اۋەلى وكتيابردىڭ 50 جىلدىعى اتىنداعى جامبىل پەداگوگيكالىق ينستيتۋتى بولىپ قۇرىلعان وقۋ ورنى سول جىلداردان بەرى ءبىلىم بەرۋ ءىسىنىڭ ءتۇرلى ساتىلارىنان ءوتتى. ستۋدەنتتەرىنىڭ وقۋ ۇدەرىسىن, تۇرمىس-تىرشىلىگى مەن بوس ۋاقىتىن ءتيىمدى پايدالانۋ جاعدايىندا ينفراقۇرىلىمى دامىعان جوعارى وقۋ ورنى بۇگىندە ەلىمىزگە تانىمال عىلىم مەن ءبىلىم ورداسى. ينستيتۋتتى ءار جىلدارى مۇحتارباي وتەلباەۆ, ءۋاليحان بيشىمباەۆ, ءابدىماناپ بەكتۇرعانوۆ, ماحمەتعالي سارىبەكوۆ سياقتى تانىمال عالىمدار مەن بىلىكتى ۇستازدار باسقارىپ, وقۋ ورداسىنىڭ دامۋىنا, قالىپتاسۋىنا ىقپال ەتتى.
تاراز مەملەكەتتىك پەداگوگيكالىق ينستيتۋتىنىڭ جارتى عاسىرلىق مەرەيتويى اۋليەاتا تورىندە كەڭىنەن اتالىپ ءوتتى. ايتۋلى شاراعا ەلىمىزگە بەلگىلى تۇلعالار مەن كورنەكتى عالىمدار قاتىستى. اۋەلى ينستيتۋت جانىنان اشىلعان «بالاساعۇن» مۋزەيىنىڭ اشىلۋ سالتاناتى بولدى. اتالعان مۋزەيدىڭ لەنتاسىن فيزيكا-ماتەماتيكا عىلىمدارىنىڭ دوكتورى, پروفەسسور مۇحتارباي وتەلباەۆ پەن قازاقستاننىڭ ەڭبەك ەرى اياگۇل ميرازوۆا سالتاناتتى تۇردە قيىپ بولعان سوڭ, كەلگەن قوناقتار مۋزەي ىشىندەگى جادىگەرلەرمەن تانىستى. مۋزەي كىرەبەرىسىندە جاستار ءۇشىن تاعىلىم رەتىندە ءجۇسىپ بالاساعۇننىڭ ءومىربايانى جانە دانالىق سوزدەرى جازىلعان. سونىمەن قاتار, ينستيتۋت تاريحىنان سىر شەرتەتىن سۋرەتتەر مەن وقۋ ورداسىنىڭ تاريحىنا قاتىستى قۇجاتتار دا مۋزەيدىڭ قۇندى قازىنالارىنىڭ بىرىنەن سانالادى. ينستيتۋت رەكتورى داريا قوجامجاروۆا قۇرمەتتى قوناقتاردى مۋزەي عيماراتىمەن تانىستىرۋ بارىسىندا اتالعان ورىننىڭ جاستار ءۇشىن اشىلعانىن, بولاشاق عالىمدار ءۇشىن جاساقتالعانىن ايتىپ ءوتتى. بۇدان كەيىن كەلگەن قوناقتار ينستيتۋت ىشىندەگى قازاقستان رەسپۋبليكاسى تۇڭعىش پرەزيدەنتى اتىنداعى ءماجىلىس زالىن ارالاپ كوردى. سونداي-اق, قازاقستان رەسپۋبليكاسى مەملەكەتتىك سىيلىعىنىڭ يەگەرى, ابايتانۋشى عالىم مەكەمتاس مىرزاحمەت ۇلىنىڭ, ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆتىڭ, ماتەماتيك مۇحتارباي وتەلباەۆتىڭ جانە وزگە دە تانىمال ازاماتتاردىڭ قاتىسۋىمەن ينستيتۋت اۋلاسىنان رەكتورلار اللەياسى اشىلىپ, «بولاشاققا حات» كاپسۋلاسىن مەموريالدى تاقتايشانىڭ استىنا بەكىتۋ ءراسىمى وتكىزىلدى.
