شارا جىل سايىن «باۋىرجان» قايىرىمدىلىق قورىنىڭ باستاماسىمەن, «نۇر وتان» پارتياسى, «التىن قىران» كومپانيالار توبى, «پەتروقازاقستان» اق, الماتى قالاسى اكىمدىگىنىڭ قولداۋىمەن جۇزەگە اسىپ كەلەدى. «التىن جۇرەك» ۇلتتىق سىيلىعىنىڭ ۇيىمداستىرۋشىلارى وسىمەن 11 جىل قاتارىنان ەلىمىزدەگى جانى جومارت ناعىز مەيىربان جانداردى ىزدەپ تاۋىپ, قايىرىمدىلىق قاسيەتىن بويىنا سىڭىرگەن التىن جۇرەك ازاماتتاردى ماراپاتتاۋدى داستۇرگە اينالدىرعان. ياعني بەلگىلەنگەن 11 اتالىم بويىنشا قوعامنىڭ ءار سالاسىندا ەڭبەك ەتەتىن سىيلىققا ۇسىنىلعان ازاماتتار مەن ۇزدىك ۇيىمدار مەن مەكەمەلەردىڭ ىشىنەن «التىن جۇرەك» سىيلىعىنا لايىق ءبىر ازامات نەمەسە ۇيىم انىقتالۋعا ءتيىس.
ەڭ باستىسى, ءار ۇمىتكەر ۇلتتىق سىيلىققا ۇسىنىلعانى جايلى حابارسىز. سىيلىق تالاپتارىنا ساي اتىمتاي جومارت جاندار مەن قايىرىمدىلىق جاساعان مەكەمەلەردى يگى ىستەرىنە كۋا بولعان جاندار ۇسىنا الادى. ۇيىمداستىرۋشىلاردىڭ مالىمەتىنشە, بيىل «التىن جۇرەك» سىيلىعىنا 455 ءوتىنىش كەلىپ تۇسكەن. ۇمىتكەرلەردىڭ قاتارىندا ەسىمى ەلگە بەلگىلى ازاماتتار مەن قاتار اياداي اۋىلدا ءجۇرىپ ۇلكەن ءىس تىندىرعان قاراپايىم جاندار دا بار.
اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنا جينالعان الماتىلىقتار مەن قالا قوناقتارى «التىن جۇرەك» سىيلىعىنىڭ ناعىز يەگەرلەرىن كوزبەن كورۋگە اسىقتى. الماتى قالاسىنىڭ اكىمى باۋىرجان بايبەك قوعامدى ىزگىلىككە شاقىراتىن ايتۋلى شارانىڭ ەل ومىرىندەگى ماڭىزىنا توقتالا كەلىپ, بيىلعى جوبا ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىنىڭ اياسىندا جۇزەگە اسىپ وتىرعانىن تىلگە تيەك ەتتى.
– التىن جۇرەك» ۇلتتىق سىيلىعى مىڭداعان جۇرەكتەرگە مەيىرىمنىڭ نۇرىن قۇياتىن, قايىرىمدى ازاماتتاردى ءبىر ارنادان توعىستىراتىن ۇلكەن الاڭعا اينالىپ كەلەدى. جىل وتكەن سايىن جوبانىڭ اۋقىمى كەڭەيىپ كوپتەگەن جاقسىلىقتارعا جول اشىلۋدا. بۇل ءوز كەزەگىندە, تاۋەلسىز وتانىمىزدىڭ گۇلدەنىپ, قارىشتاپ دامۋىنا ايتارلىقتاي ۇلەس قوساتىن جوبا دەپ تۇسىنەم. اينالاعا قامقورلىق جاساۋ, قىسىلعانعا قولداۋ تانىتۋ ەجەلدەن ءبىزدىڭ قانىمىزدا بار قاستەرلى قاسيەت. وسىدان اجىراپ قالماۋىمىز كەرەك. مۇنداي قايىرىمدىلىق شارالار ەلىمىزدىڭ جان-جاقتى دامىپ, حالىقتىڭ ءال-اۋقاتىنىڭ كوتەرىلۋىنە مول سەپتىگىن تيگىزەدى – دەيدى باۋىرجان بايبەك.
