ەڭ اۋەلى ۇلتىمىز ءۇشىن سۋرەت ونەرىنىڭ ءالى دە بولسا جاس ونەر ەكەنىن ەسكە الۋعا تۋرا كەلەدى. وزىنە سۇقتانا قاراعانداردىڭ جانارىنداعى سۇيىسپەنشىلىكتەن وت الىپ, عۇمىرى عاسىردان عاسىرعا جالعانىپ كەلە جاتقان ايگىلى «دجاكوندالاردىڭ» سالىنعانىنا سەگىز ءجۇز جىل بولسا, قازاقتىڭ كاسىبي سۋرەت ونەرىنىڭ پايدا بولعانىنا سەكسەن جىلدان ەندى اسىپ بارادى. تانىمعا توڭكەرىس جاسايتىنداي قۇبىلىس بولىپ كەلگەن قىلقالام يەلەرى قازاق سۋرەت ونەرىندە كوپ بولماعانى اۋىر دا بولسا بارشامىز مويىنداۋعا ءتيىس بەلگىلى شىندىق. بۇل ورايدا ساۋساقپەن ساناپ الۋعا بولاتىن ازدىڭ اراسىنان ەركىن ويىمەن ەرەكشە جانرداعى تىڭ دۇنيەلەر تۋدىرىپ, بەينەلەۋ ونەرىندەگى وركەنيەتتى باعىتتىڭ ءبارىن ۇلتتىق دۇنيەتانىمعا نەگىزدەلگەن ءداستۇرلى ۇعىممەن ادەمى ۇيلەستىرە بىلگەن تۇلعالىق كەمەل شاعىنا كۇن-ءتۇن دەمەي تەر توگىپ جەتكەن قازاقستاننىڭ ەڭبەك سىڭىرگەن قايراتكەرى, تالانتتى سۋرەتشى الپىسباي قازىعۇلوۆتىڭ اتىن ايرىقشا اتاۋعا بولادى.
ادامدارعا بەلگىلى دۇنيەنى وزگەشە قىرىنان تانىپ, مايلى بوياۋدان مازمۇن تاپقىسى كەلەتىن سۋرەتشىنى باسقا كاسىپ يەلەرىمەن سالىستىرساق, ونىڭ ەرەكشەلىگى دە, ارتىقشىلىعى دا جاساعان دۇنيەسىنىڭ جالقىلىعىندا ەكەنىن كورەمىز. سۋرەتشىنىڭ جۇمىسى ءبىر-اق رەت جازىلۋىمەن قۇندى. ول جوعالسا, ب ۇلىنسە, شەدەۆر مەن شەبەرلىك قايتالانبايدى. سوندا ول سالعان كارتينانى ەشكىم تۇسىنبەسە, جازعان جالعىز دانا دۇنيەسىنىڭ اماندىعى ءۇشىن ۇنەمى الاڭدارلىق جاعدايدا ءومىر سۇرسە, سۋرەتشى نەسىنە بۇل كاسىپتى وزىنە سەرىك ەتەدى دەگەن سۇراق تۋادى.
ءوزى ءۇشىن. قىرىق جىل بويى قولىنان قىلقالامى تۇسپەي كەلە جاتقان, ءبىز شىعارماشىلىعىن ءسوز ەتكەلى وتىرعان سۋرەتشى الپىسباي قازىعۇلوۆ كەنەپتىڭ الدىنا كەلىپ الىپ «وسى ويىمدى بوياۋ تىلىمەن سويلەتسەم, حالىققا ۇناماي قالىپ, مەنى سىناپ تاستاماي ما, يدەيام كوڭىلىنەن شىقپاي, مادەنيەت مينيسترلىگى ماڭايلاتپاي قويسا, قايتەم؟» دەگەن ويدى ءتىپتى دە ويلامايتىنى انىق. وسى ۋاقىتقا دەيىن 7000 كارتينا سالعان ا.قازىعۇلوۆ شابىتتىڭ تۇلپارىنا مىنگەن ساتتە جۇرتتىڭ كوڭىلىنەن شىعۋدى ويلاپ جۇمىس ىستەگەن بولسا, بۇگىنگى شىققان بيىگىنە تابان تىرەي الماعان بولار ەدى. 7000 كارتينا دەگەن – ءوزىن قانشا كىشىپەيىل, قاراپايىم ۇستاسا دا, ۇلتتىڭ ينتەللەكتۋالدى بايلىعىن قۇراستىرۋعا قىزمەت ەتىپ جۇرگەن ەڭبەگى ءۇشىن «قازاقتىڭ تالانتتى سۋرەتشىسى» دەپ اتاۋعا تولىق قۇقىق بەرەتىن وراسان قازىنا. شەتەلدە حالىقارالىق دەڭگەيدەگى ەڭ كوپ كورمە وتكىزگەن سۋرەتشىلەردىڭ ءبىرى بولعاندىقتان, بىزگە قاراعاندا ونەر تۋرالى تانىمى بيىك ەۋروپاداعى بەينەلەۋ ونەرىنىڭ بىلگىرلەرى ا.قازىعۇلوۆتىڭ شىعارماشىلىعىن جوعارى باعالايدى.
