«يۋگرا» كلۋبىمەن وتكەن كەزدەسۋدە «بارىس» حوككەيشىلەرى ءبىرىنشى كەزەڭدە ءتورت شايبا سوعىپ, قارسىلاستارىنا ەش مۇمكىندىك قالدىرمادى. ويىن باستالا سالا شابۋىلعا كوشكەن استانانىڭ كومانداسى ءبىرىنشى مينۋتتا ەسەپ اشتى. گولدىڭ اۆتورى – تالعات جايلاۋوۆ. بۇل جايلاۋوۆتىڭ بيىلعى ماۋسىمداعى ءتورتىنشى گولى. ال 6-مينۋتتا كونستانتين پۋشكارەۆ مۇزايدىن يەلەرىنىڭ قاقپاشىسىن قاپى قالدىرىپ, ويىنداعى ەكىنشى, ءوزىنىڭ التىنشى شايباسىن سوقتى. ءار ويىن سايىن ءبىر گول سالىپ جۇرگەن «بارىستىڭ» كانادالىق شابۋىلشىسى مەتتيۋ فرەتتين بۇل جولى دا مەرگەندىگىمەن كوزگە ءتۇستى. ەسەپ – 3:0. ءبىرىنشى كەزەڭنىڭ اياقتالۋىنا 20 سەكۋند قالعاندا ۆلاديمير ماركەلوۆ تابلوداعى كورسەتكىشتى 4:0-گە جەتكىزىپ, كومانداسىنىڭ جەڭىسى مەن ءۇش ۇپايىن ناقتىلاپ قويدى.
ەكىنشى كەزەڭنىڭ العاشقى 10 مينۋتىندا ەكى كوماندادا گول سوعاتىن مۇمكىندىكتەر بولعان ەدى. بىراق قاقپاشىلار ءوز شەبەرلىكتەرىن كورسەتىپ, قاۋىپتى شابۋىلداردىڭ بەتىن قايتارا ءبىلدى. دەگەنمەن كەزدەسۋدىڭ 34-مينۋتىندا نيكيتا ميحايليس كوماندامىزدىڭ بەسىنشى گولىن قاقپاعا ەنگىزدى. وسى گولدان سوڭ «بارىس» حوككەيشىلەرى جەڭىسكە جەتەتىندەرىنە تىم قاتتى سەنىم ارتىپ كەتتى. مۇنى سەزە قويعان «يۋگرا» كومانداسىنىڭ باس باپكەرى اناتولي ەمەلين تاكتيكالىق وزگەرىس جاساپ, مۇزايدىنعا جاڭا ويىنشىلاردى شىعاردى. ناتيجەسىندە ايدىن يەلەرى ەكىنشى كەزەڭ اياقتالۋعا ءۇش مينۋت قالعاندا ەكى شايبا سوعىپ ۇلگەردى. 37-مينۋتتا يليا شيپوۆ العاشقى شايبانى سالسا, 39-مينۋتتا ماكسيم پەستۋشكو «يۋگرانىڭ» ەكىنشى گولىن سوقتى. ء ۇشىنشى كەزەڭدە شايبا سوعىلمادى. ءسويتىپ «بارىس» سىرت الاڭدا 5:2 ەسەبىمەن «يۋگرادان» باسىم ءتۇستى.
ايتا كەتەيىك, بۇل ماتچقا «بارىس» كلۋبىنىڭ نەگىزگى ويىنشىلارى نايدجەل دوۋس, كەۆين داللمەن جانە داررەن ديتس جاراقاتتارىنا بايلانىستى قاتىسا الماعان بولاتىن.
بۇرناعى كۇنى «بارىس ارەنادا» قىتايدىڭ «كۋنلۋن رەد ستار» كومانداسىمەن كۇش سىناسقان «بارىس» اسا تارتىستى وتكەن ويىندا 4:3 ەسەبىمەن جەڭىسكە جەتتى.
ءبىرىنشى كەزەڭنەن كەيىن ايدىن يەلەرى 2:0 ەسەبىمەن جەڭىپ جاتتى. بەسىنشى مينۋتتا ەگور شالاپوۆ پەن 20-مينۋتتا ليندەن ۆەي قارسىلاس قاقپاعا شايبا سالعان بولاتىن. ەكىنشى كەزەڭدە قىتايلىقتار ەكى گول سوعىپ, ەسەپتى تەڭەستىرىپ كەتتى. كوپ ۇزاماي ولار ءۇشىنشى شايبانى سالىپ, العا شىقتى. تەك كەزدەسۋدىڭ اياقتالۋىنا ءۇش مينۋت قالعاندا رومان ساۆچەنكو ەسەپتى تەڭەستىرە الدى. ال وۆەرتايمدا استانالىق مەتتيۋ فرەتتين سوققان گول «بارىسقا» جەڭىس اكەلدى.
ءالي بيتورە,
«ەگەمەن قازاقستان»
