى قىزمەتپەن تولىق تانىسۋ مۇمكىن ەمەس, - دەيدى د.وسپانوۆ. – بىراق مالىمەت الۋعا بولادى. قازاقستان اسكەرى جىل ساناپ جەتىلىپ كەلەدى, تەحنيكا جاڭاردى, جاۋىنگەرلىك دايىندىق قارقىنى جوعارىلادى, اسكەري قىزمەتتى وتەۋگە قاجەتتى جاعدايدىڭ ءبارى بار.
قولباسشىلىقتىڭ ءباسپاسوز حاتشىسى رۇستەم يگىسىنوۆ «باتىس» وڭىرلىك قولباسشىلىعى جاستاردى وتانسۇيگىشتىككە باۋلۋ جۇمىستارىنا ەرەكشە كوڭىل بولەتىنىن ايتادى. جاسوسپىرىمدەردى قاجىرلى, قايراتتى بولۋعا تاربيەلەپ, اسكەري قىزمەتتىڭ ءيميدجىن كوتەرۋگە باعىتتالعان شارالار العا قاراي دا جالعاسىن تابادى.
باقىتگۇل باباش,
«ەگەمەن قازاقستان».
اتىراۋ.
