جىل باسىنان بەرى ۇلتتىق كاسىپكەرلەر پالاتاسىنا سولتۇستىكقازاقستاندىقتار تاراپىنان 234 ارىز-شاعىم ءتۇسىپ, 72 پايىزى شەشىمىن تاپقان. تالداۋ بارىسى كاسىپكەرلىكتەر سانىنىڭ ءبىر پايىزعا ازايعانىن كورسەتىپ بەردى. جەر بولۋدەگى قيىندىقتار دا جەتىپ ارتىلادى, ونىڭ سەبەپتەرىنە ناقتى مىسالدار كەلتىرىلدى. 2013-2016 جىلدار ارالىعىندا پەتروپاۆل قالاسىندا جەر تەلىمدەرىنە قاتىستى بىردە-ءبىر كونكۋرس وتكىزىلمەپتى. ال وبلىس بويىنشا ەكى اۋكتسيون عانا ۇيىمداستىرىلعان. ءبىر تۇسىنىكسىزدىگى, جالعا بەرىلگەن تەلىمدەردىڭ اۋماعى تىم ۇلكەن. كىمدەر الىپ جاتقانىنا, قانداي ماقساتقا پايدالانىلعانىنا قاتىستى اشىقتىق, مولدىرلىك جەتىسپەيدى.
كەزدەسۋدە كاسىپكەرلەر قۇقىقتىق-نورماتيۆتىك اكتىلەردىڭ وسال تۇستارىن اتاپ كورسەتىپ, تۇزەتۋلەر ەنگىزۋدى ءوتىندى. «كازانتسەۆ ا.ۆ.» جك جەتەكشىسى الەكساندر كازانتسەۆ جەكە كاسىپكەرلەر تۇتىنۋ كولەمىنە قاتىستى تاريف قولدانىلاتىن جەكە تۇلعالارعا تەڭەستىرىلگەنىن ايتا كەلىپ, كاسىپكەردىڭ ءوز ءوندىرىسى, جۇمىس كۇشى مەن قۇرال-جابدىقتارى بولا تۇرا ەسەپكە الىنبايتىنىنا قىنجىلىس ءبىلدىردى. «ەسەپتەۋ ەڭ جوعارى مولشەردە جۇرگىزىلەدى. مەنىڭشە, وندىرىسپەن اينالىساتىن بارلىق جەكە كاسىپكەرلەردى زاڭدى تۇلعاعا تەڭەستىرگەن ءجون», دەدى ول.
وبلىستىق كاسىپكەرلەر پالاتاسى كاسىپكەرلەردىڭ قۇقىعىن قورعاۋ جونىندەگى كەڭەستىڭ ءتورايىمى ينەسسا قۋانوۆا ازاماتتىق كودەكستە جەكە كاسىپكەردى زاڭدى تۇلعاعا تەڭەستىرەتىن باپتىڭ بار ەكەنىن, سوندىقتان ەنەرگەتيكتەردىڭ ارەكەتىنە زاڭ نورمالارى شەڭبەرىندە جاۋاپ قاتۋ كەرەكتىگىن العا تارتتى. ب.پالىمبەتوۆ بولسا, بۇل ماسەلەنىڭ رەسپۋبليكالىق دەڭگەيدە قارالاتىنىنا سەندىردى.
ء«سۇت وداعى» سەرىكتەستىگىنىڭ ديرەكتورى الەكساندر كۋزلياكين مونوپوليستەردىڭ ەلەكتر ەنەرگياسى ءۇشىن سارالانعان تاريفتى الىپ تاستاۋىن قولدامادى. ءبىر عانا تاريف بويىنشا تولەۋدىڭ قيسىنسىزدىعىنا كەلىسكەن ۋاكىل ماسەلەنىڭ نازارعا الىناتىنىن ايتتى. «جاقسى تۇز پەتروپاۆل» جشس-ءنىڭ ديرەكتورى جاسۇلان ازەنوۆ ومبۋدسمەننىڭ قابىلداۋىندا بولىپ, يندۋستريالىق-يننوۆاتسيالىق دامۋ باسقارماسىنىڭ زاڭسىز ارەكەتتەرىنە شاعىمداندى. سويتسە, باسقارما باسشىلىعى جەر قويناۋىن پايدالانۋ ماقساتىمەن اس تۇزىن ءوندىرۋ جانە بارلاۋ شارتتارىنىڭ كۇشىن جويۋ تۋرالى بۇيرىق شىعارىپتى. سوت ارقىلى ءبىر بۇيرىقتىڭ كۇشى جويىلعانىمەن, قالعان ەكەۋىنە سوتتان تىس تارتىپپەن قالپىنا كەلتىرۋ تاپسىرماسى بەرىلگەنىمەن, ول ءالى كۇنگە دەيىن ورىندالماعان.
بىلتىر كاسىپكەرلەردىڭ قۇقىعىن قورعاۋعا قاتىستى 305 ءوتىنىشتىڭ ءتۇسۋى كەدەرگىلەردىڭ كوبەيمەسە ازايماي وتىرعانىن اڭعارتسا كەرەك. بيىلعى جاعداي دا كوڭىل كونشىتپەيدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
