قورعانىس جانە اەروعارىش ونەركاسىبى مينيسترلىگى ۇيىمداستىرىپ وتىرعان فورۋمنىڭ ماقساتى ەكونوميكا سالاسىنداعى ماسەلەلەردى شەشۋ ءۇشىن عارىش قىزمەتىندەگى ناتيجەلەردى قولدانۋ بويىنشا تاجىريبە الماسۋ, سوڭعى ون جىلداعى عارىش قىزمەتىنىڭ قورىتىندىسىن قاراستىرۋ, سونداي-اق الەمدىك تاجىريبەگە سۇيەنە وتىرىپ, ەلىمىزدىڭ عارىش سالاسىن دامىتۋ جوسپارلارىن تالقىلاۋ بولىپ تابىلادى.
فورۋمدى اشقان قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ قازاقستان عارىش سالاسىن دامىتۋ بويىنشا مەملەكەت باسشىسى العا قويعان مىندەتتەردىڭ ماڭىزدىلىعىن ايتا كەلىپ, وسى باعىتتا اتقارىلىپ جاتقان جۇمىستاردى اتاپ كورسەتتى.
«بۇگىندە «بايقوڭىر» بۇكىل ادامزاتتىڭ يگىلىگىنە اينالىپ وتىر. وسىناۋ بىرەگەي كەشەن بۇرىنعى كەڭەس وداعىنداعى عانا ەمەس, سونىمەن قاتار بۇكىل الەمدەگى كوپتەگەن تەحنولوگيانىڭ دامۋ باستاۋىندا تۇر. قازىرگى ۋاقىتتا رەسەيلىك ارىپتەستەرمەن كەشەندى ودان ءارى دامىتۋ تۇجىرىمداماسى قابىلداندى. وندا عارىش ايلاعىنىڭ قولدانىستاعى نىساندارىنىڭ بازاسىندا عارىش جوبالارىن جۇزەگە اسىرۋعا قاتىستى ءبىزدىڭ بايلانىستارىمىزدى جالعاستىرۋ شارتتارى كوزدەلگەن», دەدى مينيستر. سونداي-اق ول ەكولوگيالىق تۇرعىدا قاۋىپسىز جاڭا عارىشتىق زىمىران كەشەنىن ازىرلەۋ جونىندەگى «بايتەرەك» جوباسى ماڭىزدى سانالاتىندىعىن اتاپ ءوتتى. «بۇل جوبا بيىل باستالدى. ءبىز جاڭا كەشەندى 2022 جىلى العاش رەت ۇشىرۋدى جوسپارلاۋدامىز. قازاقستان تاراپى جەر ءۇستى كەشەندەرى مەن ينفراقۇرىلىمىنا قاتىستى جۇمىستاردى جۇرگىزسە, رەسەيلىك تاراپ زىمىران دايىنداۋمەن اينالىساتىن بولادى», دەدى ب.اتامقۇلوۆ.
بۇدان كەيىن حالىق قاھارمانى, ۇشقىش-عارىشكەر, پارلامەنت سەناتىنىڭ دەپۋتاتى تالعات مۇساباەۆ پەن «روسكوسموس» مەملەكەتتىك كورپوراتسياسى باس ديرەكتورىنىڭ عارىش قىزمەتى بويىنشا ورىنباسارى سەرگەي ساۆەلەۆ قۇتتىقتاۋ سوزدەرىن جەتكىزدى.
پلەنارلىق وتىرىستا وتاندىق عارىش سالاسىن دامىتۋ تۋرالى نەگىزگى باياندامانى قورعانىس جانە اەروعارىش ونەركاسىبى ۆيتسە-ءمينيسترى مارات نۇرعوجين جاسادى. ۆيتسە-مينيستر ءوزىنىڭ بايانداماسىندا مينيسترلىكتىڭ جۇمىسى نەگىزگى ءتورت باعىت بويىنشا جۇرگىزىلەتىنىنە توقتالدى. ولار قازاقستان رەسپۋبليكاسى عارىش اپپاراتتارىنىڭ وربيتالىق توپتاستىرىلۋىن قولدانۋدى دامىتۋ جانە كەڭەيتۋ, عارىش اپپاراتتارىن قۇراستىرۋ-سىناۋ كەشەنىن قۇرۋ جوباسىن جۇزەگە اسىرۋ, عىلىمي زەرتتەۋدى دامىتۋ جانە ولاردىڭ ناتيجەسىن تاجىريبەدە پايدالانۋ, «بايقوڭىر» ايلاعىن دامىتۋ اياسىندا «بايتەرەك» جوباسىن جۇزەگە اسىرۋ جانە كادرلىق پوتەنتسيالدى ارتتىرۋ.
سونداي-اق ەۋرازيالىق ەكونوميكالىق كوميسسيانىڭ, فرانتسيالىق «Airbus Defence and Space» جانە «Thales Alenia Space», اكادەميك م.ف. رەشەتنەۆ اتىنداعى رەسەيلىك «اقپاراتتىق سپۋتنيكتىك جۇيە», وڭتۇستىككورەيالىق «Satrec Initiative» كومپانيالارىنىڭ وكىلدەرى بايانداما جاسادى.
فورۋمنىڭ بۇل العاشقى كۇنى «عارىشتىق جانە گەواقپاراتتىق تەحنولوگيالار» اتتى ەۋرازيالىق تەحنولوگيالىق پلاتفورماسىنىڭ جالپى جيىنى وتىرىسىمەن اياقتالدى. القالى باسقوسۋدىڭ قورىتىندى شارالارى بۇگىن وتەدى.
ايتا كەتەيىك, 2013 جىلدان بەرى «قازاقستانداعى عارىش كۇندەرى» تاقىرىبىمەن سەمينار رەتىندە جىل سايىن وتكىزىلىپ كەلە جاتقان بۇل جيىن بيىل ءوزىنىڭ اسەر ەتۋ اۋماعى مەن شەكاراسىن كەڭەيتە ءتۇستى. ياعني اتالعان باسقوسۋ حالىقارالىق سەميناردان حالىقارالىق فورۋمعا اينالىپ وتىر. فورۋم عارىش قىزمەتىندەگى ماڭىزدى ساۋالدار تالقىلاناتىن الاڭ رەتىندە جۇمىسىن جالعاستىرا بەرمەك.
فورۋمدا قاتىسۋشىلارعا جەردى قاشىقتىقتان زوندتاۋ عارىشتىق توبى قۇرىلىمىنىڭ سوڭعى ۇلگىلەرىمەن جانە جاڭا تەحنولوگيالارىمەن, ناۆيگاتسيالىق جۇيەسىمەن, عارىش اپپاراتتارىنىڭ ءتيىمدى جۇكتەمەسىن ءوندىرۋ سالاسىمەن تانىسۋعا مۇمكىندىك بەرىلەدى.
جولدىباي بازار,
«ەگەمەن قازاقستان»
