فيلمدەگى بوگدە پلانەتالىق باسقىنشىنىڭ ءبىرى
فيلمدەگى وزگە عالامشار يەلەرى اعىلشىن ءتىلدى رەسۋرستاردا Kyrgyz, ورىس ءتىلدى باسىلىمداردا «كيرگيز» دەپ اتالىپ, جازىلىپ جاتىر. ونداعى مالىمەتتەردە 10 قاراشادا جاپونيادا Brave Storm («وجەت داۋىل») اتتى پروكاتقا شىعاتىن فانتاستيكالىق فيلم سيۋجەتى ادامدار مەن «قىرعىز» اتتى بوگدە عالامشار تۇرعىندارى اراسىنداعى كۇرەس تۋرالى وربيتىندىگى ايتىلعان.
The Hollywood Reporter ءفيلمنىڭ كوپتەگەن باتىستىق بلوكباستەردى ەسكە سالاتىندىعىن ءارى جاپون پوپ-مادەنيەتىنىڭ ەلەمەنتتەرى كەزدەسەتىندىگىن ايتتى. پورتالدا جاريالانعان ماقالادا «2050 جىل. قىرعىز اتتى بوگدەعالامشار يەسى (kyrgyz) جەر تۇرعىندارىن جويىپ جىبەرەدى. سوڭعى ءتىرى قالعان بىرەۋى جاۋلاردىڭ روبوتىن قولعا ءتۇسىرىپ, سول ارقىلى قىرعىزدار ورناتقان اقىرزامانعا قارسى تەمىردەي اسكەر ساپىن جاساقتاۋ ءۇشىن وتكەنگە ساپار شەگەدى», - دەلىنگەن.
فەيسبۋك قولدانۋشىلارىنىڭ ءبىرى «قىرعىزداردىڭ ارقاشان ەرەكشە ادامدار ەكەنىن مەن بىلگەنمىن», دەپ پىكىر قالدىرسا, كەلەسى ءبىر قولدانۋشى «قىرعىزدار ازىلدەي الادى, ءبىز وزىمىزگە كۇلە الامىز» دەيدى. ەندى ءبىر ينتەرنەت قولدانۋشىسى «فيلمدەگى مونستردىڭ ادەپكى قىرعىز شەنەۋنىگىنەن ايىرماسى جوق», دەپ ەلدەگى اكىمشىلىك وكتەمدىككە نەگىزدەلگەن باسقارۋ جۇيەسىن مەڭزەپ, ازىلگە بالاعان. سونىمەن بىرگە كورشىلەس قازاقستاننىڭ مادەنيەتىن مازاققا اينالدىرعان «بورات» ءفيلمىن ەسكە تۇسىرگەن. الەۋمەتتىك جەلى قولدانۋشىلارى مەن كوپتەگەن اقپاراتتىق باسىلىمدار «قىرعىز» اتاۋىن يەلەنگەن بوگدە عالامشارلىقتار تۋرالى فيلم جارىققا شىقپاق دەپ جارىسا تالقىلاپ جاتقاندا, فيلم رەجيسسەرىنىڭ تۋيتتەردەگى مىنا جازباسى قىزۋ اڭگىمەنى سۋ سەپكەندەي ءوشىردى.
Someone misunderstood the spelling.
— 岡部 淳也 (@JunyaOkabe) October 27, 2017
RT @AyperiS: Kyrgyz citizens laugh off film's 'Kyrgyz' alien bad guys pic.twitter.com/TtylczwXvc
«كارتيناداعى باستى انتاگونيستەر Kyrgyz ەمەس, Killgis اتاۋىنا يە. ورفوگرافيانى دۇرىس تۇسىنبەگەندەر بار», دەپ حابارلادى فيلم رەجيسسەرى دجۋني وكابە ءوزىنىڭ تۋيتتەر پاراقشاسىندا. ونىڭ ايتۋىنشا, Killgis اتاۋى 1971 جىلعى بالالارعا ارنالعان باعدارلاما اۆتورلارى قۇرعان وزگە پلانەتالىق كەيىپكەردىڭ اتاۋى.
The alien, KILLGIS, who appeared in the 1971 broadcasting child program "Silver mask" is a coined word made by the original creator. https://t.co/8vxLjMgwj0
— 岡部 淳也 (@JunyaOkabe) October 27, 2017
«キルギス» جازىلاتىن Killgis بەن Kyrgyz سوزدەرى جاپونشا – كيرگيسۋ دەپ دىبىستالادى. دۇرىسىندا بوگدە عالامشارلىقتاردى Kyrgyz ەمەس, Killgis دەپ اتاعان», دەپ جازادى Kloop.kg رەداكتسياسى.
Brave Storm ءفيلمى ۋاقىتقا ساپار شەگۋ, قورشاعان ورتانى جالماۋ, وزگە عالامشار يەلەرىنىڭ باسىپ كىرۋ سياقتى عىلىمي-فانتاستيكا جانرىنىڭ بارلىق ەلەمەنتىن جيناقتاعان. فيلمدەگى ءبىر ساتتە جاۋ شەبىندەگى بارلاۋشى ولار باسىپ الماعان كۇندە دە, جەردەگى زورلىق-زومبىلىقتىڭ كەسىرەن كۇندەردىڭ كۇنىندە ادامدار وزدەرىنىڭ تۇبىنە جەتەتىندىگى ايتىلىپ قالادى.
فيلم رەجيسسەرى دجۋني وكابە, بۇل – رەجيسەردىڭ دەبيۋتتىك جۇمىسى. فيلمگە جاپوندىق تانىمال جۇلدىزدار – حيساشي يوشيزاۆا, سيۋنسۋكە دايتو, تيحيرو ياماموتو, شۋ ۆاتانابە, يۋكي ماتسۋزاكي تۇسكەن. كارتينا بيۋدجەتى 20 ملن اقش دوللارى, ۇزاقتىعى – 84 مينۋت.
ايا ءومىرتاي,
«ەگەمەن قازاقستان»
