ولاردىڭ اراسىندا وسماناكۋن يبرايىموۆ سىندى ءسوزى سالماقتى مەملەكەت جانە قوعام قايراتكەرلەرى دە بار ەكەنىن جازعان بولاتىنبىز. وتكەن جۇما كۇنى قىرعىزستاننىڭ تاعى ءبىر ەكس-مەملەكەتتىك حاتشىسى, ء«بۇتىن قىرعىزستان» پارتياسىنىڭ باسشىسى اداحان مادۋماروۆ تا باۋىرلاس قازاق پەن قىرعىزدىڭ قارىم-قاتىناسىن ەشكىمنىڭ ءسوزى بۇزا المايتىنىن ايتىپ, ەلباسى نۇرسۇلتان نازارباەۆقا ءوز ءوتىنىشىن ءبىلدىردى. ونىڭ بۇل مالىمدەمەسى «Youtube.com» بەينە-پورتالى ارقىلى جاريالاندى.
«مەن مۇمكىندىكتى پايدالانىپ, قازاق ەلىنە, ەلباسىنا, ءبۇتىن تۇرىك دۇنيەسىنىڭ اقساقالى اتانعان نۇرسۇلتان ءابىش ۇلىنا ءوتىنىش بىلدىرەمىن. ءاردايىم قىرعىز-قازاق قارىم-قاتىناسىن اسىلداي ارداقتاپ, ماۋەلى مامىلە جاساپ كەلدىڭىز. سونىڭ ءبارى ءبىر كىسىنىڭ كەساپاتىنان ءبۇتىن جۇرتقا زياندى بولماسا ەكەن دەگىم كەلەدى. ايتقان كىسىنىڭ ءسوزى مەن ءوزى كەتە بەرسىنشى, بىراق قالقايعان قالىڭ جۇرت زيان شەكپەسە ەكەن», دەگەن ا.مادۋماروۆ وسى مالىمدەمەسىندە ەلباسىنىڭ «قىرعىزعا مەندەي كۇيەتىن ازامات مەنەن كەيىن كەلە مە, كەلمەي مە, بىلمەيمىن» دەگەن ءسوزىن ەسكە الىپ, نۇرسۇلتان ءابىش ۇلىنىڭ اسقان سابىرلىق تانىتىپ وتىرعانىنا ايرىقشا ريزاشىلىعىن بىلدىرەدى.
سونداي-اق «سالقىن تارتىپ بارا جاتقان ەكى ەلدىڭ اراسىنداعى قارىم-قاتىناستى قايتا ءبىر پىسىقتاپ قويساڭىز» دەگەن ءوتىنىشىن جەتكىزەدى. «مەن رەسمي تۇردە وسىلاي قازاق بيلىگىنە ءوتىنىش بىلدىرەمىن. قۇداي بۇيىرسا, بۇل كۇندەر وتەدى. ءبىزدىڭ ارامىزدى ەشكىم اجىراتا العان ەمەس. جاراتقان اللا عانا اجىراتپاسا, قىرعىز بەن قازاقتى ەشكىم اجىراتا المايدى. اجىراتامىز دەگەندەردىڭ پەيىلى تاسقا ۇرىلسىن», دەيدى ا.مادۋماروۆ.