قازىعۇلوۆ جاس كۇنىنەن قازاقستاننىڭ ەڭ تالانتتى سۋرەتشىلەرىنىڭ تاڭداۋلى تۋىندىلارىن كوللەكتسيالاۋدى داعدىسىنا اينالدىرسا, بۇگىندە قازىعۇلوۆتىڭ ءوزىنىڭ كوللەكتسيونەرلەرى قالىپتاسقان. ولار ەڭ الدىمەن, وسى ەۋروپالىقتار. «ۇزدىكسىز ىزدەنىسىمەن ۇنەمى ۇزارتىپ وتىرماسا, سۋرەتشىنىڭ شىعارماشىلىق جولى تىم قىسقا» دەگەن ءسوزىن ومىرلىك ۇستانىمىنا اينالدىرعان ونىڭ ءار كورمەسى بەينەلەۋ الەمىندەگى ەلەڭ ەتكىزەر ەلەۋلى وقيعا رەتىندە قابىلدانادى. ويتكەنى ول ءار كورمەسىن بيىك تالعاممەن تۇزىلگەن سالماقتى دۇنيەلەرىنىڭ سالتاناتتى شەرۋى ىسپەتتى ۇيىمداستىرىپ, ۇزاق ۋاقىت جاسالعان ىشكى دايىندىقپەن كەلەدى. رەاليزم, سيۋررەاليزم, يمپرەسسيونيزمنەن باستاپ بۇگىنگى اۆانگارد پەن ابستراكتسيونيزمگە دەيىنگى باعىتتاردىڭ ءبىرازىن زور تالانتىمەن باعىندىرعان ونى شەتەلدىك مەتسەناتتاردىڭ ءوزى ەلىمىزگە ارنايى ىزدەپ كەلىپ, كارتينالارىن قىمبات باعاعا ساتىپ الادى. البومىن جارىققا شىعارىپ بەرەدى. بۇل – قازىعۇلوۆقا عانا ەمەس, قازاقتىڭ بەينەلەۋ ونەرىنە جاسالعان زور قۇرمەت.
ءبىز قازىعۇلوۆتى شەبەرحاناسىنا ىزدەپ بارعاندا, كۇللى تىلشىلەر قاۋىمى اداسپاي تاۋىپ باراتىن ەسەنتاي وزەنىنىڭ جاعاسىنا تاياۋ مۇراتباەۆ كوشەسىندەگى ەڭسەلى ۇيدە ورنالاسقان سۋرەتشىلەر شەبەرحاناسىنان ەمەس, سەيفۋللين كوشەسىنىڭ بويىنداعى وڭاشا وتاۋدان تاپتىق. ونىڭ ايداي الەمنەن قاشىپ, «جاپانداعى جالعىز ءۇي» بولىپ وتىرۋىنىڭ ءوزى كوپ نارسەنى اڭعارتقانداي. ادامدار اراسىنداعى الاماننان, ايتىس-تارتىسى كوپ دۇرمەكتەن الىستا, ءوزى مەن ونەردى عانا وڭاشا قالدىرىپ, ء وز شىعارماشىلىعىمەن عانا بەتپە-بەت ءومىر ءسۇرۋدى ءجون كورگەنى بولار دەپ تۇيدىك. الپىسباي سۋرەتشى جىلىنا ەلۋ-الپىس كارتينا «شيمايلاسا», سونىڭ ىشىندە ەڭ بولماسا ءۇش-تورتەۋى ءوز كوڭىلىن قاناعاتتاندىرسا, بار دۇنيەسى تۇگەندەنگەندەي كەۋدەسىن الاقۇيىن قۋانىشتىڭ ءۇنسىز عانا بيلەيتىنى بار. قىلقالامنان قولى بوساي قالعانداي بولسا, كىتاپقا ۇڭىلەدى. شەبەرحاناسىنداعى كارتينادان كەيىنگى بايلىق وسى – تەكشەلەنىپ جينالعان كىرپىش-كىرپىش كىتاپتارى. بۇل سۋرەتشىنىڭ كوپ وقيتىندىعىن, كوپ ىزدەنەتىنىن مەڭزەيتىندەي. تەرەزەسىنىڭ ارعى جاعىندا قايناپ جاتقان قاربالاس ءومىر جۇماقتىڭ كىشكەنتاي ءبىر بولشەگىندەي بولىپ كەتكەن مىناۋ ەكى بولمەلى شەبەرحاناسىنىڭ ىشىندەگى جان راحاتىمەن سالىستىرعاندا ءجىپ ەسە المايتىنداي, جەز قۇمانىنداعى كۇرەڭ شايدى سوراپتاپ قويىپ, قىلقالامىنىڭ قارىمىن سىناپ باقسا, سودان ماڭىزدى قىزىقتى ازىرگە كورگەن جوق.
