ناقتى شەشىم قابىلدانا ما؟
بۇل رەفەرەندۋمدا يتاليادان ءبولىنىپ شىعۋ تۋرالى ازىرگە اڭگىمە قوزعالىپ وتىرعان جوق. قازىرگى ۋاقىتتا ۆەنەتسيا مەن لومبارديانىڭ بيلىك تىزگىنى «سولتۇستىك ليگاسىنىڭ» وكىلدەرىندە. بۇل پارتيا 1990 جىلدارى سولتۇستىك وڭىرلەردىڭ يتاليا قۇرامىنان شىعىپ, جەكە پادانيا مەملەكەتىن قۇرۋدى ناسيحاتتاعان ەكەن. ال ەندى پارتيا تىنىشتالىپ, يتاليادان دەربەستىك قانا سۇراپ وتىر. ءبىر كۇماندى جايت, جاقىندا پارتيا كاتالونيانىڭ يسپانيادان ءبولىنۋىن قولداعان ەكەن.
رەفەرەندۋم ەندى دايىندالىپ جاتقان كەزدە ۆەنەتسيا بيلىگى وڭىرگە اۆتونوميا سىيلاۋمەن قاتار, يتاليادان تاۋەلسىز بولۋدى كوكسەگەن ەدى. بىراق ەلدىڭ كونستيتۋتسيالىق سوتى بۇندايعا جول بەرمەيتىنى انىق بولىپ, بيلىكتەگىلەر اۆتونوميا تۋرالى رەفەرەندۋم جاريالاۋعا شەشىم قابىلدادى.
يتاليا كونستيتۋتسياسىنىڭ 116-بابىنا سايكەس وڭىرلەر ريمنەن كوبىرەك اۆتونوميا تالاپ ەتە الادى.
ولار نەنى كوزدەپ وتىر؟
الدىمەن ماسەلە قارجىلىق دەربەستىكتە. ەكى رەگيون تاپقان تابىسىن ريمگە سالىق رەتىندە جىبەرمەي, كوپ بولىگىن وزىندە قالدىرعىسى كەلەدى. ۆەنەتسيا مەن لومبارديا – يتاليانىڭ ەڭ باي وڭىرلەرى. ەكەۋى بىرىگىپ مەملەكەتتىك ءجىو-ءنىڭ ۇشتەن ءبىر بولىگىن قۇرايدى.
بۇل رەفەرەندۋمدار كونسۋلتاتيۆتى بولادى. ياعني ولاردىڭ ناتيجەلەرى مەملەكەت ۇكىمەتىن بەلگىلى ءبىر شەشىم شىعارۋعا مىندەتتەمەيدى. الايدا, ريم 15 ميلليون حالقى بار ەكونوميكالىق قۋاتتى ەكى ءوڭىردىڭ قالاۋىن ەلەمەۋى مۇمكىن ەمەس ەكەندىگى انىق.
ۆەنەتسيا حالقى نە ءۇشىن تۋريستەرگە وكپەلى؟
«بۇل تۋريزم ەمەس, بۇل باسا كوكتەپ كىرۋ», دەيدى قالا تۇرعىندارىنىڭ ءبىرى. ۆەنەتسيالىق لاگۋناعا كىرگەن تۋريستىك كەمەلەر ەسكى عيماراتتاردىڭ فۋندامەنتىن شايىپ كەتەتىن كورىنەدى.
ازداپ ستاتيستيكاعا ۇڭىلەيىك, ۆەنەتسيانى كۇنىنە 75 مىڭ ادام تاماشالاۋعا كەلەدى ەكەن. بۇل جەرگىلىكتى حالىقتىڭ سانىنان الدەقايدا كوپ - 50 مىڭ ادام. ال جىلدىق كورسەتكىشتەر تىپتەن تاڭ قالدىرادى. يتاليانىڭ ءىنجۋ-مارجانىن كورۋگە جىلىنا 25 ميلليون تۋريست كەلەدى!
مۋنيتسيپاليتەت پيكنيك سۇيگىشتەر قالدىراتىن توننا قوقىستى ارەڭ تازارتىپ ۇلگىرەدى. ال قالا تۇرعىندارىنا اۋاداي قاجەت زاڭ كەڭسەلەرى, مەديتسينا ورتالىقتارى مەن ءتىپتى ازىق-ت ۇلىك دۇكەندەرى جابىلىپ, ورنىنا قوناقجايلار اشىلۋدا. سونىڭ سالدارىنان جاستار وزگە قالالارعا قونىس اۋدارادى, ال قالا حالقى جىل وتكەن سايىن قارتايىپ بارادى.
قاراجات قايدان السا بولادى؟
قالا تۇرعىنى سەباستيان فاگاراتستسيدىڭ ايتۋى بويىنشا, شاعىن بيزنەس ورىندارى ازايدى. تۋريستەردەن كەلىپ تۇسكەن تابىستىڭ كوپ بولىگى بيلىككە كەتكەندىكتەن, قالعان تابىستىڭ كولەمى سول تۋريستەرگە قىزمەت كورسەتۋگە ارەڭ جەتەدى.
يۋنەسكو جەرگىلىكتى بيلىكتى ۇلكەن قاراجاتتى ءجوندى قولدانا الماعانى ءۇشىن ايىپتاپ وتىر. بۇل ماسەلە شەشىمىن تاپپاسا, ۆەنەتسيا الەمدىك مۇرا وبەكتىلەرىنىڭ تىزىمىنە ەنۋى مۇمكىن. ادەتتە, ول تىزىمگە سوعىس ايماعىندا ورنالاسقان قالالار ەنەدى.
ازىرلەگەن
ايگۇل شەرنياز,
«ەگەمەن قازاقستان»
