سۋرەتتى تۇسىرگەن: تالعات تانىباەۆ
ول 16 جىلدىڭ ىشىندە 85 مارافونعا قاتىسىپ, 9 مارتە كۋبوك, 29 مەدال يەلەندى. ەندىگى ارمانى – گيننەستىڭ رەكوردتار كىتابىنا ەنۋ. ىلە-شالا «الماتى تۋرى-2017» حالىقارالىق جارىسىنىڭ 4 دۇركىن جەڭىمپازى الەكسەي لۋتسەنكو «ۆۋەلتا يسپانيا» ۆەلوكوپكۇندىك جارىسىنىڭ بەسىنشى كەزەڭىندە جەڭىستىڭ ەڭ بيىك تۇعىرىنا كوتەرىلدى. «تۋر دە فرانس-2017» تانىستىرىلىمىنا شاقىرتۋ الدى. جاقسى حاباردىڭ ءىزى سۋىماي جاتىپ اشعابادتا وتكەن ازيا ويىندارىندا ۆەلوشاباندوز ارتەم زاحاروۆ ترەكتە جەڭىمپاز, ومنيۋمدا كۇمىس, جەڭىل اتلەتشى ميحايل ليتۆين 400 مەترگە جۇگىرۋدەن قولا جۇلدەگەر اتانسا, بالۋانىمىز دانيار كالەنوۆ التىننان القا تاقتى.
زىلتەمىرشى ايدار قازوۆتىڭ ايشىقتى اسۋى نەگە تۇرادى! ونىڭ تايپەي قالاسىندا الەمنىڭ 142 ەلىنەن 7 مىڭعا جۋىق سپورتشى قاتىسقان ستۋدەنتتەردىڭ ءححىح دۇنيەجۇزىلىك ۋنيۆەرسياداسىنداعى توپ جارعان زور تابىسىنا ايماق باسشىسى قۇمار اقساقالوۆ تا ورتاقتاسىپ, ارنايى قابىلدادى. اۋىر اتلەتشىنى ەلىمىزدىڭ كوك بايراعىن جەلبىرەتكەن ايتۋلى جەڭىسىمەن قۇتتىقتاپ, اقشالاي سىيلىق تابىس ەتتى. «جەڭىس جولى قاشاندا اۋىر. تايپەيدە سەرپە كوتەرۋدەن ۇشتىككە ەنىپ, جۇلقا كوتەرۋدە كانادا مەن رەسەي زىلتەمىرشىلەرى باعىندىرا الماعان 186 كيلونى كوتەرىپ, التىن تاعدىرى اسا تارتىستى جاعدايدا شەشىلدى. ەڭ مىقتى قارسىلاسىم – ريو جازعى وليمپياداسىنىڭ چەمپيونى نيدجات راحيموۆ. الدا سەرپە كوتەرۋ ناتيجەسىن جاقسارتۋ مىندەتى تۇر», دەگەن بولاتىن باق وكىلدەرىنە بەرگەن سۇحباتىندا. اۋىر اتلەتيكادان قازاقستان ۇلتتىق قۇراماسىنىڭ بۇرىنعى كەڭەسشى-باپكەرى ەنۆەر تۇركىلەريدىڭ «ايداردىڭ بويىندا وليمپيادا چەمپيونى اتانۋعا قاجەتتى قاسيەتتەردىڭ ءبارى بار» دەگەن پىكىرىن ەسكەرەتىن بولساق, جارقىن جەڭىستەرمەن قۋانتارى ءسوزسىز.
دانيار كالەنوۆ جايلى ءسوز بولەك. ازيا قۇرلىعىنىڭ كىل مىقتىلارى جينالعان باسەكەدە بالۋاندار اراسىنان ول عانا ەل قورجىنىن التىن جۇلدەمەن ەسەلەدى. العاشقى بەلدەسۋدە بوز كىلەم يەسىن, ياعني تۇرىكمەنستاندىق بالۋاندى 5:0 ەسەبىمەن ۇتىپ, كەلەسى اينالىمدا قىتايلىقتى 8:0 ەسەبىمەن ويسىراتا جەڭدى. جارتىلاي فينالدا وزبەكستان نامىسىن قورعاعان قانداسىمىزدان ايلاسىن اسىرسا, اقتىق جەكپە-جەكتە يراندىقتى قاپى قالدىردى. مۇنىڭ الدىندا ەل چەمپيوناتىندا قولا, گرۋزياداعى گران-پري جارىسىندا ءبىرىنشى ورىن العان بولاتىن.
ەل نامىسىن ابىرويمەن قورعاپ, مەرەيىن اسىرعان سپورت ساڭلاقتارىن جۋىردا وتكەن ماراپاتتاۋ راسىمىندە تۇرىكمەنستان جەرىندە ءۇش جەرلەسىمىزدىڭ جەڭىس تۇعىرىنا كوتەرىلگەنى اتاپ ايتىلدى.
– سپورت – دەنساۋلىقتى جاقسارتاتىن, سالاماتتى ءومىر سالتىن قالىپتاستىراتىن, ادامداردى بىرىكتىرەتىن, دوستاستىراتىن ماڭىزدى شارا. وبلىسىمىزدا بۇل سالاعا ۇلكەن كوڭىل ءبولىنىپ كەلەدى. بيۋدجەتتەن قوماقتى قارجى قاراستىرىلىپ, ساۋلەتتى نىساندار سالىنۋدا. بۇگىنگى تاڭدا 170 مىڭنان استام تۇرعىن 3 مىڭعا تارتا سپورت عيماراتتارىندا جاتتىعادى, دەي كەلىپ, قۇمار ىرگەباي ۇلى, ارتەم زاحاروۆ پەن ميحايل ليتۆينگە 1 ميلليون جانە 500 مىڭ تەڭگە مولشەرىندە اقشالاي سىيلىقتى, ال دانيار كالەنوۆكە پاتەردىڭ كىلتىن سالتاناتتى تۇردە تاپسىردى.
ولاردىڭ باپكەرلەرى دە ءتۇرلى ماراپاتتارعا يە بولدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
