اتالمىش ويىندار جاستاردىڭ كوڭىلىن اۋدارتۋ جانە وبلىستاردىڭ مادەنيەتىمەن تانىستىرۋ ماقساتىندا جىل سايىن ءتۇرلى وبلىستار ورتالىقتارىندا وتكىزىلەدى. بيىلعى جىلى مادەنيەت پەن ونەر سالاسىنداعى شىعارماشىلىق جارىستى پەتروپاۆل قالاسى قابىلداماق. شاھار باسشىلارى وسىنداي ۇلتتىق ماڭىزى بار اۋقىمدى ءىس-شارا بۇل وڭىردە ءالى وتكىزىلمەگەنىن اتاپ ءوتتى.
ء«بىزدىڭ وبلىستا وسىنداي اۋقىمدى جوبانىڭ وتكىزىلۋى وبلىستىڭ شىعارماشىلىق الەۋەتىنىڭ دامۋىنا جانە بيىك ونەر ارقىلى جاس بۋىنعا پاتريوتتىق تاربيە بەرۋگە, ۇلتتىق مادەنيەتتى, مۋزىكالىق ءداستۇردى ساقتاۋ مەن دامىتۋعا, مادەني مۇرانى مولايتىپ, ەلىمىزدىڭ حالقى اراسىنداعى مادەنيارالىق ديالوگىن جۇرگىزۋگە اسا كۇشتى تۇرتكى بولاتىنىنا سەنەمىز,» دەپ اتاپ ءوتتى سولتۇستىك قازاقستان وبلىسى مادەنيەت باسقارماسىنىڭ باسشىسى ەرمەك راحيموۆ.
كوميتەتتىڭ حابارلاۋىنشا, ويىندا 12 وبلىستان, سونىمەن قاتار استانا مەن الماتىدان 600-دەن اسا ادام دەلفيلىك التىن القالاردى يەلەنۋ ءۇشىن باق سىناساتىن بولادى. بيىل قاتىسۋشىلار 18 نوميناتسيا بويىنشا سىناققا تۇسپەك. ولاردىڭ اراسىندا فورتەپيانو, بايان, اككورديون, ۇلتتىق اسپاپتار, تەاتر, حالىق اندەرىن, اكادەميالىق, ەسترادالىق اندەردى ورىنداۋ, حالىق ءبيى جانە زاماناۋي بيلەر, فوتو سۋرەت, تەلەجۋرناليستيكا, قىسقا مەتراجدى كينو (ۆيدەوروليكتەر), بەينەلەۋ ونەرى, كيىم ديزاينى, دەكوراتيۆتى-قولدانبالى ونەر بار.
قازاقستاننىڭ ايگىلى سپورتشىسى سەرىك ساپيەۆ 13-ءشى ۇلتتىق دەلفي ويىندارىنىڭ امباسسادورى رەتىندە تاڭدالعان.
«ۇلتتىق دەلفي ويىندارى - بۇل شىعارماشىل ادامداردىڭ فەستيۆالى عانا ەمەس, ناقتى ايتقاندا بۇل ناعىز دارىنداردى انىقتايتىن بايقاۋ. بۇل ويىندار ەڭ الدىمەن ءبىزدىڭ ەلىمىزدىڭ مەملەكەتتىك ستراتەگياسىن, "رۋحاني جاڭعىرۋ" باعدارلاماسىن جۇزەگە اسىرۋعا سەپتىگىن تيگىزۋدە,» دەپ ويىمەن ءبولىستى سەرىك ساپيەۆ.
ءحىىى-ءشى ۇلتتىق دەلفي ويىندارى «ونەرىم - رۋحاني قازىنام» دەگەن اتاۋ الدى دەلىنگەن حابارلامادا.
