كوپ كەشىكپەي وبلىس ورتالىعىندا «رۋحاني جاڭعىرۋ» اياسىنداعى ءىس-شارالاردى جۇزەگە اسىراتىن جۇمىس توبى قۇرىلىپ, جوبا كەڭسەسى اشىلدى. وبلىستىق ىشكى ساياسات باسقارماسىنىڭ باسشىسى جاسۇلان بيسەمبيەۆ بۇگىنگە دەيىن 106 جوبا جوسپارى بەكىتىلگەنىن, ونىڭ 34-ءى جۇزەگە اسقانىن ايتادى. وسى ماقساتقا بيىل 1,6 ملرد تەڭگە بولىنگەن. ونىڭ 1,088 ملرد تەڭگەسى جەرگىلىكتى كاسىپكەرلەردىڭ دەمەۋشىلىك قاراجاتى.
باعدارلامانىڭ قاي باعىتى بولسىن, ەلدىڭ رۋحاني الەۋەتىن كوتەرۋگە, ۇلتتىق قۇندىلىقتاردى, جالپى ىزگىلىكتى ناسيحاتتاۋعا ارنالعان. اتىراۋ وبلىسىندا «تۋعان جەر», «قازاقستاننىڭ كيەلى جەرلەر گەوگرافياسى», «الەمدەگى قازاقستان مادەنيەتى», «100 جاڭا ەسىم», «100 جاڭا وقۋلىق», «لاتىن الىپپەسىنە كوشۋ» باعىتتارىنىڭ اياسىندا كىشى باعدارلامالار قابىلداندى. «اتامەكەن», «رۋحاني قازىنا», «تاربيە جانە ءبىلىم», «اقپارات تولقىنى» جوبالارى العاشقى ناتيجەلەرىن بەرىپ ۇلگەردى. «باعدارلاما قارالعان ساتتە يگى ىستەرگە جەرگىلىكتى كاسىپكەرلەردى تارتۋعا, سونىڭ ناتيجەسىندە وڭىردەن شىققان بيزنەس يەلەرىن تۋعان جەردىڭ نىساندارىن اباتتاندىرۋ, جالپى كوركەيتۋ جۇمىستارىنا جۇمىلدىرۋعا باسىمدىق بەرىلدى», دەيدى ج.بيسەمبيەۆ.
«اتامەكەن» كىشى باعدارلاماسى «الەۋمەتتىك باستامالار كارتاسى» جانە «جومارت جۇرەك» بولىمدەرىنە ساي جۇزەگە اسۋدا. تۋعان جەرگە دەگەن پەرزەنتتىك پارىزدى اسقاق ازاماتتىقپەن ۇشتاستىرىپ جۇرگەن اتىراۋلىق بيزنەس يەلەرى بۇل باستامادان تارتىنىپ قالمادى. مىسالى, جىلىوي اۋدانىنىڭ قۇلسارى قالاسىندا كاسىپكەر ماعاۋيا مەرعاليەۆ «اناشىم» بالاباقشاسىن سالىپ, ونى مەملەكەتتىڭ قاراۋىنا وتكىزدى. «جومارت جۇرەك» بازالىق جوباسىنىڭ اياسىندا كاسىپكەر, قالالىق ءماسليحاتتىڭ دەپۋتاتى امانجول قونىسوۆ نۇرسايا شاعىن اۋدانىندا ەكى بىردەي سپورتتىق ويىن الاڭىن سالىپ, مەملەكەت قاراماعىنا بەرگەن. مەتسەناتتار كومەگىمەن «جاڭعىرىق» اتتى دەرەكتى فيلم ءتۇسىرىلىپ جاتىر. بەلگىلى كاسىپكەر يبراگيم اقدراشەۆتىڭ قولداۋىمەن ماقات اۋدانىنداعى جەڭىس ساياباعىنىڭ قۇرىلىسى باستالدى. قۋانىشتىسى سول, بۇل ءتىزىمدى ءارى قاراي دا جالعاستىرا بەرۋگە بولادى. بۇل – بيزنەستىڭ الەۋمەتتىك جاۋاپكەرشىلىگى اتىراۋ وبلىسىندا جوعارى دەڭگەيدە ەكەنىنىڭ ايقىن كورىنىسى.
«رۋحاني جاڭعىرۋ» باعدارلاماسى بويىنشا سارايشىق قالاشىعى مەن حالىق باتىرلارى يساتاي مەن ماحامبەت جونىندە مۋلتيپليكاتسيالى فيلم ءتۇسىرۋ جۇمىستارى قولعا الىنۋدا. الداعى جىلدارى وبلىس ورتالىعىندا بەلگىلى كۇيشى قارشىعا احمەدياروۆ پەن قازاقستاننىڭ حالىق جازۋشىسى حاميت ەرعاليەۆتىڭ ەسكەرتكىشتەرى بوي كوتەرەدى.
