كەزدەسۋ بارىسىندا ەلباسىنىڭ «رۋحاني جاڭعىرۋ» باعدارلاماسى, لاتىن قارپىنە كوشۋ ماسەلەسى توڭىرەگىندە اسەرلى اڭگىمە ءوربىدى. بولاشاق جۋرناليستەر باسقارما توراعاسىنا وزدەرىن تولعاندىرعان ساۋالدارىن قويدى. اسىرەسە ولار «ەگەمەن قازاقستان» گازەتىنىڭ وقىرمان تارتۋداعى ەرەكشەلىگىنە, باسىلىم مازمۇنى مەن شىعۋ فورماتىنا قىزىعۋشىلىق تانىتتى.
د.قىدىرالى بۇگىندە ەلىمىزدىڭ باس باسىلىمىنىڭ اتاۋى جاڭاشا جازىلىپ, رەبرەندينگ جۇرگىزىلىپ, D2 ەۋرو فورماتىندا شىعارىلىپ جاتقانىنا, گازەتتىڭ فورماتى عانا ەمەس, مازمۇنى دا وزگەرىپ, وقىرمان تالابىن قاناعاتتاندىرۋ ماقساتىندا ارنايى جوبالار قولعا الىنىپ, ءتالىم, ءبىلىم, تانىم سەكىلدى ارنايى بەتتەر جارىق كورە باستاعانىنا توقتالدى. ماتەريالداردىڭ كولەمى دە قىسقارىپ, ساپا مەن مازمۇنعا كوبىرەك كوڭىل بولىنەتىنىن ايتتى.
«قازىر الەمدەگى بەلدى باسىلىمداردىڭ وقىرماندارى ازايىپ بارا جاتسا, كەرىسىنشە «ەگەمەندى» وقيتىن ادامداردىڭ قاتارى كوبەيىپ كەلەدى. گازەتتىڭ سايتى العاشقى ەلۋلىكتىڭ ىشىنە ەندى. باسىلىمنىڭ سايتىن شەت ەلدەگى قانداستارىمىز دا وقيدى», - دەدى باسقارما توراعاسى.
سونىمەن قاتار د.قىدىرالى گازەتكە جازىلۋ, وقىرمانمەن بايلانىس جايىن تىلگە تيەك ەتىپ, باسىلىمعا جازىلۋ ماسەلەسىنە پاتريوتيزم تۇرعىسىنان قاراۋدىڭ ماڭىزدىلىعىن اتاپ ءوتتى.
ازامات قاسىم,
«ەگەمەن قازاقستان»
وسكەمەن
