وسىلايشا قالالىق پەريناتالدىق ورتالىقتا 2015 جىلدىڭ 21 شىلدەسىندە ءتورتىنشى رەت ۇشەم دۇنيەگە كەلسە, 5 تامىزدا تورتەم دۇنيەگە كەلگەن بولاتىن. وعان دەيىنگى تورتەمدەر الماتىدا 2010 جىلى تۋعان-دى.
ءتىل-كوزىمىز تاسقا! قازىر بۇل بالاقايلاردىڭ بارلىعى دا امان-ەسەن, قىلىقتارى ءتاپ-ءتاتتى بولىپ ءوسىپ كەلەدى.
تابيعي جولمەن تورتەم تاۋىپ, وتباسىنىڭ توبەسىن كوككە جەتكىزگەن بايان ابدۋللينانىڭ بۇعان دەيىن دە ءۇش ۇلى بار بولاتىن. ءسويتىپ ەكى بىردەي ديپلومى بار بايان ءبىر كۇندە «التىن القالى» انا بولىپ شىعا كەلگەن-ءدى.
جەتى بالانى جەتكىزۋگە كۇيەۋى كاسىپكەر قاناتتىڭ شاماسى جەتەتىنىنە شۇكىرشىلىك ايتقان قۇرساعى قۇتتى كەلىنشەكتىڭ اياعى اۋىر كەزىندە قينالعانى دا راس. بىراق بۇگىندە ونىڭ بارلىعى كورگەن تۇستەي.
ەگىز بالانى دا ەكىنىڭ ءبىرى تاۋىپ جاتقان جوق, باستاپقىدا بايانعا دارىگەرلەر قۇرساعىنداعى بالانىڭ ۇشەم ەكەنىن ايتقاندا, ازداپ ەسەڭگىرەپ قالسا, قالقامانداعى اۋرۋحاناعا تۇسىك تاستاپ قويۋ قاۋپى تۋىنداپ, قايتا قارالعاندا ۇشەم ەمەس, ىشتەگى بالالار تورتەم بولىپ شىققاندا, ءتىپتى تاڭ قالادى. سول شارانالاردىڭ بارلىعى دا امان-ەسەن شىرىلداپ دۇنيەگە كەلدى.
وسى پەريناتالدىق ورتالىقتا 25 جاستاعى تولعاناي سلامحان اتتى سۇيكىمدى كەلىنشەك ءىنجۋ, اقنۇر جانە ىڭكار اتتى سابيلەردى امان-ەسەن بوساندى. سول كەزدە جۇماققا باراتىن ءۇش قىزدىڭ اكە-شەشەسى جاركەنتتىڭ تۋمالارى ەكەندىگى, قالادا جالدامالى پاتەردە تۇراتىندىعى ايتىلعان. ۇشەمنەن بولەك بۇل جۇپتىڭ ەكى جاسار ايشا ەسىمدى قىزدارى بولاتىن.
قۋانىشى ۇزاعىنان بولعىر بالالاردىڭ اكەسى باۋىرجان ساتىبالديەۆ قۇرىلىسشى. قالالىق اكىمدىكتىڭ وكىلدەرى ءبىر كۇندە كوپ بالالى بولىپ شىعا كەلگەن جۇپقا تەزىرەك باسپانالى بولۋلارىنا ىقپال ەتەتىندىكتەرىن مالىمدەگەنى دە ەستە.
سول كەزدە دارىگەرلەر بۇل بالالاردىڭ بارلىعى دا شىنىدان شىقپاعانىن, تابيعي جولمەن جارىق دۇنيە ەسىگىن اشقانىن ايتقان ەدى.
بۇگىنگى تاڭدا تاۋەلسىز قازاقستان تاريحىندا نەبارى بەس وتباسىندا عانا تورتەم بار دەسەدى. سولاردىڭ ىشىندە 2015 جىلدىڭ 5 تامىزىندا ومىرگە كەلگەن ءبىر قۇرساقتاعى ەگىزدەر قازاق تاريحىندا قالادى. سەبەبى, ولار – ەشقانداي دارىگەردىڭ ارالاسۋىنسىز, تابيعي جولمەن دۇنيەگە كەلگەن العاشقى تورتەمدەر بولعانىن جوعارىدا اتاپ وتتىك.
كەشە عانا دۇنيە ەسىگىن بار بولعانى ءبىر كەلىنىڭ ار جاق-بەرجاعىنداعى سالماقپەن اشقان شاقالاقتار بۇگىن بالاباقشا تابالدىرىعىن اتتاپتى. بۇل وتباسى سوڭعى كەزدە عانا سابيلەرىنىڭ سۋرەتتەرىن ەلگە كورسەتە باستادى.
ء«تورت بىردەي ءسابيدى ومىرگە اكەلىپ, ءوسىرۋ وڭاي ەمەس. شارشايسىڭ, بىراق تورتەم تۋعانىما ەشقاشان وكىنگەن ەمەسپىن», دەپتى جەتى بالانى ومىرگە اكەلگەن باتىر انا بايان ابدۋللينا «كۇندەلىكتى ءومىر» پورتالىنا بەرگەن سۇحباتىندا.
قازاق تاريحىنداعى ەڭ العاشقى ءبىر قۇرساقتان شىققان ءتورت ەگىز بولعاندىقتان پەرزەنتتى بولۋدى كوپتەن كوكسەپ جۇرگەن ەرلى-زايىپتىلار ەرسەيىتوۆتەر وتباسىنداعى سابيلەردىڭ كيىمىن ىرىمداپ, «جۇعىستى بولسا ەكەن» دەپ الادى ەكەن.
ايناش ەسالي, «ەگەمەن قازاقستان»
