ءىس-شارادا كىرىسپە ءسوز سويلەگەن ز.باليەۆا مۇنداي جيىندار وتكىزۋ ەلدەگى دەنساۋلىق سالاسىنداعى بىرقاتار كۇردەلى ماسەلەلەردى انىقتاپ, ولاردىڭ شەشىمىن تابۋعا مۇمكىندىك بەرەتىنىنە توقتالدى. سونداي-اق, دەپۋتات اق حالاتتى ابزال جانداردىڭ ەڭبەگىن جوعارى باعالادى.
«قازىرگى تاڭدا قازاقستاندا 5,5 ميلليونعا جۋىق بالا بار. ولاردىڭ دەنساۋلىعىنا قاتىستى شەشىمىن تاپپاعان تۇيتكىلدەر جەتەرلىك. ماسەلەن, جىل سايىن اۋتيزممەن اۋىراتىن بالالار سانى 13 پايىزعا كوبەيىپ وتىر. ءبىز مۇنداي كەلەڭسىزدىكتىڭ الدىن الۋ شارالارىن قاراستىرۋىمىز قاجەت. اتا-انالاردى مازالاعان سۇراقتارعا جاۋاپ تابۋ دا ۋاقىت كۇتتىرمەيتىن ماسەلە», دەدى بالا قۇقىقتارى جونىندەگى ۋاكىل ز.باليەۆا.
ءماجىلىس دەپۋتاتى دەنساۋلىق سالاسىندا اتقارىلىپ جاتقان جۇمىستاردىڭ تيىمدىلىگىن اتاپ كورسەتتى. ونىڭ ايتۋىنشا, وسىنداي عىلىمي-تاجىريبەلىك كونفەرەنتسيالاردىڭ ارقاسىندا قازاقستاننىڭ بەدەلى اسقاقتاتىپ, دۇنيەنىڭ ءتورت بۇرىشىنان كەلگەن مارقاسقا دارىگەرلەردىڭ باسىن قوساتىن الاڭعا اينالادى. ز.باليەۆا بۇگىندە ەلىمىزدىڭ دارىگەرلەرى شەتەلدەن كەلگەن ارىپتەستەرىنە ۇلگى بولاتىن دەڭگەيگە جەتكەنىن دە تىلگە تيەك ەتتى.
دەنساۋلىق ساقتاۋ ۆيتسە-ءمينيسترى ل.اقتاەۆانىڭ سوزىنە سۇيەنسەك, ەلىمىزدە انا مەن بالانىڭ جاعدايىنا ءجىتى كوڭىل ءبولىنىپ كەلەدى. ل.اقتاەۆا بۇل سالانىڭ باسىم باعىتتاردىڭ ءبىرى ەكەنىن اتاپ ءوتتى. ۆيتسە-مينيستر وسىنداي جەمىستى جۇمىستاردىڭ ناتيجەسىندە ەلدەگى دەموگرافيالىق جاعداي جاقسارىپ كەلە جاتقانىن ءسوز ەتتى.
«كەيىنگى 25 جىل كولەمىندە بالا تۋ كورسەتكىشى ۇلعايىپ, قايتىس بولۋ جيىلىگى ازايدى. ماسەلەن, انالاردىڭ دۇنيەدەن ءوتۋى 6 ەسەگە, سابيلەردىڭ شەتىنەۋى 3 ەسەگە تومەندەدى. حالىقتىڭ ورتاشا ءومىر ءسۇرۋ جاسى 72-گە دەيىن ءوستى», – دەگەن ل.اقتاەۆا دەنساۋلىق سالاسىندا اتقارىلىپ جاتقان جۇمىستار توڭىرەگىندە اڭگىمە ءوربىتتى.
ۆيتسە-مينيستر سانيتارلىق اۆياتسيا ورتالىعىنىڭ جۇمىسىنا دا نازار اۋداردى. ونىڭ سوزىنە ساي, 2011 جىلدان بەرى ورتالىق قىزمەتكەرلەرى 10 مىڭعا جۋىق مارتە اۋەگە كوتەرىلىپ, 13 مىڭنان استام ناۋقاسقا كومەك كورسەتتى. سونىڭ جارتىسىنا جۋىعى بالالار بولسا, 2359-ى جۇكتى ايەلدەر. وسى ورايدا, ل.اقتاەۆا اكۋشەرلىك-گينەكولوگيالىق سالا قىزمەتكەرلەرىنىڭ ەڭبەگىنە ەرەكشە توقتالدى. ءسوزىن قورىتىندىلاي كەلە, ۆيتسە-مينيستر قاتىسۋشىلاردى الماتى توڭىرەگىندە اۋە اپاتىنان قازا تاپقان دارىگەرلەردى ءبىر مينۋت ۇنسىزدىكپەن ەسكە الۋعا شاقىردى.
حالىقارالىق عىلىمي-تاجىريبەلىك كونفەرەنتسيا بارىسىندا «داننينى گاسليني پەدياتريالىق ينستيتۋتىنىڭ» مەديتسينا ديرەكتورى, يتاليالىق سيلۆيو دەل بۋونو, اقش-تاعى «قانسىز مەديتسينا جانە حيرۋرگيا ورتالىعىنىڭ» مەديتسينا ديرەكتورى يان سي سەسكي, «University Medical Center» كورپوراتيۆتىك قورىنىڭ باسقارا توراعاسى الماس قۇرمانوۆ بايانداما جاسادى.
پلەنارلىق وتىرىستان كەيىن اكۋشەرلىك, گينەكولوگيا, پەدياتريا سىندى ەڭ ماڭىزدى 50-دەن استام تاقىرىپتا سەكتسيالىق وتىرىستار ءوتتى. سونداي-اق, كونفەرەنتسيادا دياگنوستيكامەن ەمدەۋدىڭ قازىرگى زامانعى تەحنولوگيالارى, ستاتسيوناردى الماستىرۋ جانە رەسۋرس ۇنەمدەۋ ادىستەرىن ەنگىزۋ ارقىلى انا مەن بالاعا كورسەتىلەتىن مەديتسينالىق كومەك تۇرلەرىن جەتىلدىرۋ ماسەلەلەرى تالقىلاندى. كونفەرەنتسيا جۇمىسىنا قاتىسقان وتاندىق جانە شەتەلدىك ماماندار انا مەن بالا دەنساۋلىعىن قورعاۋ سالاسىنداعى زاماناۋي جەتىستىكتەر تۋرالى باياندامالار جاسادى. الىستان ات تەرلەتىپ كەلگەن بىلىكتى ماماندار بىرقاتار شەبەرلىك ساباقتارىن وتكىزىپ, جاڭا يننوۆاتسيالىق تەحنولوگيالاردى ۇيرەتتى.
اباي اسانكەلدى ۇلى,
«ەگەمەن قازاقستان»
