ول ءوز سوزىندە جۇيەنى رەفورمالاۋ جانە تيىمدىلىكتىڭ باستى كورسەتكىشتەرىنە جەتۋدى قامتاماسىز ەتەتىن جوسپارلاۋ مەن مونيتورينگتىڭ ماڭىزدى قۇرالى بولىپ تابىلاتىن «دەنساۋلىق» مەملەكەتتىك باعدارلاماسى تۋرالى ايتتى.
ەلجان بىرتانوۆ قازاقستان بۇكىل الەمدە جۇقپالى ەمەس اۋرۋلاردىڭ الدىن الۋ جانە ولارمەن كۇرەسۋ ءۇشىن كۇش سالىنىپ جاتقانىن, سونداي-اق ولارعا قوعامدىق دەنساۋلىق ساقتاۋ سالاسىندا عىلىمي دالەلدەنگەن ستراتەگيالارعا نەگىزدەلگەن ىشكى ساياساتتى جۇرگىزۋ ارقىلى قوسىلاتىنىن اتاپ ءوتتى.
ول ۇلتتىق دەنساۋلىق ساقتاۋ قىزمەتىن نىعايتۋ 2016 – 2019 جىلعا ارنالعان «دەنساۋلىق» مەملەكەتتىك باعدارلاماسىنىڭ باستى ماقساتتارىنىڭ ءبىرى ەكەنىن مالىمدەدى. بۇگىنگى كۇنى ۇكىمەت ددۇ-مەن بەلگىلەنگەن قوعامدىق دەنساۋلىق ساقتاۋدىڭ ون نەگىزگى فۋنكتسيالارىنا نەگىزدەلگەن قازاقستاننىڭ قوعامدىق دەنساۋلىق ساقتاۋ قىزمەتىنىڭ ۇلتتىق مودەلىن قولداعانىن جەتكىزدى.
سونىمەن قاتار, ينتەرنەتتىڭ ارقاسىندا, بۇگىن ادامدار ءوز دەنساۋلىعى جونىندە حاباردار جانە ساۋ بولۋدى ۇيرەنە الادى. ادامداردىڭ ساۋ بولۋىنا كومەكتەسۋ ءۇشىن ءبىز بارلىق زاماناۋي جانە يننوۆاتسيالىق اقپاراتتىق-كوممۋنيكاتسيالىق تەحنولوگيالاردى پايدالانۋىمىز كەرەك.
ء«بىز اقپاراتتىق-كوممۋنيكاتسيالىق تەحنولوگيالار ادامداردىڭ دەنساۋلىقتارى تۋرالى ءبىلىمىن ارتتىرادى دەپ ەسەپتەيمىز. تەحنولوگيالار, سونداي-اق, مەديتسينالىق قىزمەتتەرگە قولجەتىمدىلىكتى قامتاماسىز ەتۋگە مۇمكىندىك بەرەدى. زاماناۋي تەلەكوممۋنيكاتسيالىق تەحنولوگيالاردى پايدالانۋ اۋرۋلاردىڭ پروفيلاكتيكاسىن جانە ەمدەۋدى جەتىلدىرۋ ءۇشىن ۇلكەن مۇمكىندىكتەر بەرەدى. دارىگەرگە كىرۋ شاپشاڭ ۆيرتۋالدى كىرۋ ارقىلى كەڭەيەدى. پاتسيەنتتەر مەن دارىگەرلەردىڭ قارىم-قاتىناستارى تەك قانا تەراپەۆتكە كىرۋ عانا ەمەس, ناۋقاستىڭ اۋرۋىمەن كۇرەسۋگە قاتىساتىن بارلىق كوماندا مۇشەلەرىنە كىرۋ ارقىلى جەڭىلدەتىلەدى», — دەدى ەلجان ءبىرتانوۆ.
«دەنساۋلىق» مەملەكەتتىك باعدارلاماسىنىڭ باسقا دا ماقساتى قىزمەتتەر كورسەتۋدىڭ جۇقپالى ەمەس اۋرۋلارى بويىنشا كەشەندى كوزقاراسىنا باعىتتالعان. بارلىق قىزمەتتەر دەڭگەيى مەن قيىندىعىنا قاراماستان, ناۋقاستىڭ اينالاسىندا ىقپالداستىرىلۋى ءتيىس. قازاقستاندا ءبىز ونكولوگيا, پسيحيكالىق دەنساۋلىق جانە تۋبەركۋلەز سياقتى بۇرىن بولەك باسقارىلاتىن كەيبىر مامانداندىرىلعان قىزمەتتەردى مەديتسينالىق سانيتاريالىق العاشقى كومەكپەن بىرىكتىرىپ جاتىرمىز. كومەك كورسەتۋدىڭ نەگىزگى كەشەندى ءتاسىلى, پاتسيەنتكە جانە كوپسالالى كوماندالىق ەمگە ينتەراكتيۆتى قىزمەت كورسەتۋگە باعدارلانعان», — دەدى مينيستر.
