فورۋمنىڭ اشىلۋ سالتاناتىندا سەنات توراعاسى قاسىم-جومارت توقاەۆ پرەزيدەنت نۇرسۇلتان نازارباەۆتىڭ شاراعا قاتىسۋشىلارعا ارناعان قۇتىقتاۋىن وقىپ بەردى. مەملەكەت باسشىسىنىڭ قۇتتىقتاۋىندا مگيمو-عا ءوز ەلىنىڭ ومىرىندە ماڭىزدى ءرول اتقاراتىن كورنەكتى ساياسي جانە قوعامدىق قايراتكەرلەر, ديپلوماتتار, جۋرناليستەر, كاسىپكەرلەردىڭ تۇتاس ءبىر شوعىرىنىڭ قاراشاڭىراعى رەتىندە جوعارى باعا بەرىلدى. قازاقستان پرەزيدەنتى جەر جۇزىندەگى ساياساتتىڭ, ەكونوميكاداعى جانە قوعامدىق ومىرىندەگى كۇشەيە تۇسكەن دۇربەلەڭدەر اياسىندا حالىقارالىق سالا ماماندارىنىڭ جاۋاپكەرشىلىگى مەن ءرولى ارتا تۇسكەنىن اتاپ ءوتتى.
ق.توقاەۆ ءوز سوزىندە ماسكەۋ مەملەكەتتىك حالىقارالىق قاتىناستار ينستيتۋتى فورۋمى جاھاندىق كۇن تارتىبىندەگى اسا ماڭىزدى ماسەلەلەر بويىنشا پىكىر الماسۋ مۇمكىندىگىن بەرەتىنىن اتاپ ءوتتى.
سەنات توراعاسى قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولاردىڭ الدىندا يادرولىق قارۋدى تاراتپاۋعا, تەرروريزمگە قارسى كۇرەسكە, دىنارالىق ۇنقاتىسۋدى قالىپتاستىرۋ ماسەلەلەرىن شەشۋگە مەيلىنشە ۇلەس قوسقانىن ەسكە سالدى. استانا ەقىۇ, شىۇ, تمد, ەاەو, اوسشك سامميتتەرىن وتكىزگەن ءىرى حالىقارالىق ورتالىق رەتىندە قالىپتاستى.
سەنات توراعاسى قازاقستان ەلورداسىندا الەمدىك جانە ءداستۇرلى دىندەر ليدەرلەرىنىڭ سەزى جۇيەلى تۇردە ءوتىپ وتىراتىنىنا ماڭىز بەرىپ, وعان رۋحاني جانە ساياسي قايراتكەرلەر, ونىڭ ىشىندە بۇۇ باس حاتشىسى, يوردانيا كورولى, فينليانديا پرەزيدەنتى جانە تاعى باسقا دا تۇلعالار قاتىسقانىن ايتتى. ء«بىزدىڭ ماقساتىمىز – ساياسي كوشباسشىلار مەن ءدىني قايراتكەرلەردىڭ ءبىر ۇستەل باسىنا جينالعانى, ەڭ باستىسى, ولاردىڭ ءبىرىن-ءبىرىن تىڭداعانى جانە ەستىگەنى», - دەپ اتاپ ءوتتى سەنات توراعاسى.
ق.توقاەۆ 1994 جىلى پرەزيدەنت ن.نازارباەۆتىڭ ماسكەۋ مەملەكەتتىك ۋنيۆەرسيتەتىندەگى ايگىلى لەكتسياسىنان باستاۋ الاتىن ەۋرازيا ەكونوميكالىق وداق اياسىنداعى ينتەگراتسيالىق ۇدەرىستەر تۋرالى ءوز ويلارىمەن ءبولىستى. «گەوساياسي تۇرعىدان قاراعاندا, بۇل وداق قازاقستان مۇددەلەرىنە ءسوزسىز سايكەس كەلەدى, ءبىز ونى قولداپ كەلەمىز», - دەدى پارلامەنت جوعارعى پالاتاسىنىڭ باسشىسى.
قازاقستاندا جۇرگىزىلىپ جاتقان ساياسي, ەكونوميكالىق جانە الەۋمەتتىك ترانسفورماتسيا ۇدەرىستەرىنە نازار اۋدارىلدى. ق.توقاەۆ فورۋمعا قاتىسۋشىلارعا مەملەكەت باسشىسىنىڭ باستاماسىمەن جۇزەگە اسقان كونستيتۋتسيالىق رەفورما تۋرالى, سونداي-اق «100 قادام» ستراتەگياسى مەن «رۋحاني جاڭعىرۋ» باعدارلاماسى تۋرالى ايتىپ بەردى.
«نۇرلى جول» باعدارلاماسى تۋرالى ايتا كەلىپ, توراعا ونىڭ قازاقستانداعى كولىك قاتىناسى جەلىسىن, لوگيستيكا جانە بارلىق ينفراقۇرىلىمىن جاڭعىرتۋعا باعىتتالعانىن اتاپ ءوتتى.
رەسەيدىڭ سىرتقى ىستەر ءمينيسترى سەرگەي لاۆروۆ پرەزيدەنت ۆلاديمير ءپۋتيننىڭ قۇتتىقتاۋىن وقىدى. رەسەي كوشباسشىسى استانانى «كوپتاراپتى ديپلوماتيانىڭ, حالىقارالىق ەكونوميكالىق ىنتىماقتاستىقتىڭ, ەۋرازيالىق ينتەگراتسيالىق ۇدەرىستەر ورتالىقتارىنىڭ ءبىرى» دەپ اتادى.
«قازاقستان رەسپۋبليكاسىنىڭ پرەزيدەنتى ن.ءا. نازارباەۆتى, قازاقستان رەسپۋبليكاسى پارلامەنتى سەناتىنىڭ توراعاسى, ماسكەۋ مەملەكەتتىك حالىقارالىق قاتىناستار ينستيتۋتى تۇلەگى ق.ك. توقاەۆتى, سونداي-اق وسى اۋقىمدى شارانىڭ ازىرلەۋگە قاتىسقان بارلىق قازاقستاندىق ارىپتەستەردى شىنايى قۇتتىقتاعىم كەلەدى», - دەلىنگەن رەسەي پرەزيدەنتىنىڭ ۇندەۋىندە.
شاراعا قاتىسۋشىلارعا قازاقستان سىرتقى ىستەر ءمينيسترى قايرات ابدراحمانوۆ جانە ماسكەۋ مەملەكەتتىك حالىقارالىق قاتىناستار ينستيتۋتى رەكتورى اناتولي توركۋنوۆ تا ۇندەۋ جولدادى.
فورۋم اياسىندا الەمدىك ساۋداداعى قازىرگى جاعداي, ايماقتىق ىنتىماقتاستىقتىڭ كەلەشەگى, ونىڭ ىشىندە ءبىلىم بەرۋ جانە مادەنيەت سالاسى بويىنشا سەسسيالار بولادى. شاراعا تمد, ەۋروپا وداعى, سولتۇستىك امەريكا, تاياۋ شىعىس, ازيا-تىنىق مۇحيتى ايماعى ەلدەرىنەن 400-دەن استام ماسكەۋ مەملەكەتتىك حالىقارالىق قاتىناستار ينستيتۋتى تۇلەكتەرى, سونداي-اق قازاقستاننىڭ مەملەكەتتىك ورگاندارى, قوعامدىق جانە ىسكەرلەر قاۋىمداستىعىنىڭ وكىلدەرى قاتىسۋدا.
