قازاقستان ءوزىنىڭ باستاماسىمەن تمد مەن ەۋرازيالىق ەكونوميكالىق وداقتىڭ قۇرامىنا كىردى. تمد سوناۋ 1991 جىلعى اۋمالى-توكپەلى ۋاقىتتا قۇرىلىپ, ءوز دەڭگەيىندە جۇمىس ىستەپ كەلە جاتىر. ال قازاقستان پرەزيدەنتى ن.نازارباەۆتىڭ تىكەلەي باستاماسىمەن قۇرىلعان ەۋرازيالىق ەكونوميكالىق وداق ەلباسىنىڭ كۇش سالۋىمەن ۋاقىت وزعان سايىن تولىسىپ, نىعايىپ, حالىقارالىق ەكونوميكالىق داعدارىستار, قايشىلىقتار, سانكتسيالار زامانىندا ءوز الەۋەتىن كورسەتۋدە.
وداق قۇرىلعالى بەرى ۇيىمعا مۇشە ەلدەر ورتاق مۇددەگە قىزمەت ەتۋگە تالپىنىپ كەلەدى. ءتۇرلى باستامالار كوتەرىلىپ, بىرقاتار ويلار ايتىلىپ, سونىڭ كوپشىلىگى ورىندالدى دا. تمد-عا مۇشە مەملەكەتتەر باسشىلارىنىڭ اراسىنداعى جاقسى قاتىناستار ۇيىمىنىڭ جۇمىسىنا وڭ ىقپالىن تيگىزۋدە.
قازاقستان پرەزيدەنتى سوچيدە قازىرگى الەمدىك كۇردەلى احۋالدا ايماقتىق ۇيىم تمد-نى ترانسفورماتسيالاۋ, ونىڭ جۇمىسىنا قان جۇگىرتۋ, قابىلدانعان ورتاق شەشىمدەرگە ۇكىمەتتەر جاۋاپكەرشىلىگىن كۇشەيتۋ ماسەلەسىن تاعى دا كوتەرىپ, ءوزىنىڭ ەل باسقارۋ تاجىريبەسى مەن حالىقارالىق ىستەردەگى كەڭ كوزقاراسى مەن تانىمىن ءبىلدىرىپ, شىنايى قامقورلىق تۇرعىسىنان سونى پىكىرلەر مەن قۇندى ۇسىنىستار جاريالادى. سولاردىڭ ىشىندەگى ەڭ باستىسى – ءوزارا ەكونوميكالىق بايلانىستاردى جاڭا دەڭگەيگە كوتەرۋ, بيزنەس ءۇشىن ەركىن ساۋدا ماسەلەسىن ناقتى شەشۋدى ۇسىندى. ەلباسى ۇسىنعان جوبالار جۇزەگە اسىپ جاتسا, تاۋار اينالىمى كوبەيىپ, ونىڭ قۇنى ارزانداۋىنا ناقتى جول اشىلاتىنى انىق.
ءناۋبات قاليەۆ,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, ساياسي عىلىمدار دوكتورى