ءسوزىنىڭ سوڭىندا ول ارىپتەستەرىنىڭ ددۇ-نىڭ جانە يۋنيسەف-ءتىڭ قاتىسۋىمەن 2018 جىلعى قازان ايىندا الماتى قالاسىندا وتەتىن مەديتسينالىق-سانيتاريالىق العاشقى كومەك (مساك) الماتى دەكلاراتسياسىنىڭ 40 جىلدىعىنا ارنالعان كونفەرەنتسيانىڭ جۇمىسىنا قاتىسۋ ءۇشىن شاقىردى. سوعان بايلانىستى كونفەرەنتسيانىڭ نەگىزگى تاقىرىبى مساك جانە اقپاراتتىق تەحنولوگيالارعا قاتىستى سۇراقتار بولماق.
ء«بىزدىڭ ويىمىزشا, العاشقى كومەك — بۇل دەنساۋلىق ساقتاۋدىڭ «جۇرەگى پەن ەسىگى» جانە ادامداردىڭ مىنەز-قۇلقىنا جانە اۋرۋلارمەن كۇرەسكە اسەر ەتەتىن شەشۋشى فاكتور», — دەپ تۇيىندەدى ءوز ءسوزىن ەلجان ءبىرتانوۆ.
بەلگىلى بولعانداي, اعىمداعى جىلعى مامىردا جەنەۆا قالاسىندا وتكەن 70-ءشى دۇنيەجۇزىلىك دەنساۋلىق ساقتاۋ اسسامبلەياسىندا, ەلجان ءبىرتانوۆ 1978 جىلعى تاريحي الماتى دەكلاراتسياسى بويىنشا ددۇ-نىڭ مەديتسينالىق-سانيتاريالىق العاشقى كومەكتى جاڭارتۋ بويىنشا باستاماسىن كوتەردى. سونىمەن قاتار, بۋداپەشتە وتكەن ەۋروپالىق وڭىرلىك كوميتەتتىڭ 67-سەسسياسى اياسىندا ددۇ-نىڭ باس ديرەكتورى تەدروس گەبرەيەسۋس قازاقستان دەلەگاتسياسىمەن كەزدەسۋ بارىسىندا وتكەن جىلدارداعى قازىرگى زامانعى سىن-قاتەرلەر مەن وزگەرىستەردى ەسكەرە وتىرىپ, وسى دەكلاراتسيانىڭ جاڭارتىلعان نۇسقاسىن تالقىلاۋعا قولداۋ ءبىلدىردى. سونداي-اق, ددۇ-نىڭ باسشىسى ددۇ ەۋروپالىق بيۋروسىنىڭ, قر دەنساۋلىق ساقتاۋ مينيسترلىگى وكىلدەرىنىڭ جانە مساك بويىنشا حالىقارالىق ساراپشىلاردىڭ قاتىسۋىمەن بىرلەسكەن جۇمىس توبىن قۇرۋدى ۇسىندى. جاڭارتىلعان دەكلاراتسيانى 2019 جىلعى مامىر ايىندا 72 دۇنيەجۇزىلىك دەنساۋلىق ساقتاۋ اسسامبلەياسىندا قاراۋعا ەنگىزۋ جوسپارلانعان.
انىقتاما:
ددۇ جۇقپالى ەمەس اۋرۋلار بويىنشا مونتەۆيدەوداعى (ۋرۋگۆاي) كونفەرەنتسيادا مەملەكەت جانە ۇكىمەت باسشىلارى, دەنساۋلىق ساقتاۋ, اۋىل شارۋاشىلىعى, قارجى, سىرتقى ىستەر, مەملەكەتتىك جوسپارلاۋ جانە ساۋدا مينيسترلەرى, مەملەكەتتىك ساياساتتى ازىرلەۋشىلەر, سونداي-اق, ساراپشىلار مەن حالىقارالىق دەڭگەيدەگى بەلسەندىلەر قاتىسۋدا.
