بۇل جايىندا ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ءمالىم بولدى. جيىندا ەڭبەك, الەۋمەتتىك قورعاۋ جانە كوشى-قون كوميتەتىنىڭ توراعاسى اقمادي سارباسوۆ تەكسەرۋ كەزىندە ءمالىم بولعان زاڭ بۇزۋشىلىق ارەكەتتەرىن بولدىرماۋ ماقساتىمەن ەڭبەك ينسپەكتورلارى 4 746 نۇسقاۋلىق بەرگەنىن جانە 360,2 ملن تەڭگەگە 2 326 اكىمشىلىك ايىپپۇل سالىنعانىن جەتكىزدى.
ء«بىر تاۋلىكتە جۇمىس ۋاقىتىنان تىس جۇمىس ءار قىزمەتكەر ءۇشىن ەكى ساعاتتان اسپاۋى كەرەك. ال ءبىر ايعا شاققاندا ول 12 ساعاتتان اسپاۋى ءتيىس, جىلىنا – 120 ساعات. ەڭبەك زاڭىن بۇزعان ازاماتتار زاڭعا ساي جاۋاپكەرشىلىككە تارتىلاتىنىن ايتا كەتەيىن», دەدى كوميتەت توراعاسى. سپيكەردىڭ سوزىنشە, جۇمىس بەرۋشى جۇمىسكەرلەرىنە قاتىستى ەڭبەك شارتىن بۇزعان جاعدايدا ول ادامدار نەمەسە ولاردىڭ وكىلدەرى ەڭبەك ينسپەكتسياسىنا شاعىمدانا الادى. بەرىلگەن ارىز ارقىلى مەكەمە تەكسەرۋدەن وتكىزىلەدى. زاڭ بۇزۋشىلىق تىركەلسە, قازاقستان رەسپۋبليكاسىنىڭ زاڭناماسىنا ساي ءتيىستى شارالار قولدانىلادى.
قازاقستاندا ەڭبەك كۇنى 2013 جىلدان اتالىپ وتىلەتىنىن, 2014 جىلى مەملەكەت باسشىسىنىڭ تاپسىرماسىمەن «ەڭبەك ەرى» مەدالى تاعايىندالعانىن ەسكە سالعان اقمادي سارباسوۆ اتالعان ماراپات 40 جىلدان استام, ونىڭ ىشىندە ءبىر سالادا كەمىندە 10 جىل جۇمىس ءوتىلى بار, سونداي-اق ەڭبەك قىزمەتىندە جوعارى ناتيجەلەرگە قول جەتكىزگەن قىزمەتكەرلەر مەن زەينەتكەرلىك جاسقا جەتكەن ادامدارعا بەرىلەتىنىن ايتتى. «بۇگىن ءار سالادان ءبىر وكىل «ەڭبەك ەرى» اتاندى. قاتەلەسپەسەم, 9 ادام. بۇل ءار سالانىڭ, ءار مەملەكەتتىك ورگاننىڭ تاڭداۋى بولدى», دەگەن ول ەڭبەك ارداگەرلەرى دە ماراپاتتاۋدان شەت قالمايتىنىن جەتكىزدى.
اسحات رايقۇل,
«ەگەمەن قازاقستان»
