كوشەلەر كەڭەيەدى,
كەپتەلىس ازايادى
ءدال قازىرگى ۋاقىتتا وبلىس ورتالىعىنداعى ءتورت بىردەي كوشەدە جولداردى كەڭەيتۋ جۇمىستارى جۇرگىزىلىپ جاتىر. بۇگىندە قالاداعى قۇرىلىستاردىڭ دەنى جىبەك ماتالار شاعىن اۋدانىندا قارقىن العانى بەلگىلى. تۇرعىن ءۇي دەيسىز بە, بالاباقشا دەيسىز بە, ەمحانا دەيسىز بە, بارلىعى وسى شاعىن اۋداندا سالىنىپ جاتىر. مۇنداعى حالىق سانى دا جىلدان جىلعا كوبەيىپ كەلەدى. قازىر جىبەك ماتالار شاعىن اۋدانىنداعى ساتباەۆ داڭعىلى بويىمەن جىبەك جولى كوشەسىنەن كارل ماركس كوشەسىنە دەيىنگى 3,5 شاقىرىم جولدى كەڭەيتۋ جۇمىستارى قولعا الىنۋدا. وسكەمەن قالاسى اكىمىنىڭ ورىنباسارى ەرجان قوڭىرباەۆتىڭ ايتۋىنشا, بۇعان دەيىن پايدالانىلىپ كەلگەن ءتورت جولاقتى جول الداعى ۋاقىتتا التى جولاقتى جولعا اينالماق.
سونىمەن قاتار جاياۋ جۇرگىنشىلەرگە جانە ۆەلوسيپەد تەبۋگە ارنالعان جولدار سالىنىپ, داڭعىل بويىنا جاڭا ايالدامالار ورناتىلماق. بۇعان دەيىن قالالىقتار وزەن ۆوكزالى ماڭىنداعى جاعالاۋدا عانا «شايتاناربامەن» جۇيتكىپ جۇرسە, ەندى جىبەك ماتالار شاعىن اۋدانىنان قالاعا دەيىن ۆەلوسيپەدپەن جەلدەي ەسىپ جەتۋىنە مۇمكىندىك تۋعىزىلماق. بيىل ماۋسىمدا باستالعان بۇل جۇمىستار 2018 جىلى اياقتالادى دەپ جوسپارلانىپ وتىر.
بۇدان بولەك قازىر قالاداعى جىبەك جولى مەن ساتباەۆ داڭعىلدارىنىڭ قيىلىسىندا, ەرتىس وزەنى ارقىلى وتەتىن كوپىردەن احمەر اۋىلىنا, تاۋەلسىزدىك, استانا مەن پوتانين كوشەلەرى جانە اۋەزوۆ داڭعىلىنان داڭق مەموريالىنا دەيىنگى اۋماقتاعى كوشەلەردى كەڭەيتۋ, اباتتاندىرۋ جۇمىستارى قىزۋ جۇرگىزىلۋدە. ە.قوڭىرباەۆ وسىنداي اۋقىمدى جۇمىستار رەسپۋبليكالىق, وبلىستىق جانە قالالىق بيۋدجەت قارجىسىمەن جۇزەگە اسىرىلىپ جاتقانىن ايتادى. وسىدان بىرەر كۇن بۇرىن شاھاردىڭ ءار اۋماعىندا قولعا الىنعان كوشەلەردى كەڭەيتۋ جۇمىستارىمەن تانىسقان وبلىس اكىمى دانيال احمەتوۆ جىبەك ماتالار شاعىن اۋدانىنداعى قۇرىلىس جۇمىستارى ساتىمەن اياقتالسا, 15 جىلعا دەيىن كەپتەلىس ماسەلەسىن شەشۋگە ىقپال ەتەتىنىن جەتكىزدى.