بوياۋ – سۋرەتشىنىڭ دۇنيەتانىمى مەن ءومىر ءسۇرۋ سالتىنان عانا ەمەس, جالپى تاعدىرىنان اقپارات جەتكىزەتىن العاشقى قۇرال. ويتكەنى ستەندال ايتقانداي, «ستيل دەگەن – ادامنىڭ ءوزى» عوي. مىسالى, سۋرەتشىنىڭ ءوز سوزىنە سەنسەك, پيكاسسونىڭ شىعارماشىلىعىندا ءبىر كەزەڭدە قىزعىلت, ءبىر كەزەڭدە كوگىلدىر ءتۇس, ال ءبىر ۋاقىتتا قارا ءتۇس باسىم بولعان ەكەن. سول سەكىلدى الپىسباي قازىعۇلوۆتىڭ شەبەرحاناسىنداعى كارتينالارعا جاعالاتا كوز سالعاندا, جالپى ونىڭ سوڭعى جىلدارداعى جۇمىسىنا شىمقاي قىزىل جانە وتتاي سارى ءتۇستىڭ ءتان ەكەنىن بايقادىق. «نەگە؟» دەدىك اۋەستىك بيلەپ. ء«بىر ۋاقىتتارى مەن دە سۇر تۇسپەن جازعاندى ۇناتتىم, سودان كەيىن ابدەن جالىققانشا قىزعىلت تۇسپەن جۇمىس ىستەدىم. وتكەن جىلدان باستاپ قىپ-قىزىل ءتۇستىڭ قىزىعىنا ءتۇستىم. العاش وسى تۇسپەن سالا باستاعانىمدا كۇن اپتاپ ىستىق بولىپ تۇرعان ەدى. اۋا رايىنىڭ اسەرى كوڭىل كۇيىمدى شارپىعان بولار, قىزىل مەن سارى ءتۇستىڭ يىرىمىنە سولاي تۇسكەن ەدىم», دەيدى.
