كۇنباتىس الاشوردا وكىمەتىنىڭ ورتالىعى بولعان كونە جىمپيتى شاھارىندا وتكەن باسقوسۋعا اقىن, حالىقارالىق «شابىت» فەستيۆالىنىڭ لاۋرەاتى قالقامان سارين, ءانشى, «دارىن» مەملەكەتتىك جاستار پرەمياسىنىڭ يەگەرى يبراگيم ەسكەندىر, جانە باتىس قازاقستان, اقتوبە, اتىراۋ مەن ماڭعىستاۋ وبلىستارىنىڭ جاس كوشباسشىلارى ارنايى شاقىرىلعان ەكەن.
جيىندى قۇتتىقتاۋ سوزبەن اشقان سىرىم اۋدانىنىڭ اكىمى تولەگەن تورەعاليەۆ بيىل اۋداندا الاش مۇراسىن تۇگەندەۋ باعىتىندا جۇرگىزىلگەن جۇمىستار تۋرالى ايتىپ ءوتتى. جەرگىلىكتى باسشىلىقتىڭ تىكەلەي قولداۋىمەن ەكى حالىقارالىق جانە ءبىر رەسپۋبليكالىق ەكسپەديتسيا جۇزەگە استى. جىمپيتىداعى الاش مۇراجايى جاڭعىرتىلدى, جاڭا جادىگەرلەرمەن تولىقتى. وسى جىلدىڭ ەڭ باستى جاڭالىعى, سىرىم اۋدانىنىڭ ورتالىعى قازاقستاننىڭ قاسيەتتى جەرلەرىنىڭ رەسپۋبليكالىق تىزىمىنە ەندى.
- الاش مۇراتىن ءبىر داتاعا, ءبىر – ەكى كۇنگە بايلاپ قويۋعا بولمايدى. ولاي ەتسەك, تاريحقا دا, بولاشاققا دا قيانات بولادى. بۇل تاقىرىپ كۇندەلىكتى شارالاردىڭ كولەڭكەسىندە قالىپ قويماۋى كەرەك. تاۋەلسىزدىك الاش يدەياسىمەن تىنىس الۋى كەرەك. الاش يدەياسى – ول, الاش بالاسىنىڭ جۇرەگىندە. الاش اماناتىنا ادال بولايىق! بىزگە بۇيىرعان مىندەت – سول! بۇل اقىن قالقامان ءساريننىڭ ايتقان ءسوزى. ءبىزدىڭ ويىمىزشا, اقىننىڭ وسى ءبىر اۋىز ءسوزى پلەنارلىق ءماجىلىستىڭ مانىنە قىزمەت ەتىپ تۇر, - دەدى اۋدان باسشىسى.
فورۋمنىڭ كۇن تارتىبىندەگى ماسەلەدەن بولەك, ونەر, مادەنيەت تاقىرىپتارى, قازاق رۋحانياتىنداعى نەگىزگى ماسەلەلەر دە كەڭ تالقىعا ءتۇستى. دەلەگاتتار مەن اۋدان قوناقتارى س. دات ۇلى اتىنداعى تاريحي ولكەتانۋ مۋزەيىمەن, الاش ساياباعى, الاش مۇراجايى, ج. دوسمۇحامەدوۆ اتىنداعى مەكتەپتەگى مۇراجاي بولمەسىمەن تانىستى. كەشكىلىك جىمپيتى حالىق تەاترى جايساڭ اقبايدىڭ «جانشا» قويىلىمىن قويدى. كۇن ءانشى, «دارىن» مەملەكەتتىك جاستار پرەمياسىنىڭ يەگەرى يبراگيم ەسكەندىردىڭ كونتسەرتىمەن قورىتىندىلاندى.
قازبەك قۇتتىمۇرات ۇلى,
«ەگەمەن قازاقستان»
سۋرەتتى تۇسىرگەن باۋىرجان شيرمەدين ۇلى
