ماسەلەن, «Kirim Haber» اگەنتتىگى قىرعىزستان پرەزيدەنتىنىڭ بۇل سىڭارجاق مالىمدەمەسىن ەلدەگى سايلاۋ ناۋقانىنداعى احۋالمەن بايلانىستىرا وتىرىپ قاراستىرعان. ال «رەيتەر» اگەنتتىگى رەسمي بىشكەكتىڭ قازاقستان پرەزيدەنتىنىڭ قىرعىزستاندىق ۇمىتكەر ومىربەك بابانوۆتى قابىلداۋىن وزدەرىنىڭ ىشكى شارۋاسىنا ارالاسۋ دەپ ەسەپتەيتىنىن جازادى.
رەسەيلىك بىرقاتار ساراپشىلار المازبەك اتامباەۆتىڭ كۇرت وزگەرىپ, بۇرا تارتا سويلەۋىن «سۋعا كەتكەن تال قارمايدىعا» بالاپ وتىر. ماسەلەن, «موسكوۆسكي كومسومولەتس» باسىلىمىنا سۇحبات بەرگەن تمد جانە ورتالىق ازيا ەلدەرى بويىنشا ساراپشى, حالىقارالىق جۋرناليست اركادي دۋبنوۆتىڭ پايىمداۋىنشا, رەسمي بىشكەك ا.اتامباەۆتىڭ ىڭعايسىز پىكىرى ءۇشىن كەشىرىم سۇراۋى قاجەت. سونداي-اق ول الدا-جالدا كەشىرىم سۇرالماسا, باۋىرلاس ەكى ەلدىڭ اراسىنا وت تۇسەتىنىن ايتادى.
«قازاقستانعا قاراتا ايتىلعان ءجونسىز پىكىرلەر نازاردان تىس قالماق ەمەس. مۇنداي سوزدەر قازاقستان مەن قىرعىزستان اراسىنداعى قارىم-قاتىناستى بۇزادى. مەنىڭشە, رەسمي بىشكەك جەدەل تۇردە كەشىرىم سۇراۋى كەرەك. ەكى ەل اراسىنداعى الاۋىزدىق ورتالىق ازياداعى جاعدايعا ءتيىمسىز», دەيدى ساراپشى.
«نەزاۆيسيمايا گازەتا» ا.اتامباەۆتىڭ بۇل ارەكەتىن ەلدەگى سايلاۋ ناۋقانىنداعى جاعدايمەن بايلانىستىرا كەلىپ, قىرعىزستاننىڭ قازىرگى پرەزيدەنتى قولداپ وتىرعان ۇمىتكەر سوورونباي جەەنبەكوۆتىڭ حالىق اراسىنداعى بەدەلى تومەندەي باستاعانىن جازادى.
المازبەك اتامباەۆتىڭ استام ءسوزى نەگە اپارىپ سوعارى تۋرالى قىرعىزستاننىڭ ساياساتتانۋشىلارى جەرگىلىكتى ResPublica گازەتى بەتىندە پىكىر بىلدىرگەن. ماسەلەن, ساياساتتانۋشى ەديل وسمونبەتوۆ قىرعىز پرەزيدەنتىنىڭ كورشى ەلدەر جانە ولاردىڭ باسشىلارىنا قاراتا ايتقان ورىنسىز سىنى جالعىز بۇل ەمەس ەكەنىن ەسكە سالادى.
بىراق, ساياساتتانۋشى پرەزيدەنت اتامباەۆتىڭ ءسوزى ەكى مەملەكەت تۇرعىندارىنىڭ قارىم-قاتىناسىنا بالەندەي اسەر ەتە قويمايدى دەپ ەسەپتەيدى. «ورتالىق ازيا ەلدەرى گەوساياسي سالماقتى ارتتىرۋ ءۇشىن بىرىگۋى كەرەك», دەپ اتاپ كورسەتكەن ساياساتتانۋشى باسىلىم بەتىندە.
نەگىزىندە ا.اتامباەۆتىڭ ءوزى جاقتاپ وتىرعان ادامنىڭ پرەزيدەنت بولا الماي قالۋ قاۋپى سەزىلە باستاعاندىقتان, ءتۇرلى ايلا-شارعى جاساي باستاعانىن سوڭعى اقپاراتتاردان انىق اڭعارىلادى. قىرعىزستان باسشىسىنىڭ قازاقستان تۇرعىسىندا ايتقان ورىنسىز پىكىرىن سونداي امالداردىڭ ءبىرى دەپ تۇسىنۋگە بولادى.
