- ەرتەڭ ءبىزدى كەزەكتى فۋتبول مەرەكەسى كۇتىپ تۇر. ءبىز جوعارى دەڭگەيدە ونەر كورسەتىپ, جاقسى ناتيجەگە قول جەتكىزەمىز دەپ ويلايمىن. «ماككابي» سوڭعى ءجىلدارى وزىن جاقسى قىرىنان كورسەتىپ كەلەدى. اسىرەسە, جوردي كرويفف كەلگەلى قارقىنىن كۇشەيتتى. الايدا, ءبىز ءوز ويىنىمىزعا كوڭىل ءبولۋىمىز كەرەك. سەبەبى, جانكۇيەرلەرىمىزدىڭ الدىندا ونەر كورسەتەمىز. ولاردىڭ قولداۋى بىزگە قوسىمشا كۇش بەرەدى.
- «ماككابيگە» قارسى ەكى ويىندى توپتىق كەزەڭدەگى ماڭىزدى ماتچتار رەتىندە قاراستىرۋعا بولا ما؟ ەكى كەزدەسۋدىڭ ناتيجەسى توپتىق كەزەڭگە قانشالىقتى اسەر ەتەدى؟
- نەگىزى ءسىزدىڭ پىكىرىڭىزبەن كەلىسۋگە بولادى. ءبىز جەڭىسكە جەتۋدى ماقسات ەتۋىمىز كەرەك. جانكۇيەرلەرىمىزدى قۋانتۋ ءۇشىن قولىمىزدان كەلگەننىڭ ءبارىن جاسايمىز. ەگەر توپتىق كەزەڭنەن وتە الساق, بۇل ءبىزدىڭ دەڭگەيىمىزدىڭ كوتەرىلگەنىنىڭ بەلگىسى.
- «ەرتىسكە» قارسى ويىندا كوماندا شارشاڭقىلاۋ كورىندى. ەكىنشى تايمدا دەڭگەيىنىڭ جوعارىلىعىنىڭ ارقاسىندا جەڭىسكە جەتتى دەپ تە ايتۋعا بولادى. ويىنشىلار بۇگىنگە دەيىن ءوز قالىپتارىنا كەلىپ ۇلگەردى مە؟
- ەگەر توعىز ايدان كەيىن كوماندانىڭ دايىندىعى ناشار دەيتىن بولساق, ءبىز بىرنارسەدەن ءمۇلت كەتكەن سياقتىمىز. جىگىتتەردىڭ ءاربىر ۋاقىتى ەسەپتەۋلى ەكەنى تۇسىنىكتى. الايدا, ءبىز بارىنە ساقاداي ساي بولۋىمىز كەرەك.
- كوماندادا قانداي دا ءبىر قيىندىقتار بار ما؟
- ۇجىمدا جاراقات ماسەلەسىنە قاتىستى ازداعان قيىندىقتار بار. ماسەلەن, دجوردجە دەسپوتوۆيچ پەن لاسلو كلياينحايسلەر ەمدەلىپ جاتىر. سردجان گراوۆاتس ءوز قالپىنا ءالى كەلمەدى. جاتتىعىپ ءجۇر. مارين ءانيچيچتىڭ دە جاعدايى سونداي. فۋتبول بولعاننان كەيىن وزىندىك قيىندىقتارى دا بار. بىراق ءبىز بۇل تىعىرىقتان شىعۋ جولدارىن قاراستىرۋىمىز كەرەك.
- مۋجيكوۆ ەرتەڭ الاڭعا شىعا الا ما؟
راس, مۋجيكوۆقا ەمدەلۋ كەرەك. بىراق بۇل جاراقاتىن چەمپيوناتتاعى ۇزىلىستە ەمدەيتىن بولادى. ىشكى بىرىنشىلىك اياقتالعانعا دەيىن ول مۇمكىندىگىنشە كوبىرەك الاڭعا شىعۋعا تىرىسادى. قازىر باستى ماسەلە, سەرىكجان 12 كۇن بويى جاتتىقپادى. الايدا, ەرتەڭگى ويىندا كومانداعا كومەكتەسۋ ءۇشىن بارىن سالۋى كەرەك. مۋجيكوۆ ارىپتەستەرى سەكىلدى ىلعي دا جوعارى دەڭگەيدە ونەر كورسەتۋگە دايىن ەكەنىن جاقسى بىلەمىن.
- سىزگە تۇركيا چەمپيوناتىنداعى كوماندالاردىڭ قىزىعۋشىلىق تانىتىپ وتىر...
- قازىر ويىمىزدىڭ ءبارى «ماككابيگە» قارسى ماتچ جايلى. ال قالعان ماسەلەلەردى كەيىنىرەك قاراستىراتىن بولامىز. ۇسىنىس تۇسسە قاراستىرۋعا دايىنبىز.
- بۇل كەزدەسۋدە «استانانى» فاۆوريت رەتىندە قاراستىرۋعا بولا ما؟
- «استانا» ءوزىن ەۋروپالىق كوماندالارعا قارسى ويىندا فاۆوريت رەتىندە سەزىنە المايدى. ءوز مۇمكىندىگىمىزدى شەكتەن تىس اسىرمالاۋعا بولمايدى. ەگەر ءبىز سوڭعى ءۇش جىلدا ەۋروپادا ونەر كورسەتىپ جۇرگەن بولساق, ءوزىمىزدى «رەالدىڭ» دەڭگەيىنە قويا المايمىز. الايدا, فۋتبولدا ەشقاشان فاۆوريت كوماندا جەڭىسكە جەتە بەرمەيدى دەگەن پىكىرىمنەن اينىعان ەمەسپىن. ەگەر مۇنداي كەزدەسۋلەردە ءوزىمىزدى فاۆوريت رەتىندە قاراستىرعىمىز كەلسە كوبىرەك قارجى ءبولىنۋى كەرەك.
ايان ءابدۋالي,
«ەگەمەن قازاقستان»
