كەزدەسۋدىڭ ماقساتى – قازاقستاندا بيزنەس ورتانى جاقسارتۋ بويىنشا اعىمداعى ماسەلەلەردى تالقىلاۋ.
ە.ابدىقادىروۆ كەزدەسۋدى اشا كەلە, كاسىپكەرلىك حالىقتىڭ ءال-اۋقاتىنىڭ نەگىزى, سونداي-اق مەملەكەتىمىزدىڭ ستراتەگيالىق جوسپارلارىن ىسكە اسىرۋدىڭ بىردەن-ءبىر كەپىلى ەكەندىگىن اتاپ ءوتتى. سوڭعى جىلدارى ۇلت جوسپارى شەڭبەرىندە جۇرگىزىلگەن رەفورمالار ەلىمىزدىڭ سوت جۇيەسىن الەمدەگى ەڭ قولجەتىمدى ءارى جەدەل سوت ادىلدىگى ەتۋگە مۇمكىندىك بەردى. دۇنيەجۇزىلىك بانكتىڭ بيزنەستى جۇرگىزۋ رەيتينگىسىندە قازاقستاننىڭ سوت جۇيەسى سوڭعى ەكى جىل قاتارىنان الەمدەگى العاشقى ون ەلدىڭ قاتارىنا كىردى.
بۇعان قوسا, كاسىپكەرلەر تاراپىنان سوتتىڭ قىزمەتىنە سۋبەكتيۆتى باعا بەرۋىمەن بايلانىستى بىرقاتار پروبلەمالىق ماسەلەلەر بار. بۇل وڭىرلەردە ايرىقشا بايقالۋدا. مۇنى جۇرگىزىلگەن ساۋالداما قورىتىندىسىنان, سونىڭ ىشىندە حالىقارالىق قۇرىلىمدار جۇرگىزگەن ساۋالدامادان بايقاۋعا بولادى.
وسىعان بايلانىستى, ە.ابدىقادىروۆ جوعارعى سوتتىڭ «اتامەكەن» ۇكپ-مەن بيزنەستى سوتتا قورعاۋ ماسەلەلەرى بويىنشا ءوزارا ءىس-قيمىلىن كۇشەيتۋ قاجەتتىگىن اتاپ ءوتتى. وڭىرلەردە بيزنەس ورتانى قۇقىقتىق اعارتۋ, سونىڭ ىشىندە سوت بيلىگىنىڭ تاۋەلسىزدىگىن قامتاماسىز ەتۋ مەن سوت قىزمەتىن ينستيتۋتتىق باعالاۋ ماسەلەلەرىنە باسا نازار اۋدارۋ قاجەت. بۇگىندە بۇل رەسپۋبليكانىڭ, سونىڭ ىشىندە ينۆەستيتسيانى قورعاۋ مەن ەكونوميكانى دامىتۋ سياقتى پارامەترلەر بويىنشا بارلىق سالاسىن دامىتۋدا ىشكى جانە حالىقارالىق وڭ مونيتورينگ ءۇشىن ەرەكشە ماڭىزى بار.
وسى رەتتە بىرلەسكەن جۇمىستى كۇشەيتۋ ءۇشىن 2014 جىلى «اتامەكەن» ۇكپ-مەن جوعارعى سوت اپپاراتى قول قويعان ىنتىماقتاستىق تۋرالى مەموراندۋمنىڭ ماڭىزى زور. بۇعان قوسا, قازاقستاننىڭ رەيتينگتىك كورسەتكىشتەرى, زاڭنامانى جەتىلدىرۋ, كورپوراتيۆتىك داۋلارعا قاتىستى سوت پراكتيكاسىن ءتۇسىندىرۋ بويىنشا بىرلەسكەن موبيلدىك توپتار قۇرۋ ۇسىنىلدى. سوتتار «Atameken Business Channel» ارناسى ارقىلى ءتۇسىندىرۋ جۇمىسىنا بەلسەنە ارالاسۋعا ءازىر. بيزنەس ورتانىڭ كوڭىل-كۇيى مەن ولاردىڭ سوتتار جۇمىسىن قابىلداۋ دەڭگەيىن زەرتتەۋ ءۇشىن تاۋەلسىز الەۋمەتتىك ساۋالداما جۇرگىزۋ ۇسىنىلدى.
كەزدەسۋ شەڭبەرىندە جوعارعى سوتتىڭ دەپارتامەنت باسشىسى نۇرسەرىك ءشارىپوۆ ۇكپ وكىلدەرىنە «سوت كابينەتى», «سوت اكتىلەرىنىڭ جاڭا بانكى» جانە تاعى باسقا سەرۆيستەرگە باسىمدىق بەرە وتىرىپ, ەلەكتروندى سوت ادىلدىگىنىڭ مۇمكىندىكتەرىن تانىستىردى.
تاراپتار تالقىلانعان بارلىق ماسەلەلەر بويىنشا قىزۋ پىكىر الماستى. كەزدەسۋ سوڭىندا جوعارعى سوت پەن «اتامەكەن» ۇكپ وكىلدەرى بىرلەسكەن جۇمىستى كۇشەيتۋ قاجەتتىلىگىن اتاپ ءوتتى.
