يسپانيا پرەمەر-ءمينيسترىنىڭ ءباسپاسوز قىزمەتى بەيسەنبى كۇنى مينيسترلەر كابينەتىنىڭ شۇعىل وتىرىسىندا كونستيتۋتسيانىڭ 155 بابى جۇزەگە اسىرىلاتىنىن حابارلادى.
كاتالونيا باسشىسى كارلەس پۋچدەمون مادريد تاراپى كەلىسسوزگە كەلمەسە, وڭىرلىك پارلامەنت تاۋەلسىزدىك جونىندە رەسمي داۋىس بەرۋى مۇمكىن ەكەنىن العا تارتتى. ول بۇل ويىن ماريانو راحويعا حات ارقىلى جەتكىزگەن. ءوز كەزەگىندە مادريدتىكتەر ايماققا 155 بابى قولدانىلاتىنىن مالىمدەدى.
«ەگەر ورتالىق بيلىك ديالوگقا كەلمەي, «رەپرەسسيانى» جالعاستىرا بەرەر بولسا, كاتالونيا پارلامەنتى 10 قازاندا وتپەي قالعان داۋىس بەرۋدى قايتا وتكىزۋى مۇمكىن», دەلىنگەن پۋچدەموننىڭ حاتىندا.
كەشە جەرگىلىكتى ۋاقىت بويىنشا ساعات 10:00-دە يسپانيا بيلىگىنىڭ كاتالونياعا بەرگەن ۋاقىتى اياقتالدى. وسى ۋاقىت ارالىعىندا كارلەس پۋچدەمون تاۋەلسىزدىك يدەياسىنان باس تارتۋى ءتيىس بولاتىن.
ايتا كەتەيىك, 1 قازان كۇنى وتكەن رەفەرەندۋم ناتيجەسى بويىنشا كارلەس پۋچدەمون تاۋەلسىزدىك دەكلاراتسياسىنا قول قويعان بولاتىن. الايدا, مادريدپەن كەلىسسوزدەر رەتتەلمەيىنشە رەسمي تۇردە جاريالاۋدى كەيىنگە قالدىردى. ال يسپانيا بيلىگى بۇل رەفەرەندۋم زاڭسىز تۇردە وتكەنىن حابارلادى.
«كاتالونيانىڭ تاۋەلسىزدىگىن جاريالاعانى ازىرگە بەلگىسىز. ەگەر العان بەتتەرىنەن قايتپاسا ۇكىمەت ءبىر جاقتى ارەكەت ەتۋگە ءماجبۇر بولادى. ال رايىنان قايتسا ءبىز ءبىر ۇستەل باسىنا وتىرۋعا دايىنبىز», – دەگەن راحوي سارسەنبى كۇنگى پارلامەنت جيىندا.
يسپانيا بيلىگى كاتالونياعا وسىمەن ەكىنشى رەت ۋلتيماتۋم قويدى. العاشقىسى دۇيسەنبى كۇنى, ياعني 16 قازاندا اياقتالعان بولاتىن.
كونستيتۋتسيانىڭ 155-بابىندا نە ايتىلعان؟
«ەگەر ءوزىن-ءوزى باسقاراتىن اۋماق كونستيتۋتسيا نەمەسە باسقا زاڭدار نەگىزىندە جۇكتەلگەن مىندەتتەرىن ورىنداماسا نەمەسە يسپانيانىڭ بارلىق مۇددەسىنە كەرى اسەر ەتەر بولسا, وندا بيلىك جوعارىدا ايتىلعان ماسەلەلەردىڭ الدىن الۋ ءۇشىن ءتيىستى شارالاردى قابىلداي الادى», دەلىنگەن.
ايان ءابدۋالي,
«ەگەمەن قازاقستان»