سۋرەتشىنىڭ جەكە تۇلعا رەتىندەگى قۋانىشىن, رەنىشىن, وكىنىشىن, ءبىر سوزبەن ايتقاندا, ءارتۇرلى كوڭىل كۇيىن بوياۋدىڭ ءتۇسى انىقتايدى. ەرتەرەكتە, ينستيتۋت قابىرعاسىندا 4-كۋرستا وقىپ جۇرگەن كەزىندە «ونەر تاريحىنان» ساباق بەرەتىن ۇستازى اۋديتورياعا قاراپ تۇرىپ: «بەينەلەۋ ونەرىنىڭ فوتوگرافيادان نە ايىرماشىلىعى بار؟ تاپ قازىر دۇرىس جاۋاپ بەرگەنىڭ بۇدان بىلاي مەنىڭ ساباعىما قاتىسپاساڭ دا بولادى» دەيدى. ءبارى ويلانىپ قالادى. ۇزاققا سوزىلعان جىم-جىرت ۇنسىزدىكتى راۋشان دەگەن كۋرستاسى بۇزادى: «فوتوسۋرەت ادامنىڭ كوڭىل كۇيىن جەتكىزە المايدى, ال جيۆوپيس كوڭىل كۇيدى جەتكىزەدى» دەيدى. «بەس!» دەيدى ۇستاز. مۇنىڭ شىندىق ەكەنىن بالتىق بويى ەلدەرىندە تۇراتىن تانىمال سۋرەتشى دوستارىنىڭ تاجىريبەسىنەن دە بايقادى. بۇل ەلدەگى سۋرەتشىلەر ءبىر كەزدەرى جىڭىشكە ءارى نازىك ەتىپ بوياۋ شاشاتىن «اەروگراف» دەگەن قۇرالعا وتە قۇمار بولىپ الادى. اياق كيىمگە اينالدىرا شاشقانداي, كەنەپتىڭ ۇستىنە تاقاپ تۇرىپ كەرەكتى بوياۋدى پىشىلداتىپ شاشىپ شىعادى, راحات. كورمەلەردەن كورىپ جۇرگەن سول كارتينالار كەيىنگى جىلداردا اياق استى ءىزىم-عايىم جوق بولىپ كەتكەن سوڭ بۇكىلوداقتىق سيمپوزيۋمداردىڭ بىرىندە جولىققانىندا: «سوڭعى كەزدە سەندەر اەروگرافپەن سۋرەت سالماي كەتتىڭدەر عوي, نەگە؟» دەپ سۇرايدى الپىسباي سۋرەتشى. «باس تارتتىق, – دەيدى بالتىق بويىنىڭ سۋرەتشىسى,– تەمىر قۇتى جيۆوپيس جانرى ءۇشىن جەتىلگەن قۇرال بولسا دا, ءبارىبىر قىلقالامدى الماستىرا المايدى ەكەن. ادامنىڭ ميى, جۇرەگى, ءبىلىمى, قولىنىڭ ەنەرگياسى, كەرەك دەسەڭىز, دەنساۋلىعى قاتىسپاعان سۋرەتتىڭ سەزىمگە اسەرى دە بولمايتىنىن تۇسىندىك». فوتوسۋرەت تە, تەمىر قۇتىداعى بوياۋشاشقىش تا قىلقالامنىڭ الدىندا دارمەنسىز بولاتىنىن وسى ەكى مىسالدان اڭعارىپ, سۋرەتشىگە تەك قىلقالامنىڭ عانا اينىماس سەرىك بولا الاتىنىن سودان بىلگەن.
قازاقستاندا «قىمبات» سۋرەتشىلەردىڭ قاتارى كوپ ەمەس. ارينە, بوياۋلار گامماسىنىڭ ۇيلەسىمىمەن سالىنعان, قىزىلدى-جاسىل بوياۋدىڭ تەرەڭىنە جاسىرىلعان جاڭالىعى بار, سەزىمدى قوزعايتىن تۋىندىلار اسا قىمبات تۇرادى, بىراق قىمبات بولعاندا, مۇنداعى اڭگىمە ونىڭ باعاسى تۋرالى ەمەس. ءتىپتى ول جاي ءبىر قاراعاندا تۇسىنىكتى بولا سالاتىن جۇرەكتى شىم ەتكىزەر سۇلۋ سۋرەت تە بولماۋى مۇمكىن. الپىسباي اعامىز سۋرەت ونەرىندەگى «ارزان-قىمبات» دەگەن شكالانى تۋىنداتاتىن شەبەرلىكتى تۋىندىنىڭ ەنەرگەتيكاسى انىقتايتىنىن باسا ايتادى. ءوزى تانىمىمەن جەتكەن وسى اقيقاتتى ۇنەمى قاپەرىندە ۇستاپ, سەزىمگە سىيلايتىن جاعىمدى اسەرىن الدىڭعى ورىنعا شىعارعان الپىسباي قازىعۇلوۆتىڭ كارتينالارىندا كۇڭگىرت, قويۋ, قانىق ءتۇستى بوياۋلاردى بىرتە-بىرتە اشىق, نازىك تۇستەرگە ۇلاستىرۋ سەبەبى تاپ وسىندا جاتقانى ونىڭ شىعارماشىلىعىمەن تانىس ادامداردىڭ بارشاسىنا ايان. ونىڭ پولوتنولارىندا كادىمگىدەي دراما بار. كورگەندە تىكسىنىپ قالۋ, سەلت ەتۋ, كاتاكليزم, بۇرىن بىلمەگەن, كورمەگەن توسىن جايتپەن جولىعۋ – قازىعۇلوۆ كارتينالارىنا جان ءبىتىرىپ تۇرعان قوزعاۋشى قۋات وسىلار.