كونكۋرس ناتيجەسىنە سايكەس ءوزىنىڭ 13 پەرزەنتىنە قوسا 12 جەتىم بالانى باۋىرىنا باسىپ انالىق قامقورلىق تانىتىپ وتىرعان ەكىباستۇز قالاسىنىڭ تۇرعىنى ەكاتەرينا ياتسەنكو, «جەتىم بالالارعا كورسەتكەن قامقورلىعى ءۇشىن» اتالىمى بويىنشا «التىن جۇرەك» يەگەرى اتانسا, جاس ۇرپاقتىڭ بولاشاعى ءۇشىن 216 بالاعا ارنالعان زامانعا ساي سپورتتىق ويىن زالى بار №125 بالاباقشانى سالىپ الماتى قالاسىنىڭ مەنشىگىنە بەرگەن مۇرات ءادىلحانوۆ ء«بىلىمدى دامىتۋعا قوسقان ۇلەسى ءۇشىن» اتالىمىندا وسى سىيلىقتىڭ يەگەرى بولدى. «مۇگەدەك جاندارعا كورسەتكەن قامقورلىعى ءۇشىن» اتالىمىندا «التىن جۇرەك» سىيلىعى ءوزىنىڭ مۇمكىندىگى شەكتەۋلى بولا تۇرا بتسپ مەن ناۋقاستانعان مۇگەدەك جاندارعا كومەك رەتىندە ارنايى ۆەرتيكاليزاتورلىق- تەحنيكالىق قۇرىلعىنى ويلاپ تاپقان ورالدىق ءبىرجان قوجاقوۆتىڭ ەنشىسىنە بۇيىردى. ءوزىنىڭ شاعىن كاسىبىن دوڭگەلەتىپ مۇمكىندىگى شەكتەۋلى 15 ازاماتتى جۇمىسپەن قامتىپ وتىرعان ءبىرجاننىڭ ەرلىگى ءدۇيىم جۇرتتى ءتانتى ەتتى. «سپورتتى دامىتىپ, ونى قولداعانى ءۇشىن» اتالىمىندا كوپشىلىككە بەلگىلى «الماتى مارافون» سپورتتىق ءىس-شاراسىنا, «ارداگەرلەرگە كورسەتكەن قۇرمەتى ءۇشىن» ەلىمىزدە العاش رەت زەينەتكەرلەرگە ارنالعان «تەگىن تاماقتانۋ» جوباسىنىڭ نەگىزىن سالۋشى راسيما تەمىرباەۆاعا, «جىل مەتسەناتى» اتالىمىندا جانى جومارت ازامات سەرگەي سپيتسىنگە, «اقپاراتتىق قولداۋشى» اتالىمىندا كاسىبي مەرەكەگە وراي ەلباسى تاراپىنان وزىنە بەرىلگەن 3 ملن تەڭگە كولەمىندەگى قارجىلاي سىيلىعىن سىرقات بالالاردىڭ ەم-دومىنا جۇمساۋدى ءجون كورگەن «حابار» اگەنتتىگىنىڭ نيۋ-يورك قالاسىنداعى ارنايى ءتىلشىسى مايرا ابدىراحمانوۆاعا «التىن جۇرەك» ۇلتتىق سىيلىعى تابىستالدى.
