«كاتالونيانىڭ تاۋەلسىزدىگىنە نارازىلىعىن ءبىلدىرىپ, حالىقتىڭ مانيفەستاتسياعا شىققانىنا ەشقانداي قارسىلىعىمىز جوق. ولاردىڭ اراسىندا ارىپتەستەرىمىز, دوستارىمىز, تۋىسقاندارىمىز بار. ەگەر دە كوپشىلىك اراسىندا شۋ شىعارىپ, جانجالعا شاقىرعان توپتى كورسەڭىز, ۇندەمەي عانا ءوتىپ كەتىڭىز», – دەدى سەنبى كۇنى «كاتالونيا ۇلتتىق اسسامبلەياسى».
ەستەرىڭىزگە سالا كەتەيىك, بۇعان دەيىن كاتالونيا يسپانيادان ەركىندىك الۋ جونىندە رەفەرەندۋم وتكىزىپ, بۇنى مادريد تاراپى قۇپتاماعان بولاتىن. يسپانيا بيلىگى كونستيتيۋتسيانىڭ 155-بابىن جۇزەگە اسىرۋ تۋرالى شەشىم قابىلداپ, ايماقتىڭ اۆتونوميالىعى توقتاتىلىپ, كاتالونيا ەندىگى تىكەلەي مادريدكە باعىنباق. ال جەكسەنبى كۇنى مەملەكەتتىڭ تۇتاستىعىن قولداۋ ماقساتىندا كەزەكتى اۋقىمدى شەرۋ ءوتتى.
8 قازان كۇنى رەفەرەندۋمنان كەيىنگى العاش اكتسياعا 300-900 مىڭ ادام قاتىسقاندىعى حابارلانعان. بۇل جولعى شەرۋ دە ودان كەم تۇسپەدى.
ناۋقان جەرگىلىكتى ۋاقىت بويىنشا ساعات 10:00-دە دياگونال جانە پاسەو-دە-گراسيا كوشەلەرىنىڭ قيىلىسىنان باستالدى. ال ارى قاراي شەرۋشىلەر كاتالونيانىڭ كوشەلەرىن ءجۇرىپ ءوتىپ, ورتالىق الاڭعا جينالدى. ولاردىڭ قولدارىندا يسپانيانىڭ, كاتالونيانىڭ, ەو-نىڭ تۋلارى بولدى.
ءبىر قىزىعى, شەرۋگە بىردە-ءبىر پوليتسەي, ءتىپتى گۆارديالىقتار دا قاتىسپادى. الايدا شەرۋدى ءتارتىپ ساقشىلارى تىكۇشاق ارقىلى باقىلىپ وتىردى. ولار ءتىپتى, تاكسيگە مىنگەن تۋريستەردىڭ كوپشىلىك ورتاسىندا بوگەلىپ قالماۋىنا مۇمكىندىك بەردى.
«مەن كاتالونمىن, بۇل ايماقتا تۋعالى بەرى ءومىر ءسۇرىپ كەلەمىن. بىراق يسپانيادان الشاقتاۋىمىز بارىمىزگە كەرى اسەرىن تيگىزەدى دەپ ەسەپتەيمىن. وسى ارقىلى جالپى ەۋروپالىق كەڭىستىكتەن الشاقتاپ قالامىز. بۇل ءوز كەزەگىندە جاستارعا دا زيانىن تيگىزەدى», – دەدى شەرۋگە قاتىسۋشىلاردىڭ ءبىرى.
الاڭعا شىققاندار «Viva España, viva Cataluña!» دەپ حالىقتى بىرلىككە شاقىرۋمەن بولدى. سونداي-اق, «Puigdemont a prisión» (قازىرگى كاتالونيا باسشىسى پۋچدەموندى قاماۋ كەرەك) دەپ ايقايلاعاندار دا جوق ەمەس ەدى.
يسپانيا ۇكىمەتى كارلەس پۋچدەموندى وتستاۆكاعا جىبەرگەن بولاتىن. بىراق ول بۇل جونىندە ازىرگە پىكىر بىلدىرمەدى.
مادريد ءوز كەزەگىندە تاۋەلسىزدىك جاريالاۋ تۋرالى شەشىمدى قايتا قاراۋ ءۇشىن كاتالونيالىق سەپاراتيستەرگە ءۇش كۇن ۋاقىت بەرگەن. بۇگىن سول مەرزىمنىڭ سوڭعى كۇنى. پۋچدەموننىڭ قىزمەتىنەن بوساتىلعانىن ايماقتىق پوليتسيا دا مويىندادى. بىراق جەرگىلىكتى بيلىك مۇنداي شەشىمدى قولداۋعا اسىعار ەمەس. ال ءمادريدتىڭ باسشى ەتىپ جىبەرگەن سورايا ساەنس-دە-سانتاماريانىڭ ايماقتى قالاي باسقاراتىنى ازىرگە بەلگىسىز.
جەرگىلىكتى اقپارات قۇرالدارى پۋچدەموننىڭ ۇكىمەتتى جيروناعا كوشىرۋ جاعىن قاراستىرعانىن دا حابارلادى.
بارسەلونانىڭ قالالىق پوليتسياسى جەكسەنبى كۇنگى شەرۋگە 300 مىڭعا جۋىق ادام قاتىسقانىن مالىمدەدى. الايدا ۇيىمداستىرۋشىلار بۇل كورسەتكىشتىڭ ءبىر ميلليوننان اسقانىن جەتكىزدى.
بۇدان بولەك, يسپانيانىڭ El Pais گازەتى دە شەرۋگە ءبىر ميلليوننان استام ادام شىققانىن سەنىمدى تۇردە حابارلادى. ال Societat Civil Catalana قوعامدىق ۇيىمى جەرگىلىكتى پوليتسيانىڭ اقپاراتىن «fake news» دەپ باعالادى.
ايان ءابدۋالي,
«ەگەمەن قازاقستان»