الپىسباي اعامىزدىڭ ايتۋىنشا, سۋرەتشى تۋىندىسىن جازىپ جاتقانداعى شىعارماشىلىق ۇدەرىسكە جالعىز ءوزى عانا قاتىسپايدى. «كەيدە كارتينانى جازىپ وتىرعاندا, تۋ سىرتىمنان بىرەۋدىڭ كەلىپ باقىلاپ تۇرعانىن بايقايمىن. ارتىما قارايمىن – ەشكىم جوق. بارىپ, ەسىكتى تارتىپ كورەمىن, جابىق تۇر. وتىرا قالىپ, جۇمىسىمدى قايتا جالعاستىرامىن. «الگىنىڭ» سول مەزەت قايتا پايدا بولعانىن, مەنىڭ قالامىمنان كوز الماي قاراپ تۇرعانىن بۇكىل ج ۇلىن-جۇيكەممەن تاعى سەزەمىن. ءار تۋىندىنى قولعا العان سايىن قايتالانا بەرگەن سوڭ مۇنى وزىمشە زەرتتەي باستادىم. زامانداس ارىپتەستەرىمنەن, جاسى ۇلكەن سۋرەتشىلەردەن سۇرايمىن. ولار ەكى يىعىن قومداپ, «بىلمەيمىز» دەيدى دە قويادى. بىردە كىتاپ وقىپ وتىرسام, وندا: «قالاي جازعانىڭدى الدەكىم يىعىڭا اسىلىپ قاراپ تۇرادى. ول, ءبىرىنشى – اناڭ, ەكىنشى – ۇستازىڭ, ءۇشىنشى – شەكسپير, ءتورتىنشى – قۇداي» دەپ جازىپ قويىپتى. كارتينانى سۋرەتشىنىڭ جالعىز ءوزى جازبايتىنىن, شىعارماشىلىق ۇدەرىسكە باسقا كۇشتىڭ دە قاتىساتىنىن سول كەزدە ءتۇسىندىم» دەيدى ول.
يا, سۋرەتشىلىك ونەردىڭ تىلسىممەن بايلانىستىلىعىن ونىمەن تانىستىعى جوق ادامنىڭ ءوزى ءالسىز تۇيسىگىمەن تام-تۇمداپ بولسا دا, سەزەدى. جوعارىدا ايتىلعان «ەنەرگەتيكا» دەگەننىڭ كارتينانىڭ «اعزاسىنا» تىلسىم كۇشتىڭ كومەگىمەن كىرۋى ابدەن مۇمكىن ەكەنىن سۋرەتشىنىڭ ءوزى دە تەرىسكە شىعارا المايدى.
ا.قازىعۇلوۆ 1976 جىلدان بەرى قىرىق جىلدان اسا ۋاقىت سۋرەت سالىپ كەلەدى. وسى جارتى عاسىرعا جۋىقتاعان ۋاقىتتا بوياۋدىڭ جاي عانا بوياۋ ەمەس, ونىڭ قۇپياسى بولاتىنىن, بوياۋدىڭ «ويلاي» الاتىنىن, ال ول قۇپيانىڭ كىلتىن ۇلى جاراتۋشى تاڭداعان ادامىنىڭ قولىنا عانا بەرەتىنىن ءتۇسىندى جانە الەمدىك سۋرەت ونەرىن ويشا ءبىر شولىپ شىققاندا, ول كىلتتىڭ كىمدەردىڭ قولىنا تابىستالعانىن دا كوزى كوردى. بەس عاسىر ىلگەرى كەتكەن باتىستىق سۋرەت مادەنيەتى قيالدىڭ ءتۇپسىز تەرەڭ بولاتىنىن دالەلدەپ, ازىرگە قۇرىق سالدىرماي كەلە جاتقانىمەن, بوياۋ قۇدىرەتىن تانۋعا, تانىتۋعا قىزمەت ەتىپ جۇرگەن ىزدەنگىش قازاق سۋرەتشىلەرىنىڭ الدىڭعى تولقىنىنداعى الپىسباي قازىعۇلوۆتىڭ تاڭىرقاعان سايىن تانىلا تۇسەتىن الەمىنە سۋرەت ونەرىنە تابىناتىندار وسىنشا ىنتىزار بولماس ەدى.