قىرعىزستانداعى «جانى مۋن» وپپوزيتسيالىق قوزعالىسىنىڭ وكىلى ءادىل تۇردىقۇلوۆ «نەزاۆيسيمايا گازەتا» باسىلىمىنا بەرگەن سۇحباتىندا قىرعىزستان باسشىسىنىڭ قازاقستانعا قاتىستى ايتقان پىكىرىن «سوڭعى تۇياق سەرپۋگە» بالايدى. بۇعان قوسا, ول: «بيلىكتىڭ قولىنان كەلەر ارەكەتى از. ولار ەڭ اۋەلى بابانوۆتى سايلاۋدان شەتتەتۋدى كوزدەيدى. ورتالىق سايلاۋ كوميسسياسى وعان ەكى رەت ەسكەرتۋ بەرىپ ۇلگەردى. ەكىنشىسى – ەلدەگى جاعدايدىڭ شيەلەنىسكەنىن سىلتاۋراتىپ, داۋىس بەرۋدى كەيىنگە قالدىرۋ. وسىنى ەسكەرە كەلە, اتامباەۆتىڭ نەلىكتەن مۇنداي قادام جاساعانىن ءتۇسىنۋ قيىن ەمەس», دەيدى.
ءا.تۇردىقۇلوۆتىڭ پىكىرىنشە, جاعدايدىڭ بۇلاي ءوربۋى تاڭعالارلىق جاعداي ەمەس. سايلاۋ ناۋقانىنداعى ۇگىت-ناسيحات جۇمىستارى باستالماي-اق مۇنداي وقيعانىڭ بولۋ مۇمكىندىگى ەسكەرىلگەن كورىنەدى. «اتامباەۆتىڭ مالىمدەمەسى ونىڭ ۇرەيلەنەتىنىن كورسەتەدى. ءو.بابانوۆ جەڭىسكە جەتسە, ونىڭ قاۋىپسىزدىگىنە زيان كەلۋى مۇمكىن. بابانوۆپەن بىرگە بۇل ماسەلە جونىندە اڭگىمە جۇرگىزىلسە دە, اتامباەۆ وعان سەنبەيدى», دەپ ەسەپتەيدى قىرعىزستاندىق ساراپشى.
اتالعان باسىلىم وسىدان ءبىراز بۇرىن ن.نازارباەۆقا شەكسىز العىسىن جاۋدىرعان اتامباەۆتىڭ كوزقاراسىن كۇرت وزگەرتىپ شىعا كەلۋىنە تاڭدانىسىن دا جاسىرماعان.
«Regnum» اقپارات اگەنتتىگى قىرعىزستان مەن قازاقستان اراسىنداعى شيەلەنىستى وزدەرىنشە باعامداپ كورگەن ەكەن. اگەنتتىكتىڭ پايىمداۋىنشا, ماسەلە ا.اتامباەۆ بيلىك قۇرعان جىلدارى ەلدەگى بىرقاتار زيالى قاۋىم وكىلدەرىن وزىنە قارسى قويۋىنا بايلانىستى تۋىنداعان. سوندىقتان, ول ءوز ءىزباسارى رەتىندە سوورونباي جەەنبەكوۆتى قالدىرىپ كەتۋگە مۇددەلى. وقيعا وسىلاي وربىگەندە عانا اتامباەۆ قىلمىستىق قۋدالاۋدان قۇتىلا الادى.
«Regnum» 15 قازانداعى سايلاۋدا ومىربەك بابانوۆ جەڭىسكە جەتەدى دەپ سانايدى. قازاقستاندى ايىپتاعان اتامباەۆ مۇنداي جاعدايدا داۋىس بەرۋگە سىرتقى كۇشتەردىڭ ارالاسقانىن سىلتاۋراتا الادى. اگەنتتىكتىڭ پىكىرىنشە, سايلاۋ ەكىنشى تۋرعا سوزىلسا, قىرعىز پرەزيدەنتى حالىقتىڭ كوزقاراسىن وزگەرتۋگە بارىن سالادى.
سونىمەن قاتار اگەنتتىك قازاق-قىرعىز قاتىناسىنىڭ سايلاۋعا تىكەلەي تاۋەلدى بولىپ قالعانىن ءسوز ەتكەن. ويتكەنى اتامباەۆتىڭ سوزدەرى ەكى ەل اراسىنداعى بايلانىستى شيەلەنىستىرىپ جىبەرگەن. اگەنتتىك, سونداي-اق, قىرعىزستاننىڭ پرەزيدەنتتىگىنە كىم سايلانسا دا, «توعىزىنشى تەرريتوريامەن» كەلىسۋ قيىنعا سوعاتىنىن بولجايدى.
اتالعان اگەنتتىك ەكى ەل اراسىنداعى قارىم-قاتىناستىڭ بۇزىلۋىنا قىرعىز باسشىسىنىڭ تىكەلەي اسەر ەتكەنىن ايتادى. وسى ورايدا «Regnum» اقپارات اگەنتتىگى قازىرگى قىرعىز بيلىگىنىڭ وتپەن ويناپ وتىرعانىن تىلگە تيەك ەتكەن.
«پراۆدا» گازەتى اتامباەۆتىڭ ارەكەتىن ارقادان پىشاق ۇرۋعا بالاپ وتىر. باسىلىمنىڭ پىكىرىنشە, قىرعىز باسشىسى تاقتان تاياتىن كەز جاقىنداعان سايىن قازىرگى مۇمكىندىگىن پايدالانىپ, ايتارىن ايتىپ قالۋعا تىرىسادى.
اباي اسانكەلدى ۇلى,
«ەگەمەن قازاقستان»
