ءبىزدىڭ باتىر بابالارىمىز اۋماعى جونىنەن الەمدە توعىزىنشى ورىندى الاتىن, و شەتى مەن بۇ شەتىنە قۇلان جورتسا تۇياعى توزاتىن, قىران ۇشسا قاناتى تالاتىن ۇلان-عايىر جەردىڭ شەبىن عاسىرلار بويى قانىن توكسە دە, ارىن توكپەستەن, جانقيارلىقپەن قورعادى. بەيبىت زاماندا ۇلى دالامىزدىڭ شەبىن قورعاۋشى جاۋىنگەر-شەكاراشىلار دا سول باتىر بابالارىمىزدىڭ بۇگىنگى بۋىنى تابىلادى.
بۇگىندە بەس مەملەكەتپەن شەكتەسەتىن جانە جالپى ۇزىندىعى 15 مىڭ شاقىرىمداي بولاتىن شەكارامىزدا 300-گە جۋىق شەكارا زاستاۆاسى قۇرىلعان. وسى زاستاۆالارعا سان تاراپتان سۇقتانعان جات جۇرتقا اتامەكەننىڭ قارىس قادامىن دا ۇستاتپاي, ۇرپاعىنا تولىق ميراس ەتكەن باتىر بابالارىمىزدىڭ اتىن بەرسەك, ورىندى بولار ەدى.
مۇنىڭ ۇلاعاتتى ۇلگىسى دە بار. 2017 جىلدىڭ 3 ساۋىرىندە ۇكىمەتتىڭ قاۋلىسىمەن قىزىلوردا شەكارا وتريادىنىڭ «قىزىلقۇم» شەكارا زاستاۆاسىنا جانقوجا باتىردىڭ ەسىمى بەرىلدى. وسىنىڭ الدىندا, 2014 جىلى قىزىلوردا وبلىسىنىڭ قازالى اۋدانىندا وتكەن, جانقوجا نۇرمۇحاممەد ۇلىنىڭ 240 جىلدىعىنا ارنالعان رەسپۋبليكالىق اۋقىمداعى ءىس-شارادا قىزىلقۇمداعى شەكارا بەكەتىنە باتىردىڭ ەسىمىن بەرۋ تۋرالى باستامانى ءبىز كوتەرگەن ەدىك. مىنە, وسى باستاما جۇزەگە اسىپ وتىر.
بۇل بىرىنشىدەن, ەل شەبى مەن ۇلتتىق قاۋىپسىزدىكتى قورعاۋشى شەكاراشىلارىمىزدى دارحان دالاعا قالقان بولعان باتىر بابالاردىڭ ۇلى رۋحىندا تاربيەلەۋگە ۇلەس قوسادى.
ەكىنشىدەن, قازاقستان تاريحىندا ەرەكشە ورىن الار تۇلعالاردىڭ اتىن ماڭگى قالدىرۋعا قىزمەت ەتەدى.
ۇشىنشىدەن, ەلباسى رۋحاني جاڭعىرۋعا ارنالعان ماقالاسىنىڭ «تۋعان جەر» بولىمىندە ۇسىنعانىنداي, «ەسىمدەرى ەل ەسىندە ساقتالعان ءبىرتۋار پەرزەنتتەر» ارقىلى جاس ۇرپاقتىڭ تۋعان جەر تاريحىن تانۋىنا ىقپال جاسايدى.
تورتىنشىدەن, باتىر بابالار اتىمەن اتالعان شەكارالىق زاستاۆالار – وزگە مەملەكەتتەر ازاماتتارىنا قازاقستاندى ءوز تاريحىن جانە ەر ۇلاندارىن ۇلىقتايتىن, ۇمىتپايتىن سولاردىڭ بيىك رۋحىمەن رۋحتاناتىن ءور ءارى وركەندى ەل رەتىندە كورسەتىپ تۇرادى.
بەسىنشىدەن, بۇل مەتسەناتتاردى شەكارالىق زاستاۆالارعا كومەك كورسەتىپ, قامقورلىق جاساۋعا تارتۋعا جول اشادى. ويتكەنى شەكاراشىلار ءوز قىزمەتىنە قاجەتتىنىڭ بارلىعىمەن قامتاماسىز ەتىلگەنىمەن, شەكارالىق زاستاۆالاردىڭ كوبى كەڭەس زامانىندا تۇرعىزىلعان جانە ماتەريالدىق-تەحنيكالىق بازاسى توزا باستاعان.
مەن وسى ويىمدى ايتىپ, پرەمەر-ءمينيستردىڭ ورىنباسارى ەربولات دوساەۆقا دەپۋتاتتىق ساۋالمەن ۇسىنىس جاسادىم. وندا جانقوجا باتىرمەن قاتار قاراساي, بوگەنباي, قابانباي, ناۋرىزباي, ەر جانىبەك, رايىمبەك, ءجالاڭتوس ءباھادۇر جانە باسقا دا باتىرلارىمىزدىڭ ەسىمدەرىن ەلىمىزدىڭ ءار وڭىرىندەگى شەكارا زاستاۆالارىنا بەرۋ ماسەلەسىن قاراستىرىپ, ءتيىستى نۇسقاۋ بەرۋى سۇرالدى. مەنىڭ ويىمدى پرەمەر-ءمينيستردىڭ ورىنباسارى قولدار دەگەن ۇمىتتەمىن. ويتكەنى قازاقستاننىڭ ەجەلگى جانە كەيىنگى تاريحىنداعى ۇلى تۇلعالاردى ۇلىقتاۋ ۇلتتىق سانانى جاڭعىرتۋعا باعىتتالعان ماڭىزدى قادام ەكەنى انىق قوي. مەنىڭ ۇسىنىسىمدى ارىپتەستەرىم ن.ءابدىروۆ پەن ق.سۇلتانوۆ تا قولدادى.
باحىتبەك سماعۇل,
ءماجىلىس دەپۋتاتى
