اسكەر قاتارىنا قابىلدانعان جاستار ەندى دەسانتتىق شابۋىلداۋشى بريگاداسى قۇرامىندا قىزمەت اتقارادى.
سالتاناتتى جيىنعا اسكەري مەكتەپ تاربيەلەنۋشىلەرى, اسكەري-پاتريوتتىق كلۋبتاردىڭ مۇشەلەرى, جاۋىنگەرلەردىڭ اتا-انالارى, وبلىس اكىمدىگىنىڭ وكىلدەرى قاتىستى. قاپشاعايداعى اسكەري ءبولىمنىڭ №35-ءشى گۆارديالىق دەسانتتىق شابۋىلداۋشى بريگاداسى شتاب باستىعىنىڭ ورىنباسارى, گۆارديا مايورى نۇرعالي اسقاروۆتىڭ ايتۋىنشا, بريگادا قۇرامىنا بۇل شاقىرۋشىلار قاتاڭ تالاپپەن تاڭدالىپ الىنعان. ەكىباستۇزدىق رامازان سەرىك ۇلى اۋە دەسانتى قۇرامىندا قىزمەت ەتۋدى بالا كۇنىنەن ارمانداپتى.
ەندى ول ەليتالىق اسكەر قۇرامىندا. سونىمەن بىرگە, اقتاۋداعى №25744 جانە گۆاردەيسك كەنتىنىڭ №75263 اسكەري بولىمدەرىنە 100 شاقىرىلۋشى اتتاندى. وبلىستىق قورعانىس ىستەرى جونىندەگى دەپارتامەنتىنىڭ اسكەر قاتارىنا شاقىرۋ ءبولىمىنىڭ مالىمەتىنشە, شاقىرىلۋشىلاردىڭ اراسىندا اسكەري-تەحنيكالىق مەكتەبىنىڭ ءۇش ايلىق كۋرسىن بىتىرگەندەر دە بار. ەلىمىزدە قازىر قاراشا ايىندا دەيىن كۇزگى اسكەرگە شاقىرۋ شاراسى جۇرگىزىلۋدە.
فاريدا بىقاي,
«ەگەمەن قازاقستان»
پاۆلودار
