ەڭبەكاقىنىڭ توگىلگەن تەرگە لايىق بولعانى, ەڭبەكتىڭ ادىلەتسىز باعالانعانى دا ادامداردى ۇنەمى الاڭداتاتىن نەگىزگى ماسەلە. ارينە جۇمىستىڭ ءبارىن ۇيىمداستىرىپ, بارلىق جۇمىس پروتسەسىنە جاۋاپ بەرەتىن ءبىرىنشى باسشىنىڭ ەڭبەكاقىسى قول استىنداعى قىزمەتكەرلەرىنەن ارتىق بولۋى ابدەن زاڭدى. بۇل لوگيكالىق جاعىنان سەنىمدى, بۇلتارتپايتىن شەشىم. الايدا بىزدە وسى جازىلماعان, بىراق تا بۇلجىماي ورىندالۋعا ءتيىستى ءتارتىپ بارلىق جەردە بىردەي قولدانىلمايدى ەكەن.
جۋىردا ءماجىلىستىڭ جالپى وتىرىسىندا دەپۋتات مارات بوپازوۆ پرەمەر-مينيستر ب.ساعىنتاەۆتىڭ اتىنا جۇرتتىڭ ءبارىن تاڭ قالدىرعان سەنساتسيالىق جاڭالىعى بار ساۋال جولدادى. وندا بىلاي دەلىنگەن: «قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى №1158 قاۋلىسىنا سايكەس «ب» كورپۋسىنداعى اكىمشىلىك مەملەكەتتىك قىزمەتكەرلەردىڭ ەڭبەكاقىلارى 30 پايىزعا ءوستى. قازىرگى تاڭدا سانى 213 ادامدى قۇرايتىن, بارلىق دەڭگەيىندەگى ءماسليحات حاتشىلارى اتالعان قاۋلى شەڭبەرىنە كىرمەي قالدى. ولاردىڭ الاتىن جالاقىلارى ءماسليحات اپپاراتى قىزمەتكەرلەرىنەن تومەن بولىپ وتىر».
ءماسليحاتتار جۇمىسىن رەگلامەنتتەگەن «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى 2001 جىلعى 23 قاڭتارداعى №148 زاڭنىڭ 19-بابىنىڭ 4) تارماعىندا ءماسليحات حاتشىسى ء«ماسليحات اپپاراتىنىڭ قىزمەتiنە باسشىلىق جاسايدى, ونىڭ قىزمەتشiلەرiن قىزمەتكە تاعايىندايدى جانە قىزمەتتەن بوساتادى» دەپ ناقتى جازىلعان. دەمەك «حاتشى» دەگەن اتى بولماسا ءماسليحات حاتشىسى باسشىلىق لاۋازىمعا سايلانعان ادام. ەندى وسى لاۋازىمدى تۇلعانىڭ ءوز قاراۋىنداعى قىزمەتكەرلەردەن ەڭبەكاقىنى از الاتىنىنا تاڭدانباي كورىڭىز.
دەپۋتات م.بوپازوۆ بۇل ماسەلە 2016 جىلى سىياقى بەرۋدىڭ ايىرماسىمەن تۇزەتىلىپ وتىردى دەيدى. ال 2017 جىلى ونداي مۇمكىندىك بولماعان. ودان ءارى دەپۋتات: «2017 جىلعى 18 قاڭتاردا بۇل ماسەلە قازاقستان رەسپۋبليكاسى پارلامەنتى ءماجىلىسىنىڭ جالپى وتىرىسىندا كوتەرىلگەن بولاتىن, ونىڭ بارىسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلى دەپۋتاتتىق كورپۋسقا بۇل ماسەلەنىڭ شەشىلۋى قاراستىرىلۋدا دەپ حابارلادى. ال ۇلتتىق ەكونوميكا مينيسترلىگى اتالعان ماسەلەنى بىلەتىنىن ايتىپ, بىراق ماسەلەنىڭ شەشىمى 2018 جىلعا قالدىرىلعانىن جەتكىزگەن», دەدى دەپۋتات. بىراق دەپۋتات ماسەلەنى شەشۋ بويىنشا ءالى كۇنگە ۇكىمەت تاراپىنان ەشقانداي شارا قابىلدانعان جوق دەيدى. دەمەك جاڭا جىلدىڭ بيۋدجەتىنە ءماسليحات حاتشىلارىنىڭ ەڭبەكاقىسىن ءوسىرۋ شىعىندارى ەنگىزىلمەگەن. بۇل سول, «جانى اشىماستىڭ قاسىندا باسىڭ اۋىرماسىننىڭ» كەرى سياقتى. وزدەرىنىڭ ەڭبەكاقىلارى جوعارى بولىپ, بارىنە جەتىپ تۇرعان بيىك لاۋازىمدى شەنەۋنىكتەر ءماسليحات حاتشىسى ەڭبەكاقىسىنىڭ از ەكەنىنە باسىن اۋىرتپايتىنى كورىنىپ تۇر. ال ەگەر سول مينيسترلەردىڭ ءوز ەڭبەكاقىسى قاراماعىنداعى دەپارتامەنت نەمەسە باسقارما باسشىسىنان از بولسا, ەندىگى ۇلكەن داۋ شىعاراتىن ەدى.
دەپۋتات م.بوپازوۆتىڭ وسىناۋ سايكەسسىزدىكتى ايتىپ, پرەمەر-مينيستر ب.ساعىنتاەۆتىڭ اتىنا جولداعان ساۋالىن قولداپ 27 دەپۋتات قول قويدى. وسىنداي شەشىمگە كەلگەن دەپۋتاتتار جوعارىداعى وقيعانىڭ ەشقانداي لوگيكاعا جاتپايتىندىعىنا نارازىلىق بىلدىرگەندەي بولدى. ۇكىمەت بۇل ماسەلەنى ءادىل شەشەر دەگەن ءۇمىت بار.