بۇدان كەيىن «بالاساعۇن» ورتالىق كونتسەرت زالىندا «زاماناۋي ءبىلىم بەرۋ تەندەنتسيالارى: بولاشاققا كوزقاراس» تاقىرىبىندا حالىقارالىق عىلىمي كونگرەسى ۇيىمداستىرىلدى. حالىقارالىق عىلىمي كونگرەسكە قازاقستان رەسپۋبليكاسىنىڭ ءبىلىم جانە عىلىم ءمينيسترى ەرلان ساعاديەۆ ارنايى قاتىسىپ, تاراز مەملەكەتتىك پەداگوگيكالىق ينستيتۋتىنىڭ ۇجىمىن جارتى عاسىرلىق مەرەيتويىمەن قۇتتىقتادى. سونداي-اق, جامبىل وبلىسىنىڭ اكىمى كارىم كوكىرەكباەۆ ينستيتۋت ۇجىمىن قۇتتىقتاي كەلە, كونە تاراز شاھارىنداعى ايتۋلى جوعارى وقۋ ورنىنىڭ جەتىستىكتەرىنە توقتالدى. سونىمەن قاتار, شەت ەلدەردەن كەلگەن پروفەسسورلار دا بايانداما جاساپ, ءوزارا تاجىريبە الماسۋ جاعدايىندا پىكىر ءبولىستى. كونگرەسس سوڭىندا ينستيتۋت تۇلەكتەرىنىڭ «ۇرپاقتار ساباقتاستىعى» اتتى سلەتى جانە جۇلدىزدى تۇلەكتەردىڭ قاتىسۋىمەن گالا-كونتسەرت ءوتتى.
جالپى, ينستيتۋتتىڭ ءوسىپ-وركەندەۋىندە, عىلىم جولىندا كەڭ قانات جايۋىندا ۇستازداردىڭ الاتىن ورىنى ەرەكشە. مەرەيتوي قارساڭىندا بىرقاتار ۇزدىك قىزمەتكەرلەر «قۇرمەت» وردەنىمەن, «ى.التىنسارين», «قر ءبىلىم بەرۋ ءىسىنىڭ قۇرمەتتى قىزمەتكەرى», «قر عىلىمي دامۋىنا سىڭىرگەن ەڭبەگى ءۇشىن» توسبەلگىسىمەن جانە جامبىل وبلىسى جانە تاراز قالاسى اكىمدەرىنىڭ قۇرمەت گراموتاسى, العىس حاتىمەن, وبلىستىق جانە قالالىق ءماسليحاتتىڭ قۇرمەت گراموتاسىمەن, «نۇر وتان» پارتياسى وبلىستىق فيليالىنىڭ قۇرمەت گراموتاسىمەن جانە وبلىستىق كاسىپوداق ۇيىمىنىڭ گراموتاسىمەن ماراپاتتالدى.
سونىمەن قاتار, اتاقتى عالىمدار مەن ۇستازدار بارلىق فاكۋلتەتتەردە «رۋحاني جاڭعىرۋ: ۇلتتىق كود», «رۋحاني جاڭعىرۋ: ءححى عاسىر ۇستازىنىڭ كەلبەتى», «رۋحاني جاڭعىرۋ: لاتىن الىپبيىنە كوشۋدىڭ تاريحي تاعىلىمدارى, جاڭا بەلەستەرى» جانە ء«بىلىم بەرۋدىڭ قازاقستانداعى ترەندى» تاقىرىپتارىندا ماستەر-كلاسس وتكىزىپ, جاستارعا عىلىم مەن ءبىلىمنىڭ جاڭاشا كەلبەتىن ءتۇسىندىردى.
حاميت ەسامان,
«ەگەمەن قازاقستان»
جامبىل وبلىسى
