بىرىنشىلىكتىڭ اشىلۋىندا ءسوز سويلەگەن وبلىس اكىمى قۇمار اقساقالوۆ جارىستىڭ قىزىقتى وتۋىنە تىلەكتەستىك ءبىلدىردى.
مۇز ايدىنىنا شىققان پەتروپاۆلدىق «قىزىلجار» مەن اققايىڭ اۋدانىنىڭ نامىسىن قورعاعان «سوكول» كوماندالارى جەڭىسكە جەتۋ ءۇشىن بارىن سالدى. باستاپقىدا تەڭ ويىن ورنەگى بايقالعانىمەن, ۋاقىت وتكەن سايىن قۇلاگەرلىكتەر شاپشاڭ, جيناقى قيمىلداپ, قارسىلاستارىن 7:1 ەسەبىمەن ويسىراتا ۇتتى. باسىنا شلەم كيىپ, اياعىنا كونكي تاعىپ, قولىنا يمەك تاياق ۇستاپ شىققان قۇمار ىرگەباي ۇلى ەكى شايبا سوقتى.
«ەلباسى ۇلت دەنساۋلىعى باستى بايلىق ەكەنىن ۇنەمى ايتىپ, زور كوڭىل ءبولىپ كەلەدى. حوككەي كۇشتىلەر, شىمىرلار ويىنى سانالادى. مەن ونىمەن مەكتەپتە وقىپ جۇرگەندە شۇعىلداندىم. تۇنگى حوككەي ليگاسىنىڭ اشىلۋىنا جان-جاقتى ازىرلەندىك. الدا تارتىسقا تولى جارىستارعا كۋا بولارىمىز انىق», دەدى ماتچتان كەيىن باق وكىلدەرىنە بەرگەن سۇحباتىندا ق. اقساقالوۆ.
ءسوز اراسىندا وڭىردە شايبالى حوككەيدىڭ دامۋىنا ۇلكەن كوڭىل ءبولىنىپ وتىرعانىن ايتا كەتكەن ءجون. «قۇلاگەر» حوككەي كومانداسى ەكى رەت ەل كۋبوگىنىڭ يەگەرى اتاندى. ونىڭ بەلدى ويىنشىلارى الەكساندر نۋرەك, ماكسيم ۆولكوۆ, يلگيز نۋريەۆ قىسقى ازيا ويىندارىنىڭ جەڭىمپازى بولدى. جۋىردا جاس حوككەيشىلەردى جاتتىقتىراتىن ارنايى توپتار اشىلدى.
سالاماتتى ءومىر سالتىن ناسيحاتتاۋدى دىتتەيتىن تۇنگى حوككەي ليگاسىندا ويناۋعا 8 كوماندا ىنتا ءبىلدىرىپ وتىر. جارىس تاۋەلسىزدىك مەرەكەسىنە دەيىن جالعاسادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
