ەگەمەندىكتىڭ شيرەك عاسىردان استام تاريحىندا ەلىمىزدىڭ ءاربىر وڭىرىنەن بوي كوتەرگەن ەڭسەلى ەسكەرتكىشتەر مەن مونۋمەنتتەر دە ەلدىكتىڭ ەرەن قالپىن تانىتادى. ازاتتىقتىڭ اق تاڭىنا جەتۋ جولىنداعى تاعدىرلى ساتتەر, شەشۋشى كەزەڭدەر دە ۇلتتىق ساۋلەت ونەرى ارقىلى كەڭ دالامىزدا كورىنىس تاپتى. ازاتتىق جولىندا ايقاسقان الىپتار بەينەسى دە ەلدىگىمىزدىڭ ەرەن بەلگىسىندەي كورىنىس بەرەدى.
تاراز قالاسىنداعى تولە بي كوشەسىنىڭ بويىندا «گۇلدەنگەن قازاقستان» اتتى مونۋمەنتالدى-ارحيتەكتۋرالىق كەشەن بار. مۇندا تارازدىق تۇرعىندار كۇن سايىن سەرۋەندەپ, سەيىل قۇرادى. اتالعان مەموريالدىڭ جانىنان ەل تاۋەلسىزدىگىنىڭ 25 جىلدىعىنا وراي, «تاۋەلسىزدىك مونۋمەنتى» بوي كوتەردى. مونۋمەنت قۇرىلىسى وتكەن جىلى 30 قاراشا كۇنى تاپسىرىلعان بولاتىن. قۇرىلىس جۇمىستارىن جۇرگىزگەن باس مەردىگەر «ۆيزارت نت» جاۋاپكەرشىلىگى شەكتەۋلى سەرىكتەستىگى.
مونۋمەنت باستاپقىدا تريۋمفالدى اركا پىشىندە جوسپارلانعان. قازاق حالقىنىڭ ەجەلگى تاريحى تۇرىك ساقتارىنان باستاۋ الاتىنىن ەسكەرەتىن بولساق, شىعىستا اركا ماڭگىلىك ماحاببات پەن باقىتتىڭ سيمۆولى بولىپ سانالادى. ال مونۋمەنتتەگى شاڭىراق مەملەكەتتىڭ ءتۇپ نەگىزى – وتباسىنىڭ بەينەسى رەتىندە بەدەرلەنگەن. سونداي-اق سەگىز بۇرىشتى جۇلدىز قازاقستاندى بولاشاققا باستايتىن جول ىسپەتتى جوبانىڭ ماعىناسىن اشا تۇسەدى. مونۋمەنتتىڭ بيىكتىگى 15,8 مەتر, كولەمى 3,5 مەتر.
كونە شاھارداعى الىپ مونۋمەنت سۋرەتشى-مونۋمەنتشى امانات نازارقۇلوۆ جانە ساۋلەتشىلەر اسقار رىسپاەۆ, ءىلياس بەكەجانوۆ, ءجۇسىپ سۋانبەكتىڭ شىعارماشىلىق بىرلەستىگىنەن تۋعان. ال نىساننىڭ كومپوزيتسياسىندا تاۋەلسىز قازاقستاننىڭ بۇگىنگى تاڭدا قول جەتكەن جەتىستىكتەرى سۋرەتتەر ارقىلى ايشىقتالعان.
شاھاردىڭ شىرايىن اشىپ, كوركىنە كورىك قوسىپ تۇرعان وسىناۋ الىپ مونۋمەنت ەل تاۋەلسىزدىگىن مەيلىنشە سيپاتتايدى. نىسان بويىندا كورىنىس تاپقان ۇلتتىق ناقىش, ۇلتتىق ۇعىم-تۇسىنىك تە ەلدىڭ عاسىرلار بويى ساقتالىپ كەلە جاتقان ءداستۇر ساباقتاستىعىنان حابار بەرەدى. تولە بي كوشەسىنىڭ بويىنداعى ەڭسەلى ەسكەرتكىش اسقاقتىعىمەن دە كوز تارتادى.
حاميت ەسامان,
«ەگەمەن قازاقستان»
جامبىل وبلىسى
