سونىڭ ىشىندە ترانسشەكارالىق قيعاش وزەنىنىڭ بويىندا ورنالاسقان اۋىل تۇرعىندارىنىڭ نەگىزگى كاسىپتەرى بالىقشىلىق. وسى اۋىلدارداعى 10 مىڭنان استام ادامنىڭ كۇن كورىسى بالىق شارۋاشىلىعىمەن بايلانىستى.
وتكەن عاسىردىڭ 60-70 جىلدارى اۋدان كولەمىندەگى قيعاش جانە شورا وزەندەرىنىڭ ارناسىن قۇمنان تازارتۋ, تەرەڭدەتۋ جۇمىستارى جۇرگىزىلگەن. وسىنداي جۇمىستاردىڭ ناتيجەسىندە بالىق اۋلاۋ كولەمى ارتىپ, بالىقشىلاردىڭ تۇرمىستارى جاقسارعان ەدى. قازىر وسى اتالعان جانە ولاردان شىعاتىن باسقا دا وزەندەر ارنالارى تايىزدانعان. وسىنىڭ سەبەبىنەن تەڭىزدەن كىرەتىن بالىق جولدارى جابىلىپ, وزەندەردەگى بالىق تۇرلەرى ازايىپ جانە اۋلاۋ كولەمى كەمىپ كەتكەن. سوندىقتان وزەندەردىڭ ارنالارىن تازالاپ, تەرەڭدەتۋ وتە ماڭىزدى. بۇل ءوز كەزەگىندە اۋدانداعى بالىق شارۋاشىلىعىندا جۇرگەن كاسىپكەرلىك سۋبەكتىلەرىنىڭ تابىستارىنا وڭ اسەرىن تيگىزەدى. وسى شارا سالاعا ينۆەستيتسيالار تارتىپ, ونىمدەردى وڭدەۋ ءىسىنىڭ العا دامۋىنا دا مول مۇمكىندىك بەرەر ەدى جانە بىرنەشە ۇرپاق بويى ناپاقاسىن بالىق ارقىلى ايىرىپ كەلە جاتقان بالىقشىلار تۇرمىسىن دا جاقسارتۋعا دا سەپتىگىن تيگىزەرى ءسوزسىز.
اتىراۋ وبلىستىق اكىمشىلىگى اۋدانداعى بالىق شارۋاشىلىعىن دامىتۋ مۇمكىندىكتەرىن قاراستىرىپ, شارالار بەلگىلەۋدە. قيعاش وزەنى سۋىنىڭ كولەمىن ارتتىرۋ جانە گيدرولوگيالىق جايىن جاقسارتۋ ماقساتىندا ينۆەستيتسيالىق جوبا دايىندالعان. ونىڭ جالپى قۇنى 5,6 ملرد تەڭگە. جوبا 2017 جىلعى 31 تامىزدا مەملەكەتتىك ساراپتامادان وتكەن, كونكۋرستىق پروتسەدۋرالار دا اياقتالۋ ۇستىندە. وسى ماڭىزدى جوبانى ىسكە اسىرۋ ءۇشىن رەسپۋبليكالىق بيۋدجەتتەن 2018 جىلعا 3 ملرد تەڭگە كولەمىندە قارجى ءبولىنۋى قاراستىرىلعان. جوبانىڭ ۋاقىتىندا جانە ساپالى ورىندالۋى تولىق قارجىلاندىرۋعا تىكەلەي بايلانىستى. ايتپەسە باستالعان جوبا ىسكە اسپاي جارتى جولدا قالدىرىلۋى دا مۇمكىن. ونداي دۇنيەلەر دە ءبىزدىڭ ەلىمىزدىڭ كەيبىر جەرلەرىندە ۇشىراسىپ قالادى.
سوندىقتان ءبىز ۇكىمەت باسشىسى باقىتجان ساعىنتاەۆقا دەپۋتاتتىق ساۋال جولداپ, قيعاش وزەنىن تەرەڭدەتۋ جۇمىستارىنا قاجەت قارجىنى تولىق كولەمدە ءبولىپ, ونى ۋاقتىلى قارجىلاندىرۋعا بايلانىستى شارالار بەلگىلەۋدى ۇسىندىق. بۇل ساۋالدى بىرنەشە ارىپتەستەرىم دە قولداپ, وزدەرىنىڭ قولدارىن قويدى.
سارسەنباي ەڭسەگەنوۆ,
سەنات دەپۋتاتى