اۋىل تۇرعىندارىنا ءۇي ءبولىپ بەرىپ تۋعان اۋىلىن قۇرىلىس الاڭىنا اينالدىرعان الماتى وبلىسىنىڭ تۇرعىنى تەمىرلان ءشاينۇسىپوۆ «جىلدىڭ قايىرىمدى ادامى» دەپ تانىلسا, «جىل ۇيىمى» اتالىمىندا «كاسپي Bank» ۇجىمى ۇزدىك دەپ تانىلدى. «دەنساۋلىق ساقتاۋ سالاسىنا قولداۋ كورسەتكەنى ءۇشىن» مەديتسينا سالاسىنا ۇزدىكسىز قامقورلىق جاساپ كەلە جاتقان «28 پەتەل» كلۋبى, سونداي-اق, «قازاقستاننىڭ وركەندەۋىنە قوسقان ۇلەسى ءۇشىن» اتالىمىندا ۆيكتوريا شاربون مەن ەليزابەت تۋرنوك «التىن جۇرەك» سىيلىعىمەن ماراپاتتالدى. ەسكە سالساق, بۇل امەريكاندىق قوس ازاماتشا ەلىمىزگە ەرىكتىلەر ساپىندا كەلىپ تاراز قالاسىنداعى «قامقور جۇرەك» قوعامدىق قورىن قۇرىپ جالعىزباستى انالار مەن بالالارعا كوپ كومەك كورسەتىپ كەلەدى. «جوعارىدا اتالعان بارلىق اتالىمدار بويىنشا «التىن جۇرەك» سىيلىعىن يەلەنگەن ازاماتتاردىڭ ءاربىرى قايىرىمدىلىق قاسيەتتى بويىنا سىڭىرگەن جاندار» دەيدى شارانى ۇيىمداستىرۋشىلار.
سالتاناتتى كەشتە ەلىمىزدىڭ ەڭبەك سىڭىرگەن قايراتكەرلەرى نۇرعالي ءنۇسىپجان, ناعيما ەسقاليەۆا, تانىمال ونەر جۇلدىزدارى جاميلا سەركەباەۆا, باعلان ءابدىرايىموۆ, ارمان قوڭىرباەۆ, اشا ماتاي سونداي-اق « ۇلىتاۋ», «الاش ۇلى», «مەلومەن», توپتارى جيىلعان كوپشىلىكتى انىمەن تەربەدى.
ءابۋ ناسىر ءال-ءفارابيدىڭ ءبىر سوزىندە ايتىلعانداي, «ادامنىڭ اۋەلدەن توقىماشى نەمەسە حاتشى بولىپ تۋمايتىنى سياقتى, قايىرىمدىلىق پەن جامان قىلىق تا ادامعا اۋەل باستان جاراتىلىسىنان دارىمايدى». ىزگىلىكپەن يماندىلىقتى كورىپ وسكەن ادام عانا وزگەنىڭ قۋانىشىنا وزىنىكىنەن ارتىق قۋانىپ, قىسىلعانعا قولداۋ تانىتادى. قولىمىزعا تۇسكەن مالىمەت بويىنشا سوڭعى ءبىر جىلعا جۋىق ۋاقىت ىشىندە ەل اۋماعى بويىنشا 29,4 ميلليارد تەڭگە كولەمىندە قايىرىمدىلىق كومەك كورسەتىلگەن. دەمەۋشىلەردىڭ كومەگىنىڭ ارقاسىندا 33 كومپيۋتەرلىك سىنىپتار مەن 8 اۋرۋحانا جابدىقتالعان. جاعدايى تومەن وتباسىنان شىققان 800-گە تارتا ءجاسوسپىرىم مەكتەپكە قاجەتتى قۇرالدارمەن قامتىلعان. ۇلى وتان سوعىسىنىڭ 26 ارداگەرىنىڭ ۇيلەرىنە جوندەۋ جۇمىسى جۇرگىزىلىپ, 500 تىل ارداگەرى مەن سوعىس ارداگەرىنە قارجىلاي قولداۋ كورسەتىلگەن. 16 سپورت مەكتەپتەرى, 29 بالا-باقشا, 23 جالپى ءبىلىم بەرەتىن مەكتەپكە جوندەۋ جۇمىستارى جۇرگىزىلگەن. مۇگەدەك بالالارعا ارنالعان مامانداندىرىلعان 3 بالا-باقشا سالىنىپ, 10 مىڭنان استام جەتىم بالالار جازعى دەمالىستارىندا ءتۇرلى دەمالىس لاگەرلەرىنە بارۋعا جولداما العان.
وسىنداي ساۋاپتى ىستەردىڭ اينالاسىندا جۇرگەن ءاربىر جان قوعامعا ۇلگى بولارلىق دارا تۇلعالار. ويتكەنى, جاقسىلىق جاساۋدان ادام كەدەيلەنبەيدى, كەمەلدەنەدى.
ارمان وكتيابر,
«ەگەمەن قازاقستان»
الماتى
