كەزىندە مەملەكەت تاپشىلىقتى جويۋ ءۇشىن جانار-جاعارماي جەتكىزۋشىلەردىڭ باسقا تۇرلەرىن ىزدەپ, يمپورتتىڭ تىزبەسىن وزگەرتكەنى جانە تاعى باسقا شارالار جاساعانى دا ەسىمىزدە. بىراق وسى ىسپەن اينالىساتىن مينيسترلىك اقىرىندا جانار-جاعار ماي جەتكىزۋ جۇمىسىن ەركىنە جىبەردى. سونىڭ ناتيجەسىندە 2015 جىلدىڭ شىلدەسىنەن اي-92 بەنزينىنىڭ, ال 2016 جىلدىڭ تامىزىنان ديزەلدى وتىننىڭ باعاسىن رەتتەۋدەن باس تارتتى.
ءماجىلىستىڭ «حالىق كوممۋنيستەرى» فراكتسياسىنىڭ 2014 جىلعى كۇزدەگى جانار-جاعارماي تاپشىلىعىنا بايلانىستى ساۋالىنا بەرگەن جاۋابىندا ۇكىمەت ەلىمىزدەگى بارلىق ءموز زاۋىتتارىن جاڭالاندىرۋ جۇمىستارى اياقتالعان سوڭ مۇنداي كەلەڭسىزدىكتەرگە جول بەرىلمەيدى دەپ جاۋاپ بەرگەن. ال ونىڭ مەرزىمى 2016 جىلدىڭ اياعى دەگەن بولاتىن. وسى جاۋاپتا ءتىپتى 2017 جىلدان باستاپ قازاقستان ەۋرو-4 جانە ەۋرو-5 ماركالى جوعارى ساپالى بەنزينمەن قامتاماسىز ەتىلەدى دەلىنگەن ەدى. سول ۋادە قايدا قالدى؟
بۇگىنگى تاڭدا ءبىز ۇكىمەتتىڭ وپتيميستىك بولجامدارىنىڭ ءبارى شىندىققا ساي ەمەستىگىنە كوزىمىز جەتىپ وتىر. ەلىمىزدە مۇناي وڭدەۋ جۇمىسىن دامىتۋدىڭ ۇزاقمەرزىمدىك جوسپارى جوق ەكەندىگى ءبىلىنىپ تۇر. حالىق سونىڭ سورىن تاتىپ, جانار-جاعارمايدىڭ كەزەكتى رەت قىمباتتايتىندىعىنا نارازىلىق بىلدىرۋدە. ال ولاردىڭ نارازىلىعى ادىلەتتى ەكەندىگى داۋسىز. مۇناي وندىرۋدەن الەمدەگى الدىڭعى قاتارلى ەلدەردىڭ ءبىرى بولا تۇرىپ, بەنزين تاپشىلىعىنا ۇشىراۋ كىمدى دە بولسا الاڭداتارى ءسوزسىز. ونىڭ ۇستىنە جانار-جاعارماي باعاسى قىمباتتاسا ول بارلىق تاۋارلار مەن قىزمەتتەر باعاسىنىڭ وسۋىنە سوقتىراتىنىن دا حالىق بىلەدى. سونىڭ ىشىندە الەۋمەتتىك ماڭىزى بار تۇتىنۋ زاتتارىنىڭ قىمباتتاۋى – حالىق نارازىلىعىن ارتتىرا تۇسەرى ءسوزسىز. ول ينفلياتسيانىڭ دا ارتىپ, تەڭگەنىڭ قۇنسىزدانا تۇسەرىنە جالعاساتىنى دا بەلگىلى.
ەلباسى ن.نازارباەۆ بۇدان ءۇش جىل بۇرىنعى جولداۋىندا جانار-جاعارماي تاپشىلىعىن بولدىرماس ءۇشىن قوسىمشا ءموز سالۋ قاجەتتىگىن ايتقان ەدى. بىراق ۇكىمەت ەلدەگى ءۇش ءموز-ءدى جاڭالاندىرۋدىڭ وزىمەن بۇل ماسەلەنى شەشەمىز دەگەن قورىتىندى شىعاردى. ۋاقىت بۇل شەشىمنىڭ دۇرىس ەمەستىگىن كورسەتىپ وتىر.
وسىنىڭ ۇستىنە جىلىتۋ ماۋسىمى باستالعاندا كومىر مەن گازدىڭ قىمباتتاپ كەتكەنى دە حالىق نارازىلىعىن تۋدىرۋدا. ءجۇز ميلليون توننادان ارتىق كومىر وندىرەتىن ەلدە حالىقتىڭ قاپشىقپەن نەمەسە سومكەلەرىمەن ونى تاسىپ جۇرگەنىن كورگەندە ۇياتتان ورتتەنەسىڭ.
وسىنداي ماسەلەلەردىڭ بولۋ سەبەبىن انىقتاۋ ماقساتىمەن ماجىلىستەگى «حالىق كوممۋنيستەرى» فراكتسياسى ۇكىمەت باسشىسى باقىتجان ساعىنتاەۆتىڭ اتىنا دەپۋتاتتىق ساۋال جولداپ, مىنا سۇراقتارعا جاۋاپ بەرۋىن ءوتىندى:
1.ەلباسى ن.نازارباەۆتىڭ 2014 جىلدىڭ 17 قاڭتارىندا جاريالاعان جولداۋىندا ايتىلعان ءتورتىنشى ءموز سالۋ تۋرالى تاپسىرماسىن ورىنداماۋ تۋرالى باستامانى كوتەرگەن كىم؟
2.مۇناي ونىمدەرىمەن ىشكى رىنوكتى قامتاماسىز ەتۋدىڭ ۇزاقمەرزىمدىك باعدارى بار ما؟ بار بولسا بۇل باعدار ونىڭ باعاسىن كوتەرمەۋدى قاراستىرعان با؟
3.مۇناي ونىمدەرىن جاساۋ مەن ساتۋ رىنوگىنداعى باسەكەلەستىكتى دامىتۋ بويىنشا قانداي شارالار قابىلدانعان؟
4.ازاماتتاردىڭ مونوپولياعا, باعانى كوتەرۋگە استىرتىن كەلىسۋگە قارسى قۇقىقتارىن قورعاۋ ىسىمەن اينالىساتىن وكىلەتتى ورگاننىڭ 2016-2017 جىلعى جۇمىستارىنىڭ ناتيجەسى تۋرالى اقپارات بەرۋىڭىزدى سۇرايمىز.
بۇل سۇراقتاردىڭ جاۋابىن بىلۋگە ءبىزدىڭ دە, حالىقتىڭ دا قاقى بار دەپ سانايمىز.
ايقىن قوڭىروۆ,
ءماجىلىس دەپۋتاتى
