ايماق باسشىسى دانيال احمەتوۆ جۇمىس ساپارى بارىسىندا «باقىرشىق تاۋ-كەن ءوندىرۋ كاسىپورنى» جشس ات باسىن بۇرىپ, كەشەندە ءجۇرىپ جاتقان قۇرىلىس-مونتاجداۋ جۇمىستارىمەن تانىستى. جاڭا اتاۋىن العان «قىزىل» جوباسى اتالمىش ايماقتا اۋقىمدى گەولوگيالىق بارلاۋ جۇمىستارىن جۇرگىزۋگە باعىتتالعان.
كەلەر جىلى ينۆەستور – رەسەيلىك «پوليمەتالل» كومپانياسى العاشقى كەندى يگەرىپ, جاڭا بايىتۋ فابريكاسىن ىسكە قوسپاق. جوسپارعا ساي, مۇندا 2 ميلليونعا جۋىق كەندى فلوتاتسيالىق بايىتۋ ءادىسى بويىنشا وڭدەيدى. ال 2019 جىلى تولىق ىسكە قوسىلىپ, قۋاتى ارتقان سوڭ, 10 توننادان اسا التىن كونتسەنتراتىن شىعارادى.
اتاپ ءوتۋ كەرەك, باقىرشىقتىڭ التىنى مورفولوگيالىق قۇرامىنا قاراي قانشالىقتى ەرەكشە بولسا, سونشالىقتى كۇردەلى. سوندىقتان, رەسەيلىك ينۆەستورلار ۇسىنعان تەحنولوگيا بۇرىنعىسىنان ءتيىمدى.
– بيىلعى ينۆەستيتسيالىق كاپيتال 51 ملرد تەڭگەنى قۇرايدى, بىلتىر 29 ملرد بولعان. كومپانيا قولدانىپ وتىرعان جاڭا تەحنولوگيانىڭ ارقاسىندا كەلەر جىلدىڭ ءبىرىنشى جارتىسىندا نىسان ىسكە قوسىلىپ, جۇمىسىن باستايدى دەگەن سەنىم زور. ايتا كەتەرلىگى, كومپانيانىڭ الەۋمەتتىك جوبالاردى جۇزەگە اسىرۋعا بەلسەنە قاتىسادى. ماسەلەن, وسكەمەندەگى بىرقاتار اۋرۋحانانىڭ, اتاپ ايتقاندا, تەراپيالىق كەشەننىڭ قۇرىلىسى, «نۇرلى» جول ساياباعى سياقتى اۋىز تولتىرىپ ايتارلىق جۇمىستارعا ەتەنە اتسالىسىپ جاتىر, – دەدى دانيال احمەتوۆ.
«باقىرشىق تاۋ-كەن ءوندىرۋ كاسىپورنى» جشس الەۋمەتتىك ماڭىزدى جوبالاردى جۇزەگە اسىرۋ ماقساتىندا جالپى سانى 1 ملرد 74 ملن تەڭگە ينۆەستيتسيا قۇيدى. سونىڭ ارقاسىندا, اۋەزوۆ كەنتىندەگى 20 جىل بويى بوس تۇرعان بالاباقشا عيماراتى, سونداي-اق, دارىگەرلىك امبۋلاتوريا مەن سپورت زالى كۇردەلى جوندەۋدەن وتكىزىلىپ, قولدانىسقا بەرىلدى. الداعى تاڭدا اۋىلداعى ورتا مەكتەپ تە جوندەۋدەن وتەدى. ول ءۇشىن شقو اكىمى جەرگىلىكتى بيۋدجەتتەن 300 ملن تەڭگە بولىنەتىنىن جەتكىزدى.
