وڭتۇستىك قازاقستان وبلىسى شاردارا اۋداندىق ءبىلىم ءبولىمىنىڭ ۇيىمداستىرۋىمەن ب.سوقپاقباەۆ اتىنداعى جالپى ورتا مەكتەبىندە «ۇستاز – ۇلى تۇلعا», «ماڭگىلىك ەل – مارتەبەلى ءتىل» جانە «قارتتارىم – قازىنام» تاقىرىپتارىندا ەرەكشەلەۋ كەش وتكەن بولاتىن. ەرەكشەلەۋ دەيتىنىمىز, كەش قازاق, ورىس, اعىلشىن تىلدەرىندە جۇرگىزىلىپ, بالاباقشا بۇلدىرشىندەرى مەن مەكتەپتىڭ ونەرلى وقۋشىلارى ءۇش تىلدە كونتسەرتتىك قويىلىمدار قويدى.
– ەلباسى نۇرسۇلتان نازارباەۆ «بولاشاققا باعدار: رۋحاني جاڭعىرۋ» ماقالاسىندا ۇلتتىڭ تابىستى بولۋى ونىڭ تابيعي بايلىعىمەن ەمەس, ادامدارىنىڭ باسەكەلىك قابىلەتىمەن ايقىندالاتىنىن ايتا كەلە, ءاربىر قازاقستاندىق, سول ارقىلى تۇتاس ۇلت ءححى عاسىرعا لايىقتى قاسيەتتەرگە يە بولۋى كەرەكتىگىن اتاپ ءوتتى. كومپيۋتەرلىك ساۋاتتىلىق, شەت تىلدەرىن ءبىلۋ, مادەني اشىقتىق سياقتى فاكتورلاردى اركىمنىڭ العا باسۋىنا ءسوزسىز قاجەتتى العىشارتتاردىڭ ساناتىندا اتادى. ياعني ەلباسى ەڭبەگىندە ايتىلعانداي, ء«ۇش تۇعىرلى ءتىل» باعدارلاماسى قازاقستاندىقتاردى ءححى عاسىردىڭ تالاپتارىنا دايارلاۋدىڭ قامى. ءۇش ءتىلدى ءبىلۋ بۇگىنگى كۇننىڭ باستى تالابىنا اينالىپ وتىر. سوندىقتان ءبىز دە وسىنداي ءىس-شارالار ارقىلى بۇگىنگى بۋىندى تىلدەردى مەڭگەرۋگە ىنتالاندىرا وتىرىپ, اتا-انالارعا مەكتەپ وقۋشىلارىنىڭ ءۇش ءتىلدى قالاي مەڭگەرىپ جاتقانىن اڭعارتقىمىز كەلدى, – دەيدى اۋداندىق ءبىلىم ءبولىمىنىڭ باسشىسى اقشاگۇل بەرداليەۆا.
بولاتبەك قىستاۋوۆ تىزگىن ۇستاعان اۋداندا وتكەن جىلى ەكى ءبىلىم بەرۋ مەكەمەسىنە 200 ورىندىق قوسىمشا وقۋ كورپۋستارى سالىنسا, بيىل الاتاۋ باتىر اۋىلىندا 900 ورىندىق جاڭا مەكتەپتىڭ قۇرىلىسى اياقتالۋعا جاقىن.
عالىمجان ەلشىباي,
«ەگەمەن قازاقستان»
