فورۋمعا اراب مەملەكەتتەرى ليگاسىنىڭ سىرتقى ىستەر مينيسترلەرى كەڭەسىنىڭ توراعاسى ءارى ءدجيبۋتيدىڭ سىرتقى ىستەر ءمينيسترى ماحمۇد ءالي يۋسۋف جانە اراب مەملەكەتتەرى ليگاسىنىڭ باس حاتشىسى احماد ابىلگەيت قاتىستى. فورۋم جۇمىسىنا تۇرىكمەنستان بايقاۋشى ەل رەتىندە قاتىستى.
فورۋمنىڭ اشىلۋى راسىمىندە ءسوز سويلەگەن تاجىكستان پرەزيدەنتى ەمومالي راحمون دامىعان اراب ەلدەردىڭ قاراجاتى ەسەبىنەن دامىپ بارا جاتقان مۇسىلمان ەلدەرىنە جاردەم بەرۋ قور قۇرۋدى ۇسىندى.
ا.كامالدينوۆ ءوز سوزىندە فورۋمنىڭ ەكونوميكالىق الەۋەتىن, ونىڭ ىشىندە قازاقستان رەسپۋبليكاسىنىڭ حالىقارالىق باستامالارىن دا بارشانىڭ پايداسىنا ىسكە اسىرۋ ءۇشىن بارىنشا پايدالانۋعا شاقىردى.
فورۋم اياسىندا اراب ەلدەرى جانە ورتالىق ازيا مەن ازەربايجان اراسىنداعى ەكونوميكالىق ىنتىماقتاستىقتى دامىتۋ ماسەلەلەرمەن قوسا وڭىردەگى بەيبىتشىلىك پەن قاۋىپسىزدىك ماسەلەلەرى دە كەڭىنەن تالقىلاندى.
ءىس-شارا بىتىسىمەن قابىلدانعان دۋشانبە دەكلاراتسياسىندا فورۋم قاتىسۋشىلارى ونىڭ بۇل فورمات شەڭبەرىندە ىقپالداستىقتى ودان ءارى دامىتۋعا باعىشتالعان قازاقستان تاراپىنىڭ حالىقارالىق باستامالارىنا قولداۋ ءبىلدىرىلدى. فورۋم قارساڭىندا, ياعني 15 قازان كۇنى دۋشانبەدە ءىس-شاراعا قاتىسۋشى ەلدەردىڭ جوعارى لاۋازىمدى تۇلعالاردىڭ بوسقوسۋى ورىن الدى.
ورتالىق ازيا ەلدەرى مەن ازەربايجانمەن اراب ەكونوميكالىق ىنتىماقتاستىعى فورۋمى ساۋد ارابياسى كورولدىگىنىڭ باستاماسىمەن قۇرىلعان جيىن. 2014 جىلعى مامىر ايىندا ەر-رياد قالاسىندا قازاقستان تاراپىنىڭ قاتىسۋىمەن وتكەن فورۋمنىڭ تۇڭعىش وتىرىسىنىڭ قورىتىندىلارى بويىنشا رياد دەكلاراتسياسى قابىلدانىپ, اراب مەملەكەتتەرى ليگاسى مەن ورتالىق ازيا ەلدەرى مەن ازەربايجان اراسىنداعى ىنتىماقتاستىق مەموراندۋمعا قول قويىلدى.
دۋشانبەدە وتكەن فورۋم جۇمىسىنا 28 ەلدىڭ, ولاردىڭ ىشىندە اراب مەملەكەتتەرى ليگاسىنىڭ 21 مۇشە ەلدىڭ جانە ورتالىق ازيا مەن ازەربايجان مەملەكەتتەرىنىڭ دەلەگاتسيالارى قاتىستى.
