كۋرچاتوۆ قالاسىندا «لاتىن ءالىپبيى - بولاشاقتىڭ باعدارى» اتتى دوڭگەلەك ۇستەل دە ۇيىمداستىرىلدى. دوڭگەلەك ۇستەلگە قالالىق ىشكى ساياسات ءبولىمىنىڭ ماماندارى, قالا مەكتەپتەرىنىڭ قازاق ءتىلى مەن ادەبيەت ءپانىنىڭ مۇعالىمدەرى, «دوستىق ءۇيىنىڭ» قىزمەتكەرلەرى, كىتاپحاناشىلار جانە مەكتەپ وقۋشىلارى قاتىسىپ, لاتىن ءالىپبيىنىڭ قازاق ءتىلىن دامىتۋداعى ماڭىزدىلىعى, وزەكتىلىگى جايلى جان-جاقتى تالقىلاعان.
-وسى لاتىن تىلىندەگى قور جيناعىمەن شىعىس قازاقستان وبلىسىنداعى تاعى ءبىراز جەرلەردى ارالاماقپىز,-دەدى اباي اتىنداعى وبلىستىق كىتاپحانا ديرەكتورىنىڭ ورىنباسارى گۇلميرا ايازباەۆا, - ءبىزدىڭ قوردا 200-گە جۋىق سيرەك باسىلىم ساقتاۋلى تۇر. وسكەمەن قالاسىنداعى ا. س. پۋشكين اتىنداعى شىعىس قازاقستان وبلىستىق كىتاپحاناسىنا بارعانىمىزدا, ول جەرگە شقمتۋ ستۋدەنتتەرى مەن وسكەمەن قالاسىنىڭ جۋرناليستەرى جينالدى. ەلباسى ن.نازارباەۆتىڭ «بولاشاققا باعدار: رۋحاني جاڭعىرۋ» ماقالاسى اياسىندا ۇيىمداستىرىلعان رەترو-كورمەدە قوعامدىق-ساياسي, حالىق اعارتۋ ءىسى, ءتىل ءبىلىمى, جاراتىلىستانۋ, دەنساۋلىق ساقتاۋ, اۋىلشارۋاشىلىق, ادەبيەتتانۋ, تاريح عىلىمدارى, كوركەم ادەبيەت عىلىم سالالارى, تاتار تىلىندەگى كىتاپتار مەن مەرزىمدى باسىلىمداردى تاماشالاعان وسكەمەندىكتەر بىزگە ەرەكشە تاڭ قالا باس شايقادى. ماسەلەن, ءا.ەرمەكوۆتىڭ « ۇلى ماتەماتيكا كۋرسى» (1935ج.), ا.مامىت ۇلىنىڭ «دەنساۋلىق جولىندا» (1935 ج.), ت.شونان ۇلىنىڭ «ورىستارعا قازاق ءتىلىن ۇيرەتكىش» (1931ج.), تاڭقىباي ء(ى.جانسۇگىروۆ) «قۇق: ساتيرالىق اڭگىمەلەر جيناعى» (1935 ج.) سياقتى جۇزدەگەن باسىلىمدار لاتىن تىلىندە. ەڭ قۇندى قازىنامىز «اباي» شىعارمالارىنىڭ سول جىلدارداعى لاتىن ارپىندەگى نۇسقاسى دەي الامىن.
راۋشان نۇعمانبەك,
«ەگەمەن قازاقستان»
سەمەي
