رەسپۋبليكا بويىنشا العاشقىلاردىڭ ءبىرى بولىپ ۇيىمداستىرىلعان جيىنعا ماڭعىستاۋ وبلىسىنىڭ اكىمى ەرالى توعجانوۆ, مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى توراعاسىنىڭ ورىنباسارى عالىمجان مەلدەشوۆ, ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى, ۇلتتىق كوميسسيا توراعاسى ەردەن قاجىبەك جانە ءتىل تىزگىنىن ۇستاعان بىلىكتى ماماندار مەن جەرگىلىكتى زيالى قاۋىم وكىلدەرى قاتىستى.
جيىنعا قاتىسۋشىلار كۇنى كەشە ەلباسى نۇرسۇلتان نازارباەۆقا ۇسىنىلعان لاتىن ءالىپبيىنىڭ جاڭا نۇسقاسىن كەڭىنەن تالقىلاپ, جوباعا قاتىستى ءوز ويلارىن ورتاعا سالدى. سونىمەن قاتار تۇركيا, ازەربايجاننان ارنايى شاقىرىلعان عالىمدار لاتىن الىپبيىنە كوشۋدىڭ ارتىقشىلىقتارى مەن ءتيىمدى تۇستارىنا توقتالىپ, تاجىريبەلەرىمەن ءبولىستى. سەبەبى اتالمىش قوس مەملەكەت تۇركىتىلدەس ەلدەر اراسىندا العاشقى بولىپ قارىپ اۋىستىرعانداردىڭ قاتارىندا. سونداي-اق القالى جيىندا فيلولوگيا عىلىمدارىنىڭ دوكتورى قۇرالاي كۇدەرينوۆا «جاڭا قازاق ءالىپبيى – ۇلتتىق ستراتەگيالىق ماقسات» اتتى عىلىمي بايانداما جاسادى. شارانىڭ نەگىزگى ماقساتى – مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىنداعى لاتىن الىپبيىنە كەزەڭ-كەزەڭمەن كوشۋ ماسەلەسىن كەڭىنەن ناسيحاتتاۋ, ونىڭ ماڭىزدىلىعىن جەتكىزۋ, مەملەكەتتىك ءتىل ساياساتىن جۇزەگە اسىرۋ.
كونفەرەنتسيادا ءسوز العان ماڭعىستاۋ وبلىسىنىڭ اكىمى ەرالى توعجانوۆ: «لاتىن الىپبيىنە كوشۋ – مەملەكەتتىك ماڭىزدى ءىس, ۇلتتىق مۇددەگە ارنالعان باعدارلاما. نەگىزگى مەجە – ماڭگىلىك ەل. ەلباسى ن.ءا.نازارباەۆ 2014 جىلعى 17 قاڭتارداعى قازاقستان حالقىنا جولداۋىندا «... ەندى ەشكىم وزگەرتە المايتىن ءبىر اقيقات بار. انا ءتىلىمىز ماڭگىلىك ەلىمىزبەن بىرگە ماڭگىلىك ءتىل بولدى! ونى داۋدىڭ تاقىرىبى ەمەس, ۇلتتىڭ ۇيىتقىسى ەتە بىلگەنىمىز ءجون», دەپ ايتقانداي, ءالىپبيدى وزگەرتۋ ماڭگىلىك ەلدىڭ ماڭگىلىك ءتىلى ءۇشىن قاجەت. كوزدەگەن ماقساتقا جەتۋدىڭ جولى – وسى», دەدى.
«ەگەمەن-اقپارات»
