ءيا, راسىمەن دە «استانا» فۋتبول كلۋبى ەۋروپا ليگاسىندا ونەر كورسەتىپ, الادوپ جانكۇيەرلەرىن ءدان ريزا قىلىپ ءجۇر. كۇنى كەشە عانا يزرايل ەلىنىڭ «ماككابي» دەگەن كومانداسىن «استانا-ارەنادا» 4:0 ەسەبىمەن جەڭدى. حوككەيدەگى «بارىسىمىز» قارسىلاس بىتكەنگە تىرناعىن باتىرىپ, قۇرلىقتىق حوككەي ليگاسىنىڭ ازۋلى ۇجىمدارىنىڭ بىرىنە اينالدى. ال «استانا» Pro Team ۆەلوكومانداسى بيىلدىڭ وزىندە ءۇش گراند-تۋردا ويقاستاپ ونەر كورسەتتى. قانشاما كەزەڭدى جەڭىپ, كوماندالىق ەسەپتە يسپانيا «ۆۋەلتاسىن» ۇتتى. ال وسى ۇجىمدارمەن قاتار ءبىر بيۋدجەتتەن قارجى الىپ جۇرگەن «استانا» باسكەتبول كلۋبى شىنىن ايتقاندا كورەرمەن كوزايىمىنا اينال الماي ءجۇر. كورەرمەن دەمەكشى, بۇل كلۋبتىڭ «سارىارقا» ۆەلوترەگىندە وتكىزەتىن ويىندارىنا نەبارى 300-500 جانكۇيەر عانا كەلەدى. تەك مەرەكەلىك كۇندەرى مىڭعا جەتىپ جىعىلادى. كورەرمەنى جوق بولسا, كوماندانىڭ بولاشاعى دا نەعايبىل. سوڭعى 5 جىل بويى ءوز ويىندارىنا جانكۇيەر تارتا الماعان كومانداعا نەسىنە قارجى ءبولىپ, قاراجات جۇمسايمىز دەۋىڭىز دە مۇمكىن.
كوماندا قۇرىلعالى بەرى 6 جىل ۋاقىت ءوتتى. الايدا, ەۋروليگالاردا ءساتسىز ونەر كورسەتۋ دە. ەۋروليگانى قويا تۇرىڭىز, ۆتب بىرىڭعاي ليگاسىنىڭ وزىندە اۋتسايدەر قاتارىندا. وليمپيادا چەمپيونى ۆالەري تيحونەنكو باسقاراتىن ۇجىم نەگە ەكەنى بەلگىسىز, ۇنەمى ساتسىزدىكتەردەن كوز اشپاي كەلەدى. كوماندا قۇرىلىسىمەن بىردەن بىلىكتى باپكەر يتاليالىق ماتتەو بونيوچوللي شاقىرتىلدى. ودان كەيىن سەرب ميلوش تريفۋنوۆيچ تىزگىندى ۇستادى. ارتىنشا كەلگەن ليتۆالىق رامۋناس بۋتاۋتاس تا, «استانانىڭ» تاسىن ورگە دومالاتا قويمادى. جىل سايىنعى ادەت بويىنشا بيىل دا باپكەر اۋىستى. كەزەك گرەك باپكەرلەرىنە كەلىپ, وتكەن جىلى ءىلياس پاپاتەادورۋعا سەنسەك, بيىل ونىڭ ورنىنا كوستاس فلەۆاراكيستى الدىرتتىق.
الايدا, بيىلعى ماۋسىمدا كوماندامىز العاشقى ءۇش ويىننىڭ ۇشەۋىندە دە جەڭىلىس تاپتى. 22 قازان كۇنى بەلورۋستىڭ «تسموكي» كومانداسىنا 9 ۇپاي ايىرماشىلىعىمەن جەڭىلگەنىمىز ءتىپتى ۇياتتى جاعداي. ونىڭ الدىندا ءوز الاڭىمىزدا «زەنيتكە» دە تۋرا 9 ۇپايمەن جەڭىلدىك. ماسكەۋلىك تسسكا ءتىپتى 20 ۇپاي باسىمدىلىعىن كورسەتتى. بۇل جاعداي, ارينە ويلاندىرماي قويمايدى. ءبىزدىڭ باسكەتبول كلۋبىنىڭ ساياساتى-جەرگىلىكتى جاستاردى تاربيەلەۋ. تاجىريبيەلى تىسقاققان لەگيونەرلەرمەن ارالاستىرىپ شەبەرلىك دەڭگەيىن كوتەرۋ ەدى. الايدا, بيىل كەلگەن لەگيونەرلەردىڭ دە ساپاسى ماردىمدى ەمەس سەكىلدى. سىرتتان كەلگەن باسكەتبولشىلار دجاستين كارتەر, لارري گوردون, يكە ۋدانو, حوردۋر ۆيلحالمسون, ەنتوني كلەممونس جانە لەونيداس كاسەلاكيس سەكىلدى ورتاڭقول سپورتشىلار. ال وتاندىق باسكەتبولشىلاردان قۇرامدا بيىل رۋستام ەرعالي, رۋستام مۇرزاعاليەۆ, انتون پونومارەۆ, الەكساندر جيگۋلين, دميتري گاۆريلوۆ, ماكسيم مارچۋك, دەنيس دەگتيارەۆ, ۆاديم ششەرباك, اناتولي كولەسنيكوۆتەر بار.
بىراق, «استانانىڭ» ماۋسىم باستالماس بۇرىن قىركۇيەكتىڭ ورتاسىندا جۇلدە العانىن دا ۇمىتپاۋىمىز كەرەك. كوماندامىز قىتايدىڭ چەنچجوۋ قالاسىندا ازيا قۇرلىعىنىڭ چەمپيوندار ليگاسىندا قولا جۇلدەگەر اتاندى. بۇل ەل باسكەتبولىنىڭ تاريحىندا ويىپ تۇرىپ ورىن الاتىن جەتىستىك. دەگەنمەن, كوماندا نەگىزگى مىندەتى-كارى قۇرلىقتا تانىلىپ, قازاقستاننىڭ اتىن شىعارۋ. وزگە كوماندالارىمىز جاساعان ەرلىكتى باسكەتبولشىلارىمىز دا جاساۋى ءتيىس. ءالجان جارمۇحامەدوۆ سەكىلدى باسكەتبولشىلار شىققان ەلدە تالانتتار كەندە بولماۋى كەرەك. «استانا» باسكەتبول كومانداسى كەلەسى كەزدەسۋىن 30 قازان كۇنى تۇزدە رەسەيدىڭ «حيمكي» كومانداسىنا قارسى وتكىزەدى.
ەرمۇحامەد ماۋلەن,
«ەگەمەن قازاقستان»
