اشىق ەسىك كۇنىنە «ەگەمەن قازاقستان», «كازاحستانسكايا پراۆدا», «ايقىن», «ليتەر», «قازاق سپورتى» گازەتتەرى, «قازاق گازەتتەرى» جشس قاتىستى. اشىلۋ سالتاناتىندا ءسوز العان «قازپوشتا» اق-تىڭ استانا قالاسىنداعى فيليالىنىڭ ديرەكتورى گۇلميرا ايتبەكقىزى جينالعان قاۋىمدى حالىقارالىق بايلانىس كۇنىمەن قۇتتىقتادى. ء«بىزدىڭ اشىق ەسىك كۇنىن وتكىزۋ تۋرالى ۇسىنىسىمىزدى قابىل العان بارشا باسپاگەرلەرگە العىس بىلدىرەمىن. بۇل شارا وقىرمان مەن گازەتتەردى جاقىنداستىرۋعا سەپ بولادى دەگەن ويدامىن», دەدى ول.
ال ديرەكتوردىڭ ورىنباسارى باعدات ورازباي ۇلى ءباسپاسوز «حالىقتىڭ قۇلاعى, كوزى ءھام ءتىلى» ەكەنىن ەسكە الدى. ء«بىزدىڭ باستى ماقساتىمىز – ءباسپاسوزدى وقىرماندارىمەن تەز ارادا قاۋىشتىرۋ. بۇگىن شىققان گازەتتى وقىرمانىنا سول كۇنى قاۋىشتىرۋ وڭاي ەمەس. بىراق قازاقستاننىڭ تۇكپىر-تۇكپىرىندەگى اۋىلدار مەن كەز-كەلگەن وڭىردەگى جازىلۋشىلار ءباسپاسوز ءونىمىن دەر كەزىندە قولىنا الۋى ءۇشىن ءبىزدىڭ تاراپىمىزدان قاجەتتى جۇمىستار اتقارىلۋدا», دەيدى باعدات ورازباي ۇلى.
«ەگەمەن قازاقستان» گازەتىنىڭ اتىنان ءسوز العان رۋحانيات ءبولىمىنىڭ باسشىسى تالعان باتىرحان قازپوشتا قىزمەتكەرلەرىن ايتۋلى مەرەكەمەن قۇتتىقتاپ, گازەتتى وقىرماندارعا دەر كەزىندە جەتكىزەتىندەرى ءۇشىن العىس ايتتى. ال اقىن, رۋحانيات ءبولىمىنىڭ شولۋشىسى قورعانبەك امانجول «ەگەمەن» تۋرالى ولەڭ وقىپ, جۇرشىلىق ىقىلاسىنا بولەندى.
اشىق ەسىك كۇنى بارىسىندا وقىرماندارعا گازەتكە جەڭىلدىكپەن جازىلۋ مۇمكىندىگى ۇسىنىلدى. العاشقىلاردىڭ ءبىرى بولىپ «ەگەمەن قازاقستانعا» جازىلعان امانتاي كاكەن 1964 جىلدان بەرى ەلدىڭ باس باسىلىمىنا ۇزبەي جازىلىپ كەلە جاتقانىن, ارا-تۇرا سۇيىكتى گازەتىنە اۆتور رەتىندە دە اتسالىساتىنىن قۋانا جەتكىزدى.
