القالى جيىنعا الىس-جاقىن شەتەلدەن ارنايى شاقىرىلعان قوناقتارمەن بىرگە قازاقستان حالقى اسسامبلەياسى كەڭەسىنىڭ مۇشەلەرى مەن قحا وكىلدەرى قاتىستى.
كىرىسپە ءسوز سويلەگەن ەۇۋ پرورەكتورى سەرىكجان قاناەۆ دوڭگەلەك ۇستەلگە قاتىسۋشىلارعا ىزگى تىلەگىن ءبىلدىرىپ, ەلورداداعى ەڭسەلى وقۋ ورداسىندا اتقارىلىپ جاتقان شارالارمەن ءبولىستى. سونىمەن قاتار پرورەكتور ۇلتارالىق بىرلىكتى نىعايتۋداعى قازاقستاننىڭ اتقارىپ جاتقان جۇمىستارىنا توقتالدى.
شارا بارىسىندا قاتىسۋشىلار ءوزارا پىكىر الماسىپ, تاقىرىپقا ساي ويلارىمەن ءبولىسىپ, تاجىريبەلەرىن ورتاعا سالدى. ەۋرازيا حالىقتارى اسسامبلەياسىنىڭ جاۋاپتى حاتشىسى ل.ترۋنينا باستاعان بىرقاتار قۇرمەتتى مەيماندار بايانداما جاساپ, قىزۋ پىكىر الماسۋ بولدى. سونىمەن قاتار ەۋرازيا ۇلتتىق ۋنيۆەرسيتەتىنىڭ يۋنەسكو كافەدراسىنىڭ مەڭگەرۋشىسى ع.شالاحمەتوۆ, «قىرعىزستان-استانا» قوعامدىق بىرلەستىگىنىڭ توراعاسى ش.يسمايلوۆ, تۇرىك ەتنومادەني ورتالىعىنىڭ توراعاسى ا.پيريەۆ جيىنعا قاتىسۋشىلارعا بايانداما جاسادى.
كەزدەسۋدە ۇلتارالىق جانە كونفەسسيالىق بىرلىكتى نىعايتۋداعى قازاقستان مەن قحا تاجىريبەسى ءسوز بولىپ, شەتەلدەن كەلگەن ساراپشىلار ەلىمىزدىڭ ەڭبەگىن جوعارى باعالادى. ەلباسى ن.نازارباەۆتىڭ وسى ماسەلە جونىندە اتقارعان جۇمىستارى كەڭىنەن ايتىلدى. جيىنعا قاتىسۋشىلار قحا-نىڭ شىنايى پىكىرتالاس تريبۋناسى مەن ساياسي پلاتفورماعا اينالعانىنا توقتالدى. سونداي-اق ەۇۋ-دا اشىلعان قحا كافەدراسىنىڭ ءرولى مەن قىزمەتىنە ايرىقشا باعا بەرىلدى.
اتالعان شاراعا رەسەي مەملەكەتتىك دۋماسىنىڭ دەپۋتاتى سۆەتلانا سميرنوۆا باستاعان رەسەي حالىقتارى اسسامبلەياسىنىڭ, ەۋرازيا حالىقتارى اسسامبلەياسىنىڭ, قحا ەتنومادەني بىرلەستىكتەرىنىڭ وكىلدەرى قاتىستى.
اباي اسانكەلدى ۇلى,
«ەگەمەن قازاقستان»