– «قازاقستاننىڭ كيەلى جەرلەرىنىڭ گەوگرافياسىنا» اتىراۋ ايماعىندا ورنالاسقان 13 نىسان ۇسىنىلىپ, بەس تاريحي ورىن, ياعني ورتاعاسىرلىق سارايشىق قالاشىعى, اقمەشىت قورىمى, ۇشقان اتا جانە ماحامبەت وتەمىس ۇلى مەن مۇرات موڭكە ۇلىنىڭ كەسەنەلەرى جالپى تىزىمگە ەندى, – دەيدى باسقارما باسشىسى. – «قازاقستاننىڭ كيەلى جەرلەرىنىڭ گەوگرافياسى» اياسىندا «قاسيەتتى قازاقستان» جوباسى بويىنشا 2018 جىلى اتىراۋ وبلىسىنىڭ تاريحي جانە مادەني ەسكەرتكىشتەرىنىڭ جيناعىن دايىنداۋ جانە باسپادان شىعارۋ, وبلىستىق تاريحي-ولكەتانۋ مۋزەيىندە ينتەراكتيۆتىك ونلاين-مۋزەي ۇيىمداستىرۋ, اتىراۋ وبلىسىنىڭ كيەلى جەرلەرىنىڭ كارتاسىن دايىنداپ, شىعارۋ جوسپارلانۋدا. كەلەر جىلى استراحان قالاسىنداعى ۆ.دوگادين اتىنداعى كوركەمسۋرەت گالەرەياسىندا وقيتىن جاستار اراسىندا «مير بەز گرانيتس» اتتى بايقاۋ وتكىزۋ دە جوسپاردا تۇر.
جاقىندا اتىراۋدا رەسپۋبليكالىق «اسار» ۇشجاقتى ارىپتەستىك فورۋمى وتەدى. بۇل اۋقىمدى شارا اياسىندا مەملەكەت, بيزنەس وكىلدەرى جانە ۇكىمەتتىك ەمەس ۇيىمدار بىرلەسىپ جۇزەگە اسىراتىن الەۋمەتتىك جوبالار قارالادى. ۇكىمەتتىك ەمەس ۇيىمداردىڭ جوبالارىن تەك مەملەكەت ەسەبىنەن عانا ەمەس, كاسىپكەرلەردىڭ قولداۋىمەن تۇراقتى جۇزەگە اسۋىنا جاعداي جاساۋدى ماقسات ەتكەن فورۋمدا مەموراندۋمدارعا قول قويىلادى.
«وتانىم – تاعدىرىم» بازالىق جوباسىنىڭ اياسىندا دا بىرقاتار جۇمىستار اتقارىلدى. اتىراۋ وبلىسىنان ەكسپو-2017 حالىقارالىق كورمەسىنە 13 000 وقۋشى جانە ستۋدەنت, 1206 وقىتۋشى, 118 مەديتسينا قىزمەتكەرى قاتىستى. بۇل – رەسپۋبليكا بويىنشا جوعارى كورسەتكىش ەكەنىن ماقتانىشپەن ايتۋعا بولادى. بۇگىندە مۇنايلى ولكە ونەردىڭ ورەلى ورداسىنا اينالعان. رەسپۋبليكا كولەمىندەگى وركەسترلەر كونتسەرتى, تەاترلار قويىلىمدارى, ايتىس, ۇلتتىق سپورت ويىندارىنان جارىستار دا ەلباسىنىڭ «رۋحاني جاڭعىرۋ» باعدارلاماسى اياسىندا ءوتىپ, كورەرمەن قوشەمەتىنە يە بولدى.
باعدارلاما جوبالارىن جۇزەگە اسىرۋ ماقساتىندا وبلىس اكىمى نۇرلان نوعاەۆ مۇناي كومپانيالارىن, كاسىپكەرلەردى ىنتالاندىرۋ ءۇشىن بىرنەشە رەت رەسمي جيىندار وتكىزدى. تشو كومپانياسىنىڭ قولداۋىمەن قالا كۇنىنە وراي اشىلعان الەۋمەتتىك نىسانداردىڭ ءبىرى رەتىندە جايىق جاعاسىنان ورىن تاپقان رەترو-ساياباقتى اتاپ وتۋگە بولادى. جەتىم بالالارعا ارنالعان تۇرعىن ۇيلەر سالىپ, قايتارىمسىز بەرۋ جونىندە بىرقاتار كاسىپكەرلەرمەن جۇرگىزىلگەن جۇمىستار دا ناتيجەسىز قالماس دەگەن سەنىمدەمىز. بۇل اتالعان جۇمىستار اتقارىلعان شارالاردىڭ ءبىر پاراسى عانا.
ەلباسىنىڭ ساياساتىن جۇزەگە اسىرۋ ءۇشىن ءوڭىر باسشىلىعىنان باستاپ بۇقارا حالىققا دەيىن رۋحاني جاڭعىرۋ جۇمىستارىن قولداپ, وسى ءىستىڭ باسى-قاسىنان تابىلۋى – ەلدىكتىڭ نىشانى. بۇل رەتتە اتىراۋلىقتاردىڭ ابىرويى بيىك بولارى ءسوزسىز.
باقىتگۇل باباش,
«ەگەمەن قازاقستان»
اتىراۋ
