وندا بىلاي دەلىنگەن :
«مەن مۇمكىندىكتى پايدالانىپ, قازاق ەلىنە, ەلباسى, ءبۇتىن تۇرىك دۇنيەسىنىڭ اقساقالى اتانعان نۇرسۇلتان ءابىش ۇلىنا ءوتىنىش بىلدىرەمىن.
قۇرمەتتى, نۇرسۇلتان ءابىش ۇلى!
ءاردايىم قىرعىز-قازاق مامىلەلەرىن اسىلداي ارداقتاپ ماپەلى مامىلە جاساپ كەلدىڭىز. سونىڭ ءبارى ءبىر كىسىنىڭ كەساپاتىنان ءبۇتىن جۇرتقا زياندى بولماسا ەكەن دەگىم كەلەدى. ايتقان كىسىنىڭ ءسوزى مەن ءوزى كەتە بەرسىنشى, بىراق قالقايعان قالىڭ جۇرت ءبىر زيان شەكپەسە ەكەن. مەن كەشە مىناۋ شەكارادا تۇرعان ديحانداردى كوردىم, جۇرەگى بار كىسىنىڭ كوزىنەن جاس شىقپاي قويمايدى, قانشاما كوپ داقىل ەككەندەر بار, نەبىر قيىنشىلىقپەن سولاردى ءوسىردى, وسى جاققا شىعىپ تىرلىك قىلساق دەگەن ماقساتپەن قانشاما قيىندىقتاردى كورە ءجۇرىپ, قولىنداعىنى بالالارىنىڭ اۋزىنان جىرىپ سوعان سالدى. قانشالاعان ءجۇزىم ەككەندەر وتىر, باسقالار دا وتىر. التى اي جازدا جەر تىرمالاپ تاپقاندارىنان پايدا كورەر مەزگىلدە ونىڭ ءبارىن تاستاندىعا اينالدىرۋعا سول كەراۋىزدىق كەساپات بولىپ قالدى.
ءبىر ايتۋمەن توقتاپ قالماستان ەكرانعا شىققان سايىن قايتا-قايتا ۇستەمەلەدى. تاعى دا ستۋدەنتتەردى جيناپ الىپ 86-ىنشى جىلدى ەسكە سالىپ, باسقالارىن ەسكە سالىپ... ول ستۋدەنتتەرگە ايتاتىن ءسوز ەمەس. ول ويىنشىق ەمەس. بۇل وتە اۋىر ماسەلە. ءيا, مەن تەرەڭ تۇسىنەم... ءبارىبىر نۇرسۇلتان ءابىش ۇلىنىڭ «قىرعىزعا مەندەي كۇيىنگەن ازامات مەنەن كەيىن كەلە مە, كەلمەي مە, بىلمەيمىن» دەگەن ءسوزى بار. سوندىقتان ءسىز ءوزىڭىز تۇرعاندا قازىر سالقىن تارتىپ بارا جاتقان ەكى ەلدىڭ اراسىنداعى مامىلەنى قايتا ءبىر پىسىقتاپ قويساڭىز دەگىم كەلەدى. ءجۇز مىڭداعان ءبىزدىڭ ديحانداردىڭ ەڭبەگى تەككە كەتپەسە ەكەن دەپ ايتقىم كەلەدى. ءجۇز مىڭداعان جاس, سارىاۋىز بالاپاندار ريزىقتارىنان اجىراماسا ەكەن دەپ ايتقىم كەلەدى. مەن رەسمي تۇردە وسىلاي قازاق بيلىگىنە ءوتىنىش بىلدىرەمىن. قۇداي بۇيىرسا, بۇل كۇندەر وتەدى.
ءبىزدىڭ ارامىزدى ەشكىم اجىراتا العان ەمەس. جاراتقان اللا عانا اجىراتپاسا قىرعىز بەن قازاقتى ەشكىم اجىراتا المايدى. اجىراتامىز دەگەندەردىڭ پەيىلى تاسقا ۇرىلسىن. تاعى دا ءبىز «پاتشا بولۋى ءۇشىن ءپىلدىڭ تەرىسىندەي تەرى كەرەك» دەپ نۇرسۇلتان ءابىش ۇلى ايتقانداي باسا ايتۋىمىز كەرەك. ول كىسىدە شىندىعىندا ءپىلدىڭ تەرىسىندەي تەرى بار ەكەن. سونشالىق سابىرلىلىقپەن مامىلە جاسالىپ جاتقانىنا مەن ريزاشىلىعىمدى بىلدىرەمىن. ايتپەسە, قۇداي ساقتاسىن, جامان سوزدەر وتە كوپ ايتىلدى».
