اسا قامقور, ەرەكشە مەيىرىمدى اللانىڭ اتىمەن باستايمىن!
حالقىمىزدىڭ بي-شەشەندەرى مەن اقىن-جىراۋلارى دا ارقاشان وسيەتتى سوزدەرى مەن عيبراتتى تولعاۋلارىندا, ولەڭ-جىرلارىندا ءوزارا كەلىسىمدى ناسيحاتتاعان. مايقى ءبيدىڭ:
«التاۋ الا بولسا, اۋىزداعى كەتەدى,
تورتەۋ تۇگەل بولسا, توبەدەگى كەلەدى», دەگەن ناقىل ءسوزى قانشا عاسىر وتسە دە ۇرپاققا ونەگە.
ەلباسىنىڭ يگى باستاماسىمەن ەلىمىزدە قالىپتاسقان دىنارالىق تاتۋلىق, ۇلتارالىق كەلىسىم – شيرەك عاسىرعا تاتيتىن تاۋەلسىز ەلىمىزدىڭ جەتكەن باستى جەتىستىكتەرىنىڭ ءبىرى.
رۋحاني كەلىسىم, ۇلتتار مەن ءداستۇرلى دىندەر اراسىنداعى بىرلىك – باعا جەتپەس بايلىعىمىز, ال تۇراقتىلىق – تۇعىرىمىز. بۇگىنگى بەرەكەلى كۇنگە بىرلىكتىڭ ارقاسىندا جەتتىك. ەلدىڭ الەۋمەتتىك-ەكوميكالىق كورسەتكىشى حالىقتاردىڭ ءوزارا تاتۋلىعى نەگىزىندە دامي تۇسەتىنى تۇسىنىكتى. ەل باسقارعان پاراساتتى باسشىلار قاشان دا بىرلىك پەن تاتۋلىققا اسا ءمان بەرگەن.
كۇنتىزبەمىزگە 18 قازاننىڭ رۋحاني كەلىسىم كۇنى رەتىندە ەنۋى – قازاق توپىراعىنا بەيبىتشىلىك ورناتىپ, تۇراقتى قوعام قۇرۋ يدەياسىنان تۋعان ۇلكەن باستاما.
اللاعا شۇكىر, ءبىز الميساقتان بەرى مۇسىلمانبىز. ءVIIى عاسىردا ورتالىق ازياعا, ونىڭ ىشىندە قازاق توپىراعىنا جەتكەن يسلام سول داۋىردەن بەرى حالقىمىزدىڭ جۇرەر جولى, مەملەكەتىمىزدىڭ رۋحاني تىرەگى بولىپ كەلەدى.
يسلام ءدىنى – بەيبىتشىلىك, اماندىق دەگەن ۇعىمداردى بىلدىرەدى. اللا تاعالانىڭ ءوزىنىڭ سوڭعى ەلشىسىن جىبەرۋدەگى ماقساتى قاسيەتتى قۇراننىڭ ء«انبيا» سۇرەسىنىڭ 107-اياتىندا بىلايشا باياندالادى: ء«بىز سەنى الەمدەرگە تەك راقىم ەتىپ قانا جىبەردىك».
راسىندا, ءبىز كەشەگى اۋمالى زاماندا قيىندىققا ءتوزىپ, سىناققا سابىر ەتىپ, ازاتتىقتىڭ اق تاڭىن اتىرعان حالىقپىز. سوندىقتان دا تاۋەلسىزدىك, بىرلىك, بەيبىتشىلىك, تاتۋلىق – ۇلتىمىز ءۇشىن ۇلى ۇعىم, قاستەرلى ءسوز.
اتا-بابالارىمىزدىڭ اسقاق ارمانى مەن ءور رۋحىنىڭ, يمانعا بەرىك مۇسىلماندىعىنىڭ ارقاسىندا كەلگەن تاۋەلسىزدىك – اللانىڭ بىزگە بەرگەن سىيى ءھام نىعمەتى. جاراتۋشى راببىمىزعا سانسىز شۇكىرلەر ايتامىز, ەگەمەندىگىمىزبەن بىرگە ءدىنىمىز دە وركەندەپ, ەلىمىزدە ەڭسەلى مەشىتتەر مەن مەدرەسەلەر بوي كوتەردى, الەۋمەتتىك جاعدايىمىز تۇزەلىپ, ەكونوميكامىز دامۋ ۇستىندە. ەندەشە, حالىقتىڭ ءال-اۋقاتىن بۇدان ءارى كوتەرۋ ءۇشىن بىزگە ەڭ اۋەلى بىرلىك اۋاداي قاجەت. ويتكەنى بەيبىتشىلىك – ءبىزدىڭ باقىتىمىز بەن باعا جەتپەس بايلىعىمىز.
قازىرگىدەي الماعايىپ زاماندا وركەنيەتتەر اراسىنداعى بەيبىت كەلىسىمدى ساقتاۋ – وزەكتى ماسەلەلەردىڭ ءبىرى. وسى تۇرعىدان العاندا, دىندەر اراسىنداعى ۇنقاتىسۋدى دامىتۋ – بۇكىل الەمدىك جاۋاپكەرشىلىك. تاۋەلسىز قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ ءدىننىڭ قوعامداعى ماڭىزدى ءرولىن ەسكەرىپ, ءار ءۇش جىل سايىن الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋگە ۇيىتقى بولدى. «زامان كۇندە وزگەرەدى, ال ءدىنىمىز – ماڭگىلىك», دەگەن قاناتتى ءسوزدى ايتقان ەلباسى الەمدىك ءداستۇرلى ءدىن كوشباسشىلارىن ءبىر ۇستەل باسىنا جيناپ, ورتاق ماقساتتار تۋرالى ساليقالى ءسوز ايتۋعا مۇمكىندىك تۋعىزدى.
يسلام ءدىنى مەملەكەتتە, قوعامدا تىنىشتىق, ادىلدىك بولۋىن كوزدەيدى. ادامدى سوعان تاربيەلەيدى. ولاي بولسا, ءبىز تازا ءدىني ىستەردەن وزگە وسىنداي ۇلى مۇراتتاردى دا نىسانا ەتۋىمىز كەرەك. ويتكەنى ادام بالاسى قايىرلى دا ىزگى امالدارىمەن عانا جاراتۋشىعا جاقىندايدى. قاسيەتتى قۇراندا: ء«بىر-بىرلەرىڭە ىزگى ىستەردە, تاقۋالىقتا كومەكتەسىڭدەر. كۇنا جاساۋعا, دۇشپاندىققا جاردەمشى بولماڭدار...» دەلىنگەن. («مايدا» سۇرەسى, 2-ايات).
اللا تاعالا حالقىمىزدىڭ بىرلىگى مەن بەرەكەسىن ارتتىرىپ, تاۋەلسىزدىگىمىزدى باياندى ەتكەي! تىلەگىمىز قابىل, مۇراتىمىز اسىل بولعاي! ءامين!
ەرجان قاجى مالعاجى ۇلى,
قازاقستان مۇسىلماندارى ءدىني
باسقارماسىنىڭ توراعاسى,
باس ءمۇفتي