تاريحتا توقىراپ قالعان, قولىنا مۇلدەم قالام ۇستاي الماي ءومىرىنىڭ سوڭىندا سارقىلىپ, نە جازارىن, قالاي جازارىن بىلمەي قاڭتارىلىپ قالعان سۋرەتشىلەر وتە كوپ. سۋرەتشىدەن سەبەبىن سۇرادىق. تۇنجىراپ ويلانىپ وتىردى دا: «بۇل تۋرالى مەن دە كوپ ويلاندىم. ۇزاق جىلدارداعى ويىمنىڭ ءتۇيىنى مىناۋ بولدى. سۋرەتكەردىڭ نيەتى بۇزىلعان كەزدە شىعارماشىلىق تا سارقىلادى. باسقا ادامدارعا رياسىز كومەكتەسۋ, جاماندىق ويلاماۋ, جاقسىلىق جاساۋعا اسىعىپ تۇرۋ, اقىل مەن ءبىلىمدى تەك قانا ىزگىلىكتىڭ جولىنا باعىتتاۋ – مىنە, شىعارماشىلىق ادامىن وسىرەتىن قاسيەتتەر». سۋرەتشىلەر اراسىندا تارتۋ-تارالعى جاساۋ جاعىنان تارتىنباي, تۋىندىلارىن مۋزەيلەرگە تەگىن تاراتىپ, سۋرەتىن ساتىپ, اۋرۋحانالارعا اپپارات الىپ بەرىپ, قايىرىمدىلىق ىسىمەن ەڭ كوپ اينالىساتىن دا مىرزا مىنەزدى الپىسباي قازىعۇلوۆ ەكەنىن بۇرىننان بىلەتىنبىز. سىرىن ەندى اڭداعانداي بولدىق. قوعامنىڭ ءبىر قاجەتىنە جاراماساڭ, جەكە تۇلعا رەتىندە قۇنىڭ تومەن.
ونىڭ ء دال قازىر بوگدە تىرلىككە باس قاتىرماي الاڭسىز جۇمىس ىستەپ جۇرگەن شاعى. «قولىنىڭ» ءجۇرىپ تۇرعان كەزىندە جانىنا تىنىشتىق بەرمەي مازالاعان ويىن توكپەي-شاشپاي قاعاز بەتىنە ءتۇسىرىپ الۋدى عانا ويلايدى. سۋرەت ونەرى, راسىمەن, ونەردىڭ ىشىندەگى ەڭ قيىن ونەر. كەيدە شەبەرحاناسىنا بارىپ, قولىنا قىلقالامىن ۇستاپ شىنتاقتاپ ويلانعان كۇيى جازىلىپ جاتقان كەنەپكە جالعىز سىزىق تا تارتا الماي جابىعىپ, شارشاپ ۇيىنە قايتاتىنى بار. جايشىلىقتا قاۋىرسىن قۇرلى سالماعى بولماي, ساۋساق اراسىندا سۋسىلداپ, جورعالاي جونەلەتىن قىلقالامى وندايدا قىرىق پۇتتىق كىر تاسىنداي اۋىر تارتىپ, ءال-دارمەنىن قۇرتادى. بۇل بارلىق شىعارماشىلىق ادامىنىڭ باسىندا بار وتكىنشى احۋال بولعاندىقتان, تابيعاتىنان بەرىلگەن سالماقتى مىنەزى تۇتقيىلدان بۇرق ەتىپ كەلەتىن يمپۋلس پايدا بولعانشا سول ءساتتى امالسىز كۇتەدى. ال سونشا ۋاقىت ساندالعان, سارسىلتقان كۇندەردى شابىت كەلىپ تىقسىرىپ, سۋرەت سالۋ ساعىنىشىمەن تابىسقانداعى راحاتتىڭ نە ەكەنىن سۋرەتشى عانا تۇسىنەدى. ونداي ساتتە وڭاشا بولمەسىندە ول بالا سياقتى بيلەپ تە كەتەدى. ءوز ونەرىمەن تۇتاسىپ, بالتالاساڭ دا اجىرامايتىن ءبۇتىن ءبىر الەمگە اينالىپ كەتكەن تۇلعا ءالى كۇنگە دەيىن بوياۋ سيقىرىنا اربالىپ, بەيمالىم جۇمباق دۇنيەنى ۇعىنۋعا تالپىنۋمەن كەلەدى.
ايگۇل احانبايقىزى,
«ەگەمەن قازاقستان»
الماتى
