كەزدەسۋگە رەسپۋبليكالىق «جاس وتان» جاستار قاناتىنىڭ توراعاسى د.سۇندەتباەۆ, قر ءدىن ىستەرى جانە ازاماتتىق قوعامى مينيسترلىگىنىڭ ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعى ديرەكتورىنىڭ ورىنباسارى تۇرار ءابۋوۆ, قازاقستاننىڭ ەسترادا جۇلدىزى قايرات نۇرتاس, جۋرناليست, تەلەجۇرگىزۋشى اسحات سادىرباي, گارۆارد بيزنەس مەكتەبىنىڭ تۇلەگى, «بولاشاق» قاۋىمداستىعىنىڭ مۇشەسى دانات جۋمين, 22 جەڭىلىسسىز جەكپە جەك وتكىزگەن كاسىپقوي بوكسشى جانحوش تۇراروۆ, «Global Business Forum» ۇيىمىنىڭ ديرەكتورى اسەل سىدىقوۆا, بىرقاتار وبلىستارداعى «جاس وتان» جاستار قاناتىنىڭ توراعالارى قاتىستى.
ەلىمىزدەگى جاستاردىڭ باسىم كوپشىلىگى ياعني, 800 مىڭداي جاستار تۇراتىن وڭتۇستىك وڭىرىندە «جاستار وتانعا!» ساياسي لاگەرىنىڭ ءوتۋى وبلىس جاستارى ءۇشىن وتە ماڭىزدى ەكەنىن ايتقان ايماق باسشىسى, ەلىمىزدىڭ ەرتەڭى جاستارعا اعالىق اقىلىن ايتتى.
«بۇگىن وڭتۇستىك قازاقستاندا قازاقستاننىڭ بارلىق ايماقتارىنان ەلىمىزدىڭ بولاشاق تىرەكتەرى, بۇگىنگى جاس كوشباسشىلار باس قوسىپ جاتىرسىزدار. وندا ءوز اقىل-كەڭەستەرىڭىزبەن ءبولىسىپ, جاستار ساياساتىن جەتىلدىرۋ جولدارىن تالقىلايدى دەپ سەنەمىن. سەبەبى, سىزدەرگە حالىق پەن ەلباسى ءۇمىت ارتىپ وتىر. سونىمەن قاتار, ءار ءبىرىڭىز مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جاتقا بىلۋلەرىڭىز كەرەك, ول بارلىعىڭىز ءۇشىن ۇران بولۋى قاجەت. سونداي-اق, بۇگىنگى جاستار جىلتىر, جاتتاندى جالاڭ سوزدەردەن ارىلىپ, شىنايى سويلەۋدى ۇيرەنۋى قاجەت. ول ءۇشىن ءبىلىم الىپ, تاريحىمىزدى جاتقا وقىپ بىلۋلەرىڭىز كەرەك. سەبەبى, جاستارى بەلسەندى ەلدىڭ ەرتەڭى جارقىن. سوندىقتان, ولار قازىر قوعامداعى بارلىق سالاعا اتسالىسىپ, تاۋەلسىزدىكتىڭ تۇعىرلى بولۋى جولىندا ايانباي ەڭبەك ەتۋى قاجەت»,-دەدى اكىم.
باسقوسۋدا جاستار ءوزارا پىكىر الماسىپ قانا قويماي, قازاقستانداعى جاستاردىڭ بۇگىنگى جاي-كۇيى تۋرالى ءسوز قوزعاپ, وبلىس اكىمىنە جاستاردى جۇمىسپەن قامتۋ بويىنشا بىرقاتار ۇسىنىستارىن جەتكىزدى.
مۇنان بولەك, كەزدەسۋگە قاتىسىپ وتىرعان جاستار قازاقستاننىڭ ءوسىپ-وركەندەۋى جولىندا ايانباي ەڭبەك ەتەتىندەرىن وعان بارشا جاستاردى شاقىراتىندىقتارىن جەتكىزدى.
كەزدەسۋدى قورىتىندىلاعان وبلىس اكىمى بۇگىنگى تازا اۋادا وتەتىن جاستار باسقوسۋىنىڭ وبلىس جاستارىنا بەرەرى مول مازمۇندى كەزدەسۋ بولاتىنىنا سەنىم ارتىپ, جيىننىڭ ءساتتى وتۋىنە تىلەكتەستىگىن ءبىلدىردى.
ايتا كەتەيىك, تولە بي اۋدانىنداعى «الما-تاۋ» دەمالىس ايماعىندا وتەتىن كەزدەسۋگە بارلىق وڭىرلەردەگى «جاس وتان» جاستار قاناتىنىڭ توراعالارى مەن بەلسەندىلەرى, ساياساتتانۋشى, كاسىپكەر, سپورتشى, ءانشى جانە جاستار ساياساتى سالاسىنىڭ وكىلدەرى جالپى سانى 120-دان استام جاس قاتىساتىن بولادى. وسى كەزدەسۋدە كەلەلى ماسەلەلەر ايتىلىپ, جاستار ساياساتىن دامىتۋداعى وڭ پىكىرلەر مەن ۇسىنىستار ورتاعا سالىنباق.
