بۇل شىنىندا دا «عاسىر جوباسىنا» تۇرارلىق ۇلكەن شارۋا بولدى. وسى جوبانىڭ ارقاسىندا بۇرىن مۇلدەم گازداندىرىلماعان وڭتۇستىك قازاقستان وبلىسىنىڭ 8 اۋدانىنداعى 284 ەلدى مەكەننىڭ 700 مىڭعا جۋىق حالقى كوگىلدىر وتىنمەن قامتاماسىز ەتىلەدى دەپ جوسپارلانعان. ول تۋرالى رەسمي اقپاراتتاردا دا, بۇقارالىق اقپارات قۇرالدارىندا دا تالاي رەت ايتىلىپ, جازىلىپ, بوركىمىزدى اسپانعا اتا قۋانىپ, تۇرعىندار ءوز ريزاشىلىقتارىن ءبىلدىردى.
بىراق 2013 جىلدان بەرى 7 اۆتوماتتى گاز تاراتۋ ستانسالارى سالىنعانىمەن, بۇگىنگى تاڭدا جوسپارلانعان تۇرعىنداردىڭ تەك 4%-ى, ياعني 52 مىڭ حالىق قانا كوگىلدىر وتىنمەن قامتاماسىز ەتىلدى. ياعني ءتورت جىل وتسە دە تاريحي جوبانىڭ تىكەلەي اۋىل تۇرعىندارىن كوگىلدىر وتىنمەن قامتاماسىز ەتۋ ماقساتى ورىندالماي وتىر.
جەرگىلىكتى اتقارۋشى ورگاندار ارقىلى 121 ەلدى مەكەندى گازداندىرۋدىڭ جوبالىق-سمەتالىق قۇجاتتارى دايىندالىپ, 20 جوبا قۇجاتتارىنا مەملەكەتتىك ساراپتامادان وڭ قورىتىندىلار الىنعان. بارلىق جوبالىق-سمەتالىق قۇجاتتاردى ازىرلەۋگە جانە 5 اۆتوماتتى گاز تاراتۋ ستانسالارى قۇرىلىسىنا وبلىستىق بيۋدجەت ەسەبىنەن 16 ملرد تەڭگەدەن استام قارجى جۇمسالعان. وسى قۇجاتتار نەگىزىندە 23 ەلدى مەكەندەگى 121 مىڭنان استام حالىقتى كوگىلدىر وتىنمەن قامتاماسىز ەتۋ ءۇشىن 10,9 ملرد تەڭگە قاجەتتىلىگى تۋىنداپ وتىر.
وكىنىشكە قاراي ەنەرگەتيكا مينيسترلىگى تاراپىنان وبلىس اكىمدىگى ۇسىنعان بيۋدجەت ءوتىنىمى قولداۋ تاپپاي, 2018-2021 جىلدارعا ارنالعان رەسپۋبليكالىق بيۋدجەتكە كىرمەي قالعان. بۇل – اتالعان جوبانىڭ الداعى ءۇش جىلدا دا تۇرعىنداردى تابيعي گازبەن قامتاماسىز ەتۋگە ارنالعان نەگىزگى ماقساتىنىڭ ورىندالماي قالۋ قاۋپىن تۋدىرىپ, جوبالىق-سمەتالىق قۇجاتتاردىڭ جاسالۋىنا كەتكەن قىرۋار قارجىنىڭ نەگىزسىز شىعىن بولۋىنا اكەپ سوعۋى مۇمكىن.
وڭتۇستىك قازاقستان وبلىسى تۇرعىندارىنىڭ ءوتىنىشىن ەسكەرە وتىرىپ, وسى ماسەلەگە پرەمەر-مينيستر باقىتجان ساعىنتاەۆتىڭ نازارىن اۋدارتىپ, اۋىل وتباسىلارىن تابيعي گازبەن قامتاماسىز ەتۋ ماقساتىندا اتالعان قارجى كولەمىن الداعى ءۇش جىلدىڭ بيۋدجەتىنە ەنگىزۋگە ىقپال ەتۋىن سۇراپ, دەپۋتاتتىق ساۋال جولدادىق.
ءالي بەكتاەۆ,
سەناتور