2018 جىلى 100 اۋلا جوندەلەدى
قازىر وسكەمەندە اۋلالاردى اباتتاندىرۋ جۇمىستارىنا دا ايرىقشا كوڭىل ءبولىنىپ جاتىر. ءۇش جىلدا وبلىس ورتالىعىنداعى ءۇش جۇزدەن استام اۋلا كۇردەلى جوندەۋدەن وتكىزىلەدى دەپ جوسپارلانىپ وتىر. وبلىس باسشىسىنىڭ تاپسىرماسىنا سايكەس بيىلدان باستاپ قولعا الىنعان جوبا اياسىندا 2020 جىلعا دەيىن شاھارداعى 310 اۋلانىڭ كىرەبەرىس جولدارى مەن كولىك تۇراقتارى كەڭەيتىلىپ, بالالارعا ارنالعان ويىن الاڭقايلارى جوندەلەتىن بولادى. ء«ۇش جىلدا وبلىس ورتالىعىنداعى ءۇش جۇزدەن استام كوشەنى ادام تانىماستاي وزگەرتەمىز. بۇل ماقساتقا بيۋدجەتتەن قوماقتى قاراجات بولىنەدى. ماسەلەن, 2018 جىلى وسكەمەندەگى 100 اۋلانى اباتتاندىرۋ, جوندەۋ جۇمىستارىنا ءبىر ميلليارد تەڭگە كولەمىندە قارجى ءبولۋدى جوسپارلاپ وتىرمىز. مۇنداي شارۋا قالانىڭ بارلىق شاعىن اۋدانىندا جۇرگىزىلەتىن بولادى. اسىرەسە كوپ جىل بويى جوندەۋ كورمەگەن شالعاي اۋلالارعا باسىمدىق بەرىلمەك», دەگەن-ءدى وبلىس اكىمى د.احمەتوۆ جۋىقتا قالا تۇرعىندارىمەن كەزدەسۋىندە.
بۇگىندە وسىنداي اۋلالاردىڭ العاشقىلارىندا ءتيىستى جۇمىستار اياقتالىپ تا قويدى. ماسەلەن, پيتەر كوممۋنارلارى كوشەسىندەگى №20, 22, 24 جانە 26 ۇيلەردىڭ اۋلالارى جاڭادان پايدالانۋعا بەرىلگەن كوپ قاباتتى ۇيلەردىڭ اۋلالارىنان ەش كەم تۇسپەيدى. مۇندا سۋ جاڭا بالالار الاڭى مەن street workout الاڭى بوي كوتەرگەن. بالالار وينايتىن الاڭعا جۇمساق توسەنىش توسەلىپ, جاڭا ورىندىقتار قويىلىپتى. تۇرمىستىق قالدىقتار سالاتىن ارنايى ورىندار دا قالپىنا كەلتىرىلگەن. اۋلاداعى كىرەبەرىس جولداردىڭ ەنى ءۇش جارىم مەترگە دەيىن كەڭەيتىلىپ, 25 كولىككە ارنالعان اۆتوتۇراق پايدا بولىپ, ءبىر عانا اۋلانىڭ وزىندە بىرنەشە بەينەكامەرا ورناتىلىپتى. بۇل ءوز كەزەگىندە شاعىن اۋدان مەن اۋلالارداعى قوعامدىق ءتارتىپتى نىعايتىپ, قۇقىق بۇزۋشىلىق سانىن ازايتۋعا سەپتىگىن تيگىزۋى ءتيىس دەيدى ماماندار.
تىزە بەرسەك وبلىس ورتالىعىن اباتتاندىرۋ, اجارلاندىرۋ باعىتىندا از شارۋا اتقارىلىپ جاتقان جوق. وسكەمەن قالاسى اكىمىنىڭ ورىنباسارى بۇل جۇمىستاردىڭ بارلىعى شاھار تۇرعىندارىنىڭ يگىلىگى ءۇشىن جۇزەگە اسىرىلىپ جاتقانىن ايتادى. بيىل قالادا ۇلكەن جەتى جوبا ىسكە اسىرىلىپ جاتىر. تاۋەلسىزدىك پەن اباي داڭعىلىنىڭ قيىلىسىندا جەر استى جولى سالىنۋدا. كومەندانتكا وزەنىنە اباتتاندىرۋ جۇمىستارى جۇرگىزىلىپ, گۇلدەر وتىرعىزىلدى. پوليتسيا بەكەتىن اشتىق. بۇل جەر قازىر جۇرت دەمالاتىن تاماشا ورىنعا اينالدى. وسكەمەندە مەملەكەتتىك «نۇرلى جول» باعدارلاماسى بويىنشا بىرنەشە تۇرعىن ءۇي سالىنىپ, قۇبىرلار جوندەلىپ جاتىر. بۇگىندە قالادا ەكى بالاباقشا تۇرعىزىلۋدا. جالپى, الداعى ۋاقىتتا 11 بالاباقشا سالۋدى جوسپارلاپ وتىرمىز», دەيدى ە.قوڭىرباەۆ.
ازامات قاسىم,
«ەگەمەن قازاقستان»
وسكەمەن
