سول كۇندەرى اقجايىق اۋدانىنداعى بازارشولان, بازارتوبە اۋىلدىق وكرۋگتەرىندە قالىڭ ءورت بولىپ, ەلدى مەكەندەر جالىنعا ورانا جازدادى. بوكەي ورداسى اۋدانى, وردا اۋىلدىق وكرۋگىندەگى نۇرتاي احمەتوۆتىڭ شارۋا قوجالىعىنان 25 ءىرى قارا, 250 وراما, 1,5 مىڭ تايلانعان ءشوپ جانىپ كەتتى. اسىرەسە 30 شىلدە كۇنى قازتالوۆ اۋدانى اۋماعىندا بولعان الاپات ءورت كەزىندە تالدىاپان اۋىلدىق وكرۋگىنە قاراستى قوسوبا اۋىلى تۇرعىندارىنىڭ 598 باس ۇساق مالى تىرىدەي ورتەنىپ كەتتى. مال كەزەگىندە جۇرگەن اۋىل تۇرعىنى, 1990 جىلى تۋعان جاس جىگىتتىڭ دەنەسىنىڭ 80 پايىزىن كۇيىك شالىپ, جەدەل تۇردە وبلىستىق اۋرۋحاناعا جەتكىزىلگەنىمەن, كوپ ۇزاماي كوز جۇمدى.
توسىن قۇبىلىستىڭ تالكەگىنە ۇشىراعان اۋىلداستارىن قازتالوۆتىق اعايىندار بارىنشا قولدادى. تامىز ايىندا اۋدانداعى شارۋا قوجالىقتارى, كاسىپكەرلەر مەن اۋدان تۇرعىندارى جىلۋ جيناپ, 360 باس قوي-ەشكىنى قوراسى بوس قالعان 16 وتباسىنا تاراتىپ بەرگەن بولاتىن. قىركۇيەك قارساڭىندا «مەكتەپكە جول» اكتسياسىن ۇيىمداستىرىپ, قوسوبا اۋىلىنداعى مەكتەپ وقۋشىلارىنا جالپى قۇنى 400 مىڭ تەڭگە بولاتىن كيىم-كەشەك ۇلەستىرىلدى.
جوعارىداعى توتەنشە جاعدايعا بايلانىستى جەرگىلىكتى بيلىك تاراپىنان كوميسسيا قۇرىلىپ, شىعىن ەسەپتەلگەن ەدى. 13 وتباسىنىڭ ورتكە كەتكەن 250 باس مالىنىڭ وتەمى رەتىندە وبلىس اكىمدىگىنىڭ رەزەرۆ قورىنان 5 ميلليون 300 مىڭ تەڭگە قاراجات اۋدارىلىپ, وتەماقى 13 قازان كۇنى مال يەلەرىنىڭ قولىنا ءتيدى.
– بىزگە كومەك قولىن سوزعان بارشا جانعا قوسوبالىقتاردىڭ العىسى شەكسىز. ورتەنگەن مالدىڭ ورنىن تولتىرىپ, مالداي دا, اقشالاي دا كومەك كورسەتىپ جاتىر. ريزامىز, بىزگە جاساعان جاقسىلىق ولارعا دا اللادان قايتسىن دەپ تىلەيمىز, – دەيدى قوسوبالىق تاستەمىر قويشىباەۆ.
قازبەك قۇتتىمۇرات ۇلى,
«ەگەمەن قازاقستان»
